﻿Jiobu.
17.
Ọkpoma ta adụekwa mu ree. Eswe ndzụ mu bẹ e meakwaru; ọ tsụ-phu azụ. Ilu echeakwa mu echeche. 
Mbụ lẹ ndu nọru mu mgburugburu bụkotaepho ndu ekweru mu une. Ọ bụerupho ẹka ẹnya mu atụbaje bụ l'aphụ, ẹphe akpatsushi mu. 
Natanụ mu mkpalẹka; jiko Chileke; kẹle ọ tọ dụdu onye ọzo, sụru g'ọona mu mkpalẹka gbahaa gụbedua. 
I mechiwaru phẹ ẹkpa egomunggo; ọphu ọ dụedu iphe, edoje phẹ ẹnya. Ọo ya bụnu l'i tii kwedu g'ẹphe mekpee mu. 
Onye jịkaru ndu yẹle iya eshi ọ̀nyà l'opfu g'e bua ya nggo bụkwa ụnwu iya bẹ ẹnya e-mechaa nyịshihu. 
Chileke mewaru mu iphe, onyemonye gude atụ phukuku. Mu bụru onye ndiphe agbụ ọnu-mini l'iphu. 
Mu jewaru iphe-ẹhuka jasụ mu nọdu aphụwaa ragaraga; mbụ l'ẹhu mu l'ophu erewa ụphere. 
Ndu obu phẹ gụru ìphóró bẹ ọ tụfuru ẹhu. Ndu iswi dụ mma swọlihu tsoru ndu te emedu ele Chileke. 
Ọle g'ọ dụhabe; ndu pfụberekoto a-bụenurupho onye ẹphe bụ; tẹme ndu iswi dụ mma a-nọdu akaẹepho ọkpehu eje. 
Obenu l'unubẹdua; unu bya atụko g'unu ha nọkobe. Ọle ọ bụ; mu ta ahụmakwa g'ọ ka mma l'ọo onye lanụ, maru iphe lẹ g'unu ha. 
Eswe ndzụ mu bvụakwaru; iphemiphe, mu rịru k'ememe bụakwaa kẹ mmanụ. Nokwaphọ g'iphe gụru mu ẹgu ememe dụkwapho. 
L'unubẹdua woru ẹnyashi kua echi eswe. Ọ bụru l'ẹka ọchii gbaru tsụkiribaa bẹ ẹphe nọ sụ: Ha! Ìphóró adụakwanu.” 
Ọ -bụru lẹ mkpakọ unuphu mu ele ẹnya iya bụ alị-maa; ọ -bụru l'ẹka mu e-je agbaa iphe-azẹe bụ l'ẹka gbaru tsụkiribaa; 
ọ -bụru lẹ mu sụru ilu l'ọo ya bụ nna mu; bya ekua ẹkà nene mu; ọzoo kua ya nwune mu; 
?bụbahunaa gụnu ọzo bẹ mu e-lebaa ẹnya iya-a? ?Bụ onye a-sụbaa mu l'ọwa-a iphe, mu a-nọdu ele ẹnya iya bụ ọwa-a? 
?Oo-tsoru mu nwuda l'alị-maa tọo? Anyi l'iya a-tụko bụru wurumu l'ilu tọo? 
