﻿Marcos.
4.
As somnitnan si Jesus a mananawo do kanayan. As do kaoyod da aro no nakpeh a omdivon sia am somnakay do asa ka tataya as kapaydisna na as sira o tawotawo sirawri am navidin sa do kanayan awri. 
As nanerbi so parabola do matatarek a nanawo a pinawnonong na dira as kavata na sia, 
“Adngeyen nio ya. Mian o asa ka tawo a nangay a manokos. 
As do tinokos naya am mian o nangay do pananahanan a nia so chinan da no manomanok. 
Mian sa o nagagtos do kabatoan a nia so nakalo a tomovo, 
amna do kakohat no araw am nahayo sa takwan nakayamot sava ya so mapia. 
Mian sa o nangay do kamanolokan a nia so nakalo a madiman do kahonghong dira no pachisohotan dawri as nakasi sava. 
Amna mian sa o natokos do mapia a tana a nia sa so tomnovo kano minsi so mavid. Mian sa o nakasi so tatdo a poho, mian sa o anem a poho as kano yatoyatosen.” 
Do pinakavosan sia ni Jesus am vinata na, “Kapiahen nio o kapanngey nio kano kaintindi nio sia.” 
Do kasirasiran darana kanira no disipolos na sawri kano kadwan sa a omonot sia am inahes da sia o inmonmoan no parabola naya. 
Vatan na sia dira, “Mapia kamo ta ipapanmo dinio o komapet do paypatolan no Dios asna dira do kadwan am panerbian sa so parabola, 
tapian di da voya o tori da tiban as kadi da makaintindian so madngey da, ta tarek sa manehseh as kapakabo do gatos da.” 
Vatan na sia dira, “Ara nio paroava maintindi o akmaya sia a parabola? An di nio maintindi am maypango o kapanmo nio so inmonmoan no parabola ko sa kadwan. 
Niaya o inmonmoan no parabola aya. No nanokos aya am no mapawnonong so Chirin no Dios. 
No natokos sawri do panahanan am irepresenta na sa o makadngey so Chirin no Dios. As do kadngey da sia am nyeng a mawara si Satanas a ompakaro sia dira. 
No nangay awri do kabatoan am irepresenta na sa o masoyot a omrisibi so Chirin aya, 
pero nakatneb ava ya dira so mapia as do kawara no pakasisian kano katetek dira a makayamot do onotan daya am masonong daya tadichokoran. 
As no nangay sawri do kamanolokan am irepresenta na sa o omrisibi so nanawo aya, 
amna makayamot do matatarek a ichalijat da kano kahoho da no kaynakman kano kadwan pa a dira da am katavonan o saray daya as kadi darana makatovoan. 
As no natokos do mapia a tana am irepresenta na o manngey so nanawo aya as kapia no karisibi da sia as kapakatovo da nia a mian so kavoyan sia dira a akma so kapakasi no nimoha aya so tatdo a poho, anem a poho anmana yatoyatosen.” 
Vatan na pa sia, “Pangayen paro o relaken do kawlivan na anmana do ahbo no kama as kadi pangayan sia do pakavoyan nia? 
As arava o tayotayohen a di anti maytotwaw as no atavo a sekreto am mapanmo anti. 
Kapiahen nio o kapanngey nio kano kaintindi nio sia. 
“Makapatak kamo do kaparin no kapanngey nio. No adpang no itoroh nio am nawri pa o adpang no marawat nio as karapa pa anti dia o marawat nio. 
Takwan an sino o manngey as kapanganohed na am mayparakoh o nanawan sia asna sira o dia manngey as kadi da manganohdan am pakarohen pa o ichapatak da.” 
Vinata na pa, “No paypatolan no Dios am akma so asa ka tawo a nanokos. 
Do nakatayoka na manokos am komnaro as kanolay na sia tomovo as tomnovo as kapaypalovo na amna mapanmo nava an maypango ya. 
No tana aya o pakayapoan no yanien, ta tomovo o mohamoha as kayan no kekepen na as kayan dana no asi na. 
As an matwa dana am yanien ya do tiempo no kapanyani.” 
Vinata na dira, “Ango paro maparin a pakomparan sia o paypatolan no Dios. Anmana ango paro parabola a serbien ta a palialitan ta sia ya. 
Maparin ya pakomparahen do asa ka dekey a votoh a nimoha do tana aya. 
Dekey ya amna an tomovo am mayrakorakoh ya a kayo a angayan da no manomanok as kapamarin da dia so otioyan da do yangaw na sa.” 
As aro pa o pinawnonong na dira a pinanahan na do parabola a manda do kaparin da a makaintindi so inmonmoan da nia. 
Fermi parabola o serbien na dira do kaaroan no tawo asna dira do disipolos na am niexplika na o atavo so kapiahen. 
Do mahep no araw awri kanaw am vinata na dira do disipolos na sawri o kapayatovang da. 
As chinaroan da sawri o aro a tawo as kapachivan da sia do falowa as mian pa sa o aro a falowa a nachivan dira. 
Amna narahet o kawan as kapaybebkas na as no sakayan daya am angayan dana no danom, 
amna tori si Jesus a makaycheh do hangnan do mawdi no falowa awri. Niyokay da as kavata da sia dia, “Maistro, madiman ta!” 
Nayokay as kamando na dia o salawsaw as kavata na sia do taaw, “Maypadinak ka na,” as nanyeng dana a mangheteng as kapaypadinak na. 
Vatan na sia dira, “Ango ichamo nio. Ara paroava o saray nio?” 
Oyod sa naychaknin as kavata da sia do kadwan dira, “Sino paro ya ta aran no salawsaw kano abkas am anohdan da!” 
