﻿Ọ́gú.
23.
Belamu sụ Belaku: “Kpụaru mu ọru-ngwẹja ụzo ẹsaa. L'ị kpụtaru mu oke-eswi ẹsaa; waa ebili ẹsaa.” 
Belaku bya emee gẹ Belamu pfuru. Belaku yẹle Belamu gbua oke-eswi; mẹ ebili ono nanụ nanụ l'ọru-ngwẹja ono. 
Belamu sụ Belaku: “Pfụru lẹ mgboru ngwẹja-akpọ-ọku ono gẹ mu kpịribeeshikwaru. G'a maru; ?Chipfu abyapfuta mu? Iphe, bụkpoo iphe, o goshiru mu bẹ mu a-kọru ngu-a.” Ọ tụgbua jeshia l'eli nwubvu, adụdu iphe, dụ iya nụ. 
Chileke byapfuta Belamu. Belamu sụ Chileke: “Mu doziwaru ọru-ngwẹja ụzo ẹsaa; mu gbuwa oke-eswi yẹle ebili nanụ nanụ l'ọru-ngwẹja ono ẹphe n'ẹsaa.” 
Tọbudu iya bụ; Chipfu ye Belamu opfu l'ọnu sụ iya: “Laphu azụ jepfu Belaku je ezia ya ozi-a.” 
O jepfushia Belaku; bya ahụma iya g'ọ pfụru lẹ mgboru ngwẹja-akpọ-ọku ono; yẹle ndu-ishi Mówabu g'ẹphe ha. 
Belamu pfuahaa sụ: “Belaku bẹ byaru eduta mu l'alị Arámu. Eze ndu Mówabu bya eduta mu l'úbvú úbvú ụzo ẹnyanwu-awawa. Ọ sụru gẹ mu bya atụaru iya ụnwu Jiékọpu ọnu; gẹ mu bya epfubyia ụnwu Ízurẹlu. 
?Dẹnu gẹ mu e-shi bya eworu ọnu tụa ndu Chileke atụduru ọnu? ?Dẹnu gẹ mu e-shi pfubyia ndu Chipfu te epfubyiduru? 
Ọo l'eli eze mkpuma bẹ mu anọduje hụma phẹ. Ọ bụru l'eli úbvú bẹ mu anọduje ele phẹ ẹnya; mbụ ndu ono, bu iche ono, adụdu ndu ẹphe l'ẹphe buru ẹghirigha ono. Ẹphe ta agụjeduru onwophẹ yeru ọhozo. 
?Bụ onye bẹ a-dụ ike gụta ụnwu Jiékọpu l'ọgu; mbụ ndu ha g'urwuku, nọ l'alị. Mbụ-a; ?bụ onye a-dụ ike gụta nkeru-ẹno ụnwu Ízurẹlu l'ọgu? Gẹ mu nwụhukwa anwụhu onye pfụberekoto! Gẹ mu lakwaa gẹ ndu pfụberekoto larụ!” 
Belaku sụ Belamu: “?Bụ gụnu bẹ i meru mu ẹgube ono? Mu sụru ngu g'ị bya atụa ndu ọhogu mu ọnu; ọ gbẹ bụru ọnu-ọma bẹ ị gọru nụ phẹ!” 
Belamu sụ: “?Bụ gẹ mu te epfushi iphe, Chipfu yeru mu l'ọnu gẹ mu pfua?” 
Belaku sụ Belamu: “Tsoru mu g'anyi je l'ẹka ọzo, ịi-nọdu hụma phẹ. Ọo aharu bẹ ịi-harụ phẹ hụma; ị tịi hụma-gbudu phẹ g'ẹphe ha. Gbẹ l'ẹka ono tụaru mu phẹ ọnu.” 
Belaku duta Belamu; ẹphe jeshia l'ẹgu mkpụkpu Zofimu, nọ l'eli úbvú Pisiga; ọ kpụa ọru-ngwẹja ụzo ẹsaa. Ẹphe gbushia oke-eswi yẹle ebili nanụ nanụ l'ọru-ngwẹja ono. 
Belamu sụ Belaku: “Pfụkwaru lẹ mgboru ngwẹja-akpọ-ọku ono gẹ mu jepfu Chipfu l'ẹka phọ.” 
Chipfu byapfuta Belamu; bya eye iya opfu l'ọnu sụ iya: “Jepfu Belaku ọzo je ezia ya ozi-a.” 
Belamu bya ejepfu Belaku; hụma iya g'ọ pfụru lẹ mgboru ngwẹja-akpọ-ọku ono; yẹle ndu-ishi Mówabu, yẹe ya tụko nọdu. Belaku sụ Belamu: “?Bụ gụnu bẹ Chipfu pfuru?” 
Belamu pfushiahaa sụ: “Gụbe Belaku; gbalihu agbalihu ngabẹ nchị! Nụma iphe, mu epfu; gụbe nwa Zipo. 
Chileke ta abụkwa nemadzụ; k'ọphu ọo-bya adzụaha ụka. Ọphu ọ bụdu nwa ndiphe; kẹ g'ọ gbanwee uche iya. ?O pfujewaru opfu; ọphu o medụru g'o pfuru? ?O kwejeru ukwe-iphe; g'o to medzu ukwe-iphe ọbu? 
Sụ-a; ekemu, mu natarụ bụkwa gẹ mu gọoru ndu ono ọnu-ọma. Chileke gọwaru ọnu-ọma nụ phẹ. Ọphu mu ta a-dụkwa ike agbanwe iya. 
Ọ tọ dụdu ẹjo-iphe, e levuru l'ẹhu ụnwu Jiékọpu. Ọphu ọ dụdu iphe, ta adụdu ree, ọ hụmaru l'ẹhu ụnwu Ízurẹlu. Chipfu, bụ Chileke phẹ swiru phẹ ọkpobe eswiru. Ẹphe anọduje atụ ụzu l'ọ bụ eze phẹ. 
Chileke bẹ dufutaru phẹ l'alị Ijiputu; bya emee phẹ; ẹphe nweru ọkpehu g'atsụ. 
A ta abyadụ egude oswe keta ụnwu Jiékọpu. Ọphu a byadu e-shi l'ọmamanshi mekata ụnwu Ízurẹlu. Nta-a bẹ ee-pfu opfu ẹhu ụnwu Jiékọpu; pfua opfu ẹhu ụnwu Ízurẹlu sụ: ‘Lewarọ iphe, Chileke megbabẹru!’ 
Sụ-a; ndu Ízurẹlu angụ-lihuje gẹ ne oduma. Ẹphe anọduje ebu nggada g'oduma; mbụ oduma, ta azẹjedu azẹe jasụ l'ọ labushia anụ eriri iya; mbụ jasụ l'ọ ngụa mee-iphe, o guderu.” 
Ọo ya bụ; Belaku sụ Belamu: “Ta atụekwa phẹ ọnu ilile; ọphu ị gọekwaru phẹ ọnu-ọma ililekpọo!” 
Belamu sụ Belaku: “?Mu te epfuduru ngu l'ọo iphe, Chipfu pfuru bẹ mu e-me?” 
Tọbudu iya bụ; Belaku sụ Belamu: “Bya gẹ mu duru ngu je ẹka ọzo. ?G'a maru ọ-dụ Chileke ree g'ị gbẹ l'ẹka ono tụaru mu phẹ ọnu?” 
Belaku duta Belamu; ẹphe nyihu ọnonu úbvú Peyọ; mbụ úbvú ono, nọ chebe iphu l'alị, dabyiru mgbegere. 
Belamu sụ Belaku: “Kpụaru mu ọru-ngwẹja ụzo ẹsaa l'ẹka-a; l'ị kpụtaru mu oke-eswi ẹsaa waa ebili ẹsaa.” 
Belaku mee ya gẹ Belamu sụru g'o mee ya. Ẹphe gbua oke-eswi ono yẹle ebili ono nanụ nanụ l'ọru-ngwẹja ono. 
