﻿Salmo.
122.
Salmo ni David. Oyod ako a nasoyot no nakavata da sia diaken, “Mangay ta do vahay no Apo taya.” 
As sichangoriaw am tayto ta do kavahayan no Jerusalem, 
do kavahayan aya do Jerusalem a pinayavayo a oyod dana mavid do nakapirwa sia. 
Diaya o kavayavayatan da no atavo a tayabo ni Israel a mamahemahes do Apo taya a akma so mando na. 
Diaya o nayanan da no patol no Israel a manyokoyokod. 
Ipachahoahok nio o karadinepan no Jerusalem as kebendisionay dira do maddaw no Jerusalem. 
Akdawen ko o kayan no karadinepan do kavahayan aya as kayan no proteksion da no palasio na sa. 
Makayamot do kaychayvan ko kano kaliposan ko am vatahen ko do Jerusalem, “Rawaten mo pa o karadinepan!” 
Makayamot do vahay no Apo taya am tayto ko a ipachahoahok o ichapia na. 
