﻿Jiobu.
5.
Kunaa oku nta-a maru mẹ ?o nweru onye a-za ngu ẹnu. ?Dẹnu ụnwu imigwe ono ọphu ịi-gharu iphu g'ọ gbaaru ngu mkpu? 
Ọvuma egbujekwa onye-eswe; tẹme ijiẹnya nọdu aphụje onye amazidu iphe tẹrii. 
Mu hụmajeakwaru ẹka onye-eswe agba ọgbarabvu; ọphu ọ dụdu g'ọ nọ-beru; atuphuwa iya l'ọnu. 
Ụnwu iya kwatakpọo awa awawa; mbụ l'eegweje phẹ arakabya l'ẹka ekpe ikpe. O to nwedu onye agbaru phẹ ọdzori. 
Ọ bụru ndu ẹgu agụ erifuje iphe, ọ kpatarụ l'ẹgu iya; mbụ l'ẹphe ewotajẹchaa wota ọphu nọ l'ẹka o pheduru ẹswa. Ndu ẹhu achị ọku nọdu alwụje iya alwụlwu. 
Kẹle mkpawere te eshijedu l'urwuku futa; ọphu iphe-ẹhuka efutajẹdu l'alị. 
Ọle ọ bụ; nemadzụ bẹ a nwụkwaru ye l'eje iphe-ẹhuka ẹgube-a, ẹkoroku bụ: ọ -gbaa l'o phelihu-a. 
Mbụ l'ọme ọo mu; mẹ mu edooru iya Chileke; mbụ mẹ mu ewoẹrupho g'ọ daru mu shi ishi lanụ dokọtaru iya. 
Lẹ Chileke emeje iphe, dụgbaa biribiri, bụgbaa akpavu l'ishi; mbụ l'oomeje iphe, dụ ebvu igwerigwe kpọ. 
Eliphe bẹ oodzejeru mini. Ọ nọdu asọjeru mini sọba l'ẹgu. 
Ookulije ndu lwarụ alị imeli imeli; tẹme ọ nọdu ekulije ndu agụ aphụ dobe l'ẹka adụdu iphe, byaru eme phẹ nụ. 
Ndu ẹregede bẹ oomeje; o too jehuduru phẹ g'ẹphe tụberu; k'ọphu bụ l'ẹka phẹ ta adụdu iphe, ẹphe emefuje ọ̀nyà. 
Ndu maru iphe bẹ oogudeje ẹregede, ẹphe agba nmata. Tẹmanu mmamiphe ndu ntuphu-ire bẹ oomeje l'ọ daa ịdaphu. 
Nchi ejipfuje phẹ l'echilabọ eswe. Ẹphe eje dadishi l'echi gbadagbada eswe g'onye eje l'echi abalị. 
Ndu adụdu g'ọ dụ phẹ bẹ ọodzotaje l'ẹjo ọnu phẹ. Ọ nọdu adzọtaje phẹ l'ẹka ndu dụ ike; 
k'ọphu bụ lẹ ndu ụkpa bẹ ele ẹnya g'adzọo phẹ. O mee iphe, apfụduru-ọto mee ọnu sụtukumu. 
Ẹhu-ụtso bẹ a gọru nụ onye Chileke abajẹru mba; k'ọphu bụ: Ọkalibe-kangokọtaru-nụ -nọdu alọ ngu ẹka lẹ nchị; ta anmakwa iya phulaphula; 
kẹle ọolojeru ọ́nyá tụ nemadzụ l'ẹhu; l'ọ bya epfube iya iphe l'ọ́nyá ọbu. Ọ nọdu emekajẹ nemadzụ iphe; e -mechaa l'o mee ya l'ọ kpọhu. 
Iphe-ẹhuka a-byaru ngu akpọ ishii; l'ọ dzọchaa ngu; mẹkpoo akpọ ẹsaa; ọle o too kwedu g'ọ dụru iphe, oo-me ngu. 
Lẹ teke akpa-nri; bụ iya a-gbarụ ngu mkpu g'ị tị kpagbu onwongu lẹ nri. Teke aalwụ ọgu l'o mee g'e te egbu ngu mma. 
E -pfuaru ngu ẹjo opfu; o too kwedu g'o rwua ngu l'ẹhu; ọphu ịitsudu ebvu mẹ ọla-l'iswi rwua. 
Ọo ọchi bẹ ịi-nọduje achị ọla-l'iswi yẹe ọkpa-nri; ọphu ị tsụdu anụ-ẹgbudu k'eliphe-a ebvu; 
kẹle gụ lẹ mkpuma, nọ l'ẹgu a-gbachaa ndzụ. Unu l'anụ, bu l'ẹgbudu a-dụchaa lẹ ree. 
Ibe ngu bẹ ịi-makpọru l'ọ tọ dụdu iphe, e-me iya nụ. L'ị bya agụa iphe, bụkpoo iphe, i nweru enweru ọgu; hụma l'ọ tọ dụdu ọphu etuphahụ etuphahụ. 
L'ị maru l'ụnwu ngu a-dụ igwerigwe. Awa ngu a-kpofushi g'ẹswa, furu l'alị. 
L'ị kakpọo nka kaghee ya akaghe tẹme l'ị bahụje l'ilu. L'ị dụ g'ereshi, e gburu l'ògè iya. 
Anyi nyokpọwaru iphe-a enyonyo hụma l'ọ bụ ire-lanụ. Mbụ-a; nụmakwa iya woru iya ye lẹ ndzụ ngu! 
