﻿Salmo.
146.
Dadayen o Dios! Dadayen sia so pasivogen do tawol ko. 
Dadayen ko sia mintras maviay ako pa as kapakanta ko so idaday ko sia do kararaw. 
Ichasaray nioava o aran sino a tawo a aran manyokoyokod sa, ta malibri davaynio, 
takwan atavo a tawo am madiman as no atavo a plano da am machipanda an madiman sa. 
Masoyot o tawo a masaray no Dios a iya so somidong kano omlibri sia a iya so Dios da Jacob. Masoyot o machidepende sia. 
Dios o minamaog so hanyit, tana kano taaw as kano atavo a miniminyan da. Iya o Dios a ompatongtong so atavo a promisa na. 
Iya o omdefende sira so pakasisien da sa. Iya o tomoroh so kanen da no mapteng kano omlibri sira so mian do kalaboso. 
Tovatovahen na sira o mavota as kan pagsagsalen na sira o madispresio. Oyod na sa ichaddaw o manganohed sia as manamonamo so viay. 
Onongan na sira o estranghero as kasidong na sira so bioda kanira no nasbang sa asna rarayawen na o plano da sa no makagatogatosen a tawo. 
No Dios o Patol a abo so pandan. No Dios nio do Sion o maypatol a abo so pandan! Dadayen o Dios! 
