﻿Jiobu.
14.
Nemadzụ, nwanyị nwụru-a bẹ eswe ndzụ iya adụdu igwerigwe. Tẹme ọ bụerupho iphe-ẹhuka bụ iphe, jiru iya nụ. 
Ọojataje ẹgwegwa g'okoko; l'ọ bụhukwaru iya phọ anwụlwashihu. Ọ bụru g'onyonyo, a taa nọribejeduru-a bụ g'ọ tọ dụdu ẹka ọono-bejeru. 
?Bụ ẹgube nemadzụ ono bẹ iije eworu ẹnya swọbe? ?Ii-jeje iya akpụta bya g'i kpee ya ikpe l'iphu ngu? 
?Bụ onye sụru g'oo-ye ẹka l'iphe, adụebedu ree wofuta iya iphe, dụebe ree? Ọ tọ dụdu! 
Eshinu a gụwaru eswe, nemadzụ a-nọ-beru ndzụ ọgu doberu iya; tẹme ị bya atụ-buwaru iya ọnwa ole, ọo-nọ l'eliphe-a; bya egoshiwa iya g'oo-jebejeru l'eliphe-a; 
wofunụ iya ẹnya; hanaa ya g'ọ tụsaru ẹhu; jasụ l'o jee oke ozi iya jeghee g'onye e butaru ozi. 
Kẹle-a; oshi, bvuru l'alị nwekwarụ iphe, oole ẹnya iya; mbụ l'e -gbutsua ya l'ọomita ọzo l'upfu iya. Ono, ọ mịtaru k'ọ̀phúú ono abya adzụru ọzo. 
Ọgbarabvu iya erehu kwaa l'ime alị. Upfu iya anọdu l'alị nwụhu. 
Teke igwe dzeẹrupho mini l'ọ kpọ-futa; mbụ l'o rwua irwu ọ̀phúú g'iphe, a kuru akụku. 
Obenu lẹ nemadzụ abụjeru; ọ -nwụhu; nkiya abvụ. Ọ -tụwaa unme ikpazụ; ọ tọo tụbaedu ọzo. 
Ọo g'eze-ẹnyimu adụje mẹ mini tabọta iya-a; ọzoo g'agụga agụga nggele adụje nkwagbo-nkwagbo mẹ ọ tahụ-a; 
noo gẹ nemadzụ azẹ-zetajẹ; ọ tọo gbẹshibaedu jasụ teke igwe ta adụhedu. Ọ tọ byadu agbẹshibaa; ọphu e metebaẹdu iya lẹ mgbẹnya ono, tụru iya nụ ono. 
Ọ dụ mu g'a sụ l'ii-wotakpọe mu phọ je edomia l'alị-maa; mbụ kpuchia mu iphe l'ẹka ono jasụ ẹhu eghubuhu ngu eghu. Ọ dụ mu g'a sụ l'i gege atụkpoepho sụ l'ọwa-a g'ọo-nọ-beru baa; tẹme l'ị nyatabaa mu. 
Mbụ-a; nemadzụ -nwụhuchaa; ?ọo-dzụru ndzụ ọzo? Mbụ eswe ujiku olemole-a, mu eje ozi mkpọnwu ẹhu-a bẹ mu gege angabẹepho g'o rwua eswe mbọku, ee-me mu gẹ mu dụ k'ọ̀phúú k'ọ̀phúú. 
Noo teke bụ: i -kua mu oku; mu aza ngu ẹnu. Onye ono, bụ ngu gude ẹka ngu mee ya dobe ono adụaha ngu ree l'ẹnya. 
Noo teke ịi-nọdu agụkwanu ije mu ọgu. I tii nyochaẹkwanu iphe-ẹji, mu meru. 
Iphe, bụkpoo emeswe, mu mesweru ngu abụru iphe, ịi-chịru ye l'ẹda kechia. L'i woru iphe kpuchia l'iphe-ẹji, mu meshiru ngu. 
Obenu lẹ-a; ọo g'úbvú anọnya l'o ribashịhuaha eribashịhu phọ; ọ bụru g'aanọnya l'a phọfu oke agbara-mkpuma l'ẹka ọ kpọru phọ; 
mbụ lẹ-a; ọo gẹ mini emeje mkpuma l'o chi swacha swacha phọ; tẹme ọchioku-mini nọdu asọchataje ẹja, nọ l'alị phọ; noo g'ịisotaje iphe, nemadzụ ele ẹnya iya sọfukpoepho asọfu. 
Ọo ugbo lanụ bẹ ịikapyabeje nemadzụ ẹnya l'ọ bụru iya atụgbu. L'i mee ya g'ọ gbanwụbe iphu l'ị chịfu iya. 
Teke aakwabẹ ụnwu iya ùbvù; ọ tọ dụedu iphe ono, dụru ọphu ọ makwaduru. Teke eehu phẹ adagba-nchị l'alị; ọ tọ dụedu ọphu ọohumakwadu. 
Ọ bụwaru iphe, erwuje iya l'ẹhu bụ iphe, eme iya ẹhuka l'ẹhu nkiya. Ọ -nọdu agụ aphụ l'ọ gụwaru iya rọ onwiya. 
