﻿Ẹzura.
2.
Waa ndu Ízurẹlu ono, shi l'alị Bábilọnu lwa; mbụ ndu ono, a kpụjeru lẹ ndzụ laa alị ọzo, bụ iya bụ ndu Nebukadineza, bụ eze ndu Bábilọnu kpụkojeru laa Bábilọnu. Ẹphe lwarụ Jierúsalẹmu; mẹ Jiuda; onyenọnu lashịchaa mkpụkpu ẹka o shi. 
Ndu ẹphe tso lwa bẹ bụ Zerúbabelu; mẹ Jieshuwa; mẹ Nehemaya; mẹ Seraya; mẹ Relaya; mẹ Mọdekayi; mẹ Bilishanu; mẹ Misupa; mẹ Biguvayi; mẹ Rehumu; waa Bana. Waa gẹ ndu Ízurẹlu ono ha bụ ọwana: 
Oshilọkpa Paroshi bẹ dụ ụnu ise l'ụkporo ụmadzu ẹsato; l'ụmadzu iri l'ẹbo. 
Oshilọkpa Shefataya dụ ụkporo ụmadzu iri l'ẹsato l'ụmadzu iri l'ẹbo. 
Oshilọkpa Ara dụ ụnu l'ụkporo iri l'ẹsato l'ụmadzu iri l'ise. 
Oshilọkpa Pahatu-Mówabu, bụ iya bụ ndu shi l'eri Jieshuwa yẹle Jiowabu bẹ dụ ụnu ẹsaa l'iri l'ẹbo. 
Oshilọkpa Elamu dụ ụnu ẹto l'ụmadzu ụkporo labọ l'ụmadzu iri l'ẹno. 
Oshilọkpa Zatu dụ ụnu labọ l'ụkporo ẹsaa l'ụmadzu ise. 
Oshilọkpa Zakayi dụ ụnu l'ụmadzu ụkporo iri l'ẹsato. 
Oshilọkpa Bani dụ ụnu l'ụmadzu ụkporo ugbo iri l'ẹbo l'ụmadzu labọ. 
Oshilọkpa Bebayi dụ ụnu l'ụmadzu ụkporo iri lẹ nanụ l'onye lanụ. 
Oshilọkpa Azụgadu dụ ụnu ẹto l'ụmadzu ụkporo l'ẹbo. 
Oshilọkpa Adonikamu dụ ụnu l'ụmadzu ụkporo iri l'ẹto l'ụmadzu ishii. 
Oshilọkpa Biguvayi dụ ụnu ụmadzu ise l'ụmadzu ụkporo labọ l'ụmadzu iri l'ise. 
Oshilọkpa Adinu dụ ụnu l'ụmadzu ụkporo labọ l'iri l'ẹno. 
Oshilọkpa Ateya, bụ iya bụ ndu shi l'eri Hezekáya bẹ dụ ụkporo ẹno l'ụmadzu iri l'ẹsato. 
Oshilọkpa Bezayi dụ ụkporo ụmadzu iri l'ishii l'ụmadzu ẹto. 
Oshilọkpa Jiora dụ ụkporo ise l'ụmadzu iri l'ẹbo. 
Oshilọkpa Hashumu dụ ụkporo iri lẹ nanụ l'ụmadzu ẹto. 
Oshilọkpa Gibaru dụ ụkporo ẹno l'ụmadzu iri l'ise. 
Unwoke, shi lẹ Bẹtulehemu bẹ dụ ụkporo ishii l'ụmadzu ẹto. 
Ndu kẹ Netofa bẹ dụ ụkporo labọ l'ụmadzu iri l'ise. 
Ndu kẹ Anatọtu dụ ụkporo ise l'ụmadzu ẹsato. 
Ndu kẹ Azụmavetu bẹ dụ ụkporo labọ l'ụmadzu labọ. 
Ndu kẹ Kiriyatu-Jiarimu; mẹ Kefira; mẹ Berotu bẹ dụ ụnu l'ụmadzu ụkporo iri l'ẹsaa l'ụmadzu ẹto. 
Ndu kẹ Rama yẹe Geba dụ ụnu l'ụmadzu ụkporo iri lẹ nanụ l'ụmadzu ẹto. 
Ndu kẹ Mikumashi dụ ụkporo ishii l'ụmadzu labọ. 
Ndu kẹ Bẹtelu; mẹ Eyayi dụ ụkporo iri lẹ nanụ l'ụmadzu ẹto. 
Ndu kẹ Nebo dụ ụkporo labọ l'ụmadzu iri l'ẹbo. 
Ndu kẹ Magubishi dụ ụkporo ẹsaa l'ụmadzu iri l'ishii. 
Ndu kẹ Elamu ọphunapho bẹ dụ ụnu ẹto l'ụkporo labọ l'ụmadzu iri l'ẹno. 
Ndu kẹ Harimu dụ ụkporo iri l'ishii. 
Ndu kẹ Lodu; mẹ Hadidi; mẹ Ono bẹ dụ ụnu l'ụmadzu ụkporo iri l'ishii l'ụmadzu ise. 
Ndu kẹ Jieriko dụ ụkporo iri l'ẹsaa l'ụmadzu ise. 
Ndu kẹ Senaa dụ ụnu tete l'ụkporo l'iri. 
A bya lẹ ndu-uke Chileke: Oshilọkpa Jiedaya, bụ iya bụ ndu shi l'ọnu-ụlo ndibe Jieshuwa bẹ dụ ụnu labọ l'ụkporo ẹsato l'ụmadzu iri l'ẹto. 
Oshilọkpa Ima dụ ụnu labọ l'ụkporo iri l'ẹbo l'ụmadzu iri l'ẹbo. 
Oshilọkpa Pashọ dụ ụnu ẹto l'ụkporo labọ l'ụmadzu ẹsaa. 
Oshilọkpa Harimu dụ ụnu labọ l'ụkporo iri l'ụmadzu iri l'ẹsaa. 
A bya lẹ ndu Lívayi: Oshilọkpa Jieshuwa; mẹ Kadụmelu, bụ iya bụ ndu shi l'eri Hodavaya bẹ dụ ụkporo ẹto l'ụmadzu iri l'ẹno. 
A bya lẹ ndu agụje ebvu: Oshilọkpa Asafu bẹ dụ ụkporo ishii l'ụmadzu ẹsato. 
A bya lẹ ndu anọduje eche nche l'ọnu-abata eze-ụlo Chileke: Oshilọkpa Shalumu; mẹ oshilọkpa Ateya; mẹ oshilọkpa Talụmonu; mẹ oshilọkpa Akubu; mẹ oshilọkpa Hatita; mẹ oshilọkpa Shobayi; bẹ tụkoru dụ ụkporo ise l'ụmadzu iri lẹ tete. 
A bya lẹ ndu anọduje eje ozi l'eze-ụlo Chileke bụ: Oshilọkpa Ziha; mẹ oshilọkpa Hasufa; mẹ oshilọkpa Tabayotu; 
mẹ oshilọkpa Kerosu; mẹ oshilọkpa Siyaha; mẹ oshilọkpa Padọnu; 
mẹ oshilọkpa Lebana; mẹ oshilọkpa Hagaba; mẹ oshilọkpa Akubu; 
mẹ oshilọkpa Hagabu; mẹ oshilọkpa Shamụlayi; mẹ oshilọkpa Hananu; 
mẹ oshilọkpa Gidẹlu; mẹ oshilọkpa Gaharu; mẹ oshilọkpa Reyaya; 
mẹ oshilọkpa Rezinu; mẹ oshilọkpa Nekoda; mẹ oshilọkpa Gazamu; 
mẹ oshilọkpa Uza; mẹ oshilọkpa Paseya; mẹ oshilọkpa Besayi; 
mẹ oshilọkpa Asụna; mẹ oshilọkpa Meyuni; mẹ oshilọkpa Nefisimu; 
mẹ oshilọkpa Bakụbuku; mẹ oshilọkpa Hakufa; mẹ oshilọkpa Hahuru; 
mẹ oshilọkpa Bazulutu; mẹ oshilọkpa Mehida; mẹ oshilọkpa Hasha; 
mẹ oshilọkpa Bakọsu; mẹ oshilọkpa Sizera; mẹ oshilọkpa Tema; 
mẹ oshilọkpa Nezaya; mẹ oshilọkpa Hatifa. 
A bya l'oshilọkpa ndu ojozi Sólomọnu bẹ bụ: Oshilọkpa Sotayi; mẹ oshilọkpa Hasofera; mẹ oshilọkpa Peruda; 
mẹ oshilọkpa Jiala; mẹ oshilọkpa Dakọnu; mẹ oshilọkpa Gidẹlu; 
mẹ oshilọkpa Shefataya; mẹ oshilọkpa Hatilu; mẹ oshilọkpa Pokẹretu-Hazebayimu; mẹ oshilọkpa Ami. 
Ndu anọduje eje ozi l'eze-ụlo Chileke g'ẹphe ha; mẹ oshilọkpa ndu ojozi Sólomọnu bẹ dụ ụkporo iri lẹ tete l'ụmadzu iri l'ẹbo. 
Waa ndu ọphu shi lẹ mkpụkpu Tẹlu-Mela; mẹ lẹ mkpụkpu Tẹlu-Hasha; mẹ lẹ mkpụkpu Kerubu; mẹ lẹ mkpụkpu Adanu; mẹ lẹ mkpụkpu Ima lwa bụ ọwana: Ọle ndu ono ta adụdu ike goshi ipfu, ẹphe bụ; mẹ oshilọkpa onye ẹphe bụ; k'ọphu ee-shi nno maru l'ẹphe bụa ndu Ízurẹlu. 
Oshilọkpa Delaya; mẹ oshilọkpa Tobaya; mẹ oshilọkpa Nekoda bẹ dụ ụnu l'ụkporo iri l'ẹbo l'ụmadzu iri l'ẹbo. 
A bya l'oshilọkpa ndu-uke Chileke: oshilọkpa Habaya; mẹ oshilọkpa Hakọzu; mẹ oshilọkpa Bazịlayi; nwoke ono, lụru nwada Bazịlayi kẹ Giladu; a nọdu ekuwa iya rọ ẹpha ala l'ẹpha iya. 
Ndu ono bẹ a chọru ẹpha phẹ l'ẹkwo, e deru g'e gude nwụshia phẹ; ọle a ta hụmaduru ẹpha phẹ l'ẹkwo ono. Ọo ya bụ; e wofu phẹ l'ọnodu ndu-uke Chileke mee phẹ ẹphe bụru ndu aasọ nsọ. 
Ọchi-ọha bya asụ g'ẹphe te tsojeshi ria nri, kakọta adụ nsọ jeye teke onye uke Chileke, e-gude Urimu; waa Tumimu kpata ishi l'ẹka Chipfu. 
Mkpakọ ndu ono, lwarụ nụ ono g'ẹphe ha dụ ụkporo ụnu ise l'ụnu ise l'ụkporo iri l'ẹsato; 
a -gụfukwa ndu-ozi phẹ unwoke; mẹ ụnwanyi. Ndu k'ono dụ ụnu iri l'ẹsato l'ụkporo ishii l'ụmadzu iri l'ẹsaa. Ẹphe nwekwarụpho ndu agụje ebvu, dụ ụkporo iri; ụnwanyi yẹe unwoke. 
Ịnya phẹ dụ ụnu l'ụkporo iri l'ishii; l'ịnya iri l'ishii; ịnya-mulu phẹ dụ ụkporo iri l'ẹbo l'ịnya-mulu ise. 
Ịnya-kamẹlu phẹ dụ ụnu l'ụkporo l'iri l'ise; nkapfụ-ịgara dụ ụnu iri l'ishii l'ụkporo iri l'ishii. 
Ẹphe rwua l'ụlo Chipfu lẹ Jierúsalẹmu; ọ dụru ndu bụgbaa ishi l'ọnu-ụlo l'ọnu-ụlo wotaru iphe, shi phẹ l'obu nụ g'e gude kpụkwaa ụlo Chileke ono g'ọ dụ g'oshi dụ. 
Ẹphe meru g'ike phẹ beru woru mkpọla-ododo, dụ ụkporo ụnu ugbo ẹsaa; l'ụnu iri l'ẹbo; l'ụkporo iri; nụ g'e dobe l'ụlo ẹku, ee-gudeje jee ozi ono; bya anụ mkpọla-ọchaa, dụ ụkporo ụnu ugbo ụkporo l'iri lẹ nanụ; l'ụnu ise; bya anụfua uwe ndu-uke Chileke, dụ ụkporo ise. 
Ndu uke Chileke; mẹ ndu Lívayi; mẹ ụphodu ndu ono; mẹ ndu agụje ebvu; mẹ ndu echeje ọnu-ọguzo nche; mẹ ndu anọduje eje ozi l'eze-ụlo Chileke bẹ buchaa lẹ mkpụkpu nkephẹ. Ndu Ízurẹlu g'ẹphe ha bukwarụpho lẹ mkpụkpu nkephẹ. 
