﻿Proverbo.
22.
An paypipidien ka do kaynakman anmana mapia a kasincharan dimo am pidien mo o mapia a kasincharan dimo. 
Arava o paytadkan no maynakem kano makasiasi, ta mayalit sa ya inmaog no Apo taya. 
No rakoh so pinangtoktoan am makapatak do atavo a mangananawa, pero no di mangtokto am tod a kalo as do kwanasaw am rakoh o kapanehseh na. 
Sincharan mo a aniven o Apo taya as kapamahbo mo tapian mian o kaynakman mo, onor dimo as kano manaro a viay. 
An somnivog mo a ichaddaw o viay mo am paypavawan mo o tolo sa do viay a kahapan da no omonot sa do marahet. 
Paynananawhen mo o asa ka metdeh do mayanong a dadakay tapian an mayrakorakoh sia am kawayakan na sava ya. 
Pakovoten sa no maynakem o makasiasi. An mamohod ka am pakovoten naymo no pinamohoran mo. 
An manokos ka so inanahet kano kapangatatarek am manyani ka so kararayawan mo a nia so pamandan no kapangatetek mo. 
Makadadam ka as kapangatay mo dira do makasiasi, ta no Apo taya o ombendision dimo. 
An paypavawan mo o madaay as omtek nia o mayanong am omhes o paysosobnan kano kaparahet so kadwan. 
Maparin mo a parinyen o patol a kayvan mo do kapakanamonamo mo so viay mo as kapia no ichichirin mo. 
Fermi no Apo taya a paytetneken o kakawyoran do kapavoya na nia o rahet no pavatahen da no maydaydaday. 
Mavidin do sahad no vahay o matalakak. Haman na an kanen no leon anmana maaksidente an mehbet. 
No kapangadwan am asa ka tolo as mahap dia o ipsok no Apo taya. 
Natural do metdeh o kapamarin so marahet, pero an iplotan ya am mananawo ya. 
An regaloan mo sa o maynakem as kapaybentaha mo dira do makasiasi am makasiasi ka anti do kwanasaw. 
Adngeyen mo sa ya, ta nia o vinata da diaken no masosolib a tawo. Kapiahen mo a pachinanawan o vinata da. 
Arava o sehseh mo an kanakmen mo sa ya as kahosto no kapanmo mo sira ya. 
Ichahoho ko o ka no Apo taya no ichasaray mo, dawa ipapanmo ko na sa dimo sichangoriaw. 
Tiya sa o treinta a ka vavatahen a pakahapan ya so mapia a nanawo kano konseho. 
Nanawhen ka pa nia do somnivog a kakawyoran tapian matbay mo sira o mian so iyahes dimo. 
Maybentahe kava do makasiasi a makayamot do kayan no ichaparin mo sia anmana maybentahe kava dira do abo so mapaparin do hosgado. 
No Apo taya o omdefende nira as an sino omatetek dira am no Apo taya o machidiman nira. 
Machikayvan kava dira do oyod a malotod kano masosolien sa, 
ta tarek ka machitaha dira as kadi mo na makabdibdisan dia. 
Maypromisa kava omgarantia so pagan no kadwan, 
ta an di mo ya kapagan am tarek da hapen o aran ichehan mo. 
Abdisen moava o tayongkad no paypandan no propidad a pinangay da no apoapo mo. 
No mapakapia sia patongtongen o trabaho na am mapipia sia kano kaaroan tawo as mayanong sia machisalap do patol. 
