﻿Salmo.
142.
Salmo ni David. Tawagan ko o Dios a somidong diaken as machisiasi ako sia. 
Iya o vahyan ko no atavo a reklamo ko kano atavo a problema ko. 
An abo dana o mapaparin ko am iya o makapanmo so mayanong ko a parinyen. Ta do panahanan ko am chitahen da yaken a tolohen no komontra sa diaken. 
An tiban ko do maypadivon am arava o mavoya ko a omonong, somidong anmana omprotekta diaken. 
Imo o tawagan ko a somidong diaken mo Apo, ta imo o pachipelan ko. Mayvoyvoh a imo o ichakey ko do viay ko. 
Adngeyen mo o ipachisiasi koaya dimo as sidongen mo yaken, ta tayto ako oyod a madispresio. Librien mo yaken dira do komontra saya diaken, ta maheheyet sira kaniaken. 
Librien mo yaken do akmaya sia a kavahoran ko tapian masoyot ako anti do panghovokan da no mahosto so kapanganohed dimo a omdaday dimo a makayamot do oyod a rakoh a kapichapian mo diaken. 
