﻿Salmo.
121.
Tangayen ko o katokotokonan saya as kavata ko sia do aktokto ko, “Dino paro o pakayapoan no sidong diaken.” 
Amna no Dios o somidong diaken a iya so minamaog so hanyit kano tana. 
Kanonolay nava anti mo a madodog, ta makaycheh ava o machonong aya dimo. 
Madoho ava anmana makaycheh ava o omonong do Israel. 
No Dios o gwardia mo a fermi a machitangked a omonong dimo. 
Arava o mapaparin dimo do maraw as kano mahep. 
Pavawahen naymo no Dios do atavo a kadelikadoan mo as kavidin na dimo a pachonongan. 
Pachonongan naymo do kakarokaro kano kapayvidi mo a makayapo sichangoriaw as kano maypangay pa abo so pandan. 
