﻿Jiobu.
18.
Tọbudu iya bụ; Bilidadu, bụ onye Shuwa bya eyeeru iya ọnu sụ iya: 
?Dẹnukpoo teke ii-pfubuhu g'iipfu ọwa-a? G'egomunggo dụnu ngu; k'ọphu anyi a-maru g'anyi e-gude eye ọnu l'iphe-a. 
?Dẹnu g'o gude anyi dụ g'anụ l'ẹnya ngu; mbụ l'ị tụkoru anyi kua ndu mmanụ? 
Gụbe nwọphu ẹhu ghutaberu eghu; k'ọphu i woru onwongu labushia nanụ nanụ; ?bụ g'a gbadoru ngu mgboko l'ophu? Tọo ?bụ g'e je aphọshiaru ngu agbara mkpuma g'ọ tọ dụhe l'ẹka ọ dụ? 
“Sụa; ìphóró, dụru ndu ẹjo-iphe bẹ aa-phụnyikwa; ọphu ọku iya enwuẹkwa enwunwu. 
Ìphóró, shi dụ l'ụlo iya a-bụkwaru ọchii. Ọku anyịhu l'orọku, ọ sụ-kuberu onwiya. 
Ọkpa ono, o shi azọje gbụnyingu gbụnyingu ono ta adụekwa ike, adụ iya nụ. O bụru iphe, ọ chịru idzu ememe e-nwuta iya tụa kpurumu l'alị. 
Ọkpa, ọ zọru azọzo bụ l'ẹka ọ zọru iya bụ l'ụgbu, e geru doberu iya. Tẹme ọ bụru l'eli igbudu bẹ ọo-zọ ọkpa. 
Agburu, e kweberu iya a-tụ iya l'ichiripfu ọkpa. Ọ-tụ-gburumu atụa ya swịswia. 
A tụru obu-alị domiaru iya l'ụzo, ooshi; bya agbabẹkwaru iya phọ ọ́nyà lẹ gbororo. 
N-yemebvu emeje gẹ ndzụ gụ iya l'ẹkameka, ooshi. Tẹme ọ nọdu anọduje etsoẹ ya phọ pụrupuru l'iphe, bụkpoo ẹka ọ zọru ọkpa. 
Ike shi dụ iya; obenu lẹ nta-a bẹ ọokpuwaa rịgorigo. Tẹme eze iphe-ẹhuka nọdu lẹ mgboru iya kwabẹru iya m'ọbvu teke ọo-da. 
Akpọ, dụ iya l'ẹhu bẹ ọonoduje atapyashị. Ọkpara anwụhu nọdu atụkoje iya ọkpa yẹe ẹka tajishia. 
Aa-kpụta iya l'ọkpehu kpụfu l'òbú iya, bụ ẹka ọ kpọru obu ye; dụbe iya ẹka je enwuru yeru onye eze n-yemebvu. 
Ọ tọ dụedu iphe, nọ l'ụlo iya ọphu ẹka iya a-dụ. Ọ bụru ọku nshị-egbe bẹ ee-woru kpua l'ụlo iya. 
Ọo-kpọhu nkụ jasụ l'ọgbarabvu; nwụa lwaa jasụ l'ẹkali iya. 
Ọ tọ dụdu onye anyatabaa ya nụ l'eliphe-a; ọphu oonwehẹdu ẹpha lẹ mgboko-a. 
Aa-chịfuta iya l'ẹka ìphóró dụ; chịru iya je eye l'ẹka agba ọchii; mee ya l'ọ chịhu lẹ mgboko mgburugburu. 
O too dobedu nwa; ọphu o nweẹdu abụbu lẹ ndu ẹka o shi. Ndibe iya ta adụedu adụdu ophu l'ẹka o bujeru. 
Ndu shi l'ụzo ẹnyanwu-arịba -bya bya ahụma g'ọonwuru iya; ndzụ erwuta phẹ. Ndu shi l'ụzo ẹnyanwu-awawa -hụma iya; ishi anyịa phẹ ẹdzu. 
Hoo haa; nokwa g'ọoduje l'ibe onye eme ẹjo-iphe, bụ onoya. Ọ kwa ẹgube ono bụ g'ọoduje l'unuphu onye amadụ Chileke.” 
