﻿Jiobu.
20.
Tọbudu iya bụ; Zofa, bụ onye Nama bya eyee ọnu sụ: 
Ọ kwa l'egomunggo agbanụka mu gharaghara meru g'o gude mu nọdu eye ọnu-a, mu abya eyeye-a; kẹle ẹhu te ebvuduru mu ebvuru. 
Mbụ lẹ mba ono, mu anụ ono bẹ iphere iya dụ mu. Ọ bụru iya l'akpali mu eye ọnu. 
Ire-lanụ bụ opfu bụ l'ị maru-a g'iphe dụkpoo e -shi lẹ ndiche; mbụ eshi ọphu e meru nemadzụ dobe l'eliphe. 
Ị maru-a l'onye ẹjo-iphe bẹ ẹhu-ụtso nkiya abụjele-a tsọkere; mbụ l'onye amadụ Chileke bẹ ta adụdu g'ootebejeru ẹswa. 
A makwarụ-a l'eku-onwonye nkiya erwuje akpaminigwe. Ọ nọdu apangobeje ishi ẹhuka-ẹhuka; k'ọphu ishi iya ejeje asụ-pfuru l'urwukpu. 
Ọle ọo gẹ nshị, o nyịru anyịnyi erekashịhuje-a bụ g'oo-rekashịhu jasụ l'ojejoje. Ndu shi ahụmaje iya nụ e-mechaa ajịje sụ: ?O jehunuru awe? 
Ọo gẹ nrwọ ephukashịhuje-a bụ g'oo-phukahụ; ọphu a hụmabaedu iya ọhumalenya; mbụ l'oo-me phosamu g'ọphulenya, a phụru l'ẹnyashi. 
Onye shi hụma iya nụ -nọnyaa bẹ ọ tọo hụmahedu iya ọzo. Ọkpoku ibe iya ta ahụmabaedu iya ẹnya ọzobaa. 
Ọ bụru ụnwu iya e-mechaa pfụa ndu akpa nri ụgwo iphe, o meru phẹ. Mbụ l'ẹphe e-mechaa gude ẹka phẹ nụ-phuchaa phẹ ẹku phẹ ono azụ. 
Ọkpehu ọkpehu ono, o shi eme k'okorọbya ono etsoru iya bụru wurumu l'ilu. 
A makwarụ-a l'ẹjo-iphe atsọje iya ụtso l'ọnu. Ọ nọdu akpụjeru ẹjo-iphe l'ọnu; gude ire sụ-mia ya. 
A makwarụ-a l'ọ tọo dụjedu ike haa ẹjo-iphe g'o je; l'o wojeru iya kpụru akpụru l'ọnu. 
Ọle nri, o riru eriri e-mechakwanaa nọdu iya l'ẹpho shiahaa ishi. Nri ọbu e-mechaa dụ iya l'ẹhu g'onye óghù tsọru ọnu. 
Noo teke ọo-gbọshi ẹku ono, o shi elwee kawọmu kawọmu onoya; mbụ lẹ Chileke e-me g'ẹpho iya tụko iya nwashịa g'ọ ha. 
L'ọ wata ericha ọnu-mini óghù. Ọ bụru ire, óghù meru nmẹremu e-mechaa kpọ-nyịa ya ẹnya. 
Ọ-sọ-gborogboro ono taa adụedu iya k'ele ẹnya; mbụ nggele ono, bụ iphe, agba iya dẹredere bụ manụ-ẹnwu yẹe mini ẹra-eswi ono. 
Iphe ono, o seru akanya iya ono bẹ oo-mecha nụ-phu azụ; o too ridu iya l'ọnu. Urwu, dabarụ iya lẹ nghọ, ọ gbaru ta atsọhedu iya ụtso. 
Iphemiphe ono bụru opfu l'o mewaru ndu akpa nri mkpawere woru phẹ tọgbo mgbegere. O yeru ẹka nata ndiphe ụlo, ọ tọ kpụduru. 
Hoo haa; eshinu ọ tọo nmapfujeduru anmapfuru l'eme ụghoro bẹ ọ tọ dụkwa iphemiphe ono, agụ iya nụ ono dụru ọphu oo-nweru; ọphu ẹku iya adzọkwanu iya. 
Ọ tọ dụedu iphe, dụru iya nụ, bụ iphe, oo-gude ria gwọo-gwọo. Ẹku iya ta adụkwa ẹka ọo-nọ-beru. 
Ọo teke ọ nọ eri g'ọ dụ iya bẹ ọla-l'iswi atụje iya l'ụpfu; mbụ aphụ asọru kpulakpula bya asọ-kputa iya ishi. 
Ẹpho -bya eji iya; Chileke atụkoepho oke ẹhu-eghu iya byabẹ iya l'ishi; chiẹ ya phọ gbaa-gbaa. 
Teke o ketarụ ọso nahụ mgbọ-ígwè; apfụ, e kweru l'onyirubvu eguru iya l'okpurukpu. 
L'ọ bya ephefu iya l'okpurukpu iya; mbụ phefu iya mpyịpyi iphe-ígwè ono, charu ọku gbarara ono lẹ meji. Ndzụ-agụgu emee ya omeliwe. 
Ẹku iya l'ophu abụru iphe, kụru l'ọchii. Ọku, e nweziduru enwezi enwulihu woru iya kepyashịa tsupyashịchaa mẹ nwa ndu phọduru l'ụlo iya. 
Akpaminigwe l'ophu atụko ẹjo-iphe, o mekọtaru kpuhaa ghebe ọnu. Alị agbalihu gbaa ya ekebe. 
Mini abyaa utso bya ekpota ụlo iya; mbụ ọ-gba-gborogboro mini a-bya mbọku, Chileke a-tụ-koshi iya ẹhu-eghu iya. 
Noo ẹgube obunggo, Chileke ebuje ndu ẹjo-iphe; tẹme ọ bụru okiphe, Chileke gude ẹka iya keru nụ phẹ. 
