﻿Salmo.
46.
No Dios o pachipelan ta as kano ayet ta. Iya o fermi a handa a somidong diaten. 
Dawa arava o kamoamo ta a aran omlidlid o tana aya as kaloyo da no tokon a iliod do taaw, 
as aran mangyet o abkas a ichalidlid da no tokon. 
Mian o danom a oyogan no kasoyosoyotan do siodad aya no Dios. Niaya a siodad o yanan no vahay no oyod aya mato a Dios. 
Niaya a siodad o yanan no Dios as entero am mararayaw ava anti ta oyod a makalo o kawara no Dios a omlibri sia. 
Magolo sa o nasiones as kalayin da no paypatolan sa as do makapamarin a liak no Dios am matonaw do kamo o tana aya. 
No makapamarin aya a Dios o machangay diaten. No Dios aya ni Jacob o pachipelan ta. 
Tiban nio o pinarin na do tana aya a nia so oyod a paychaknin. 
Iya o mapabhes so kapayarap do mondo aya. Rarayawen na sa o armas as kanamay na sira. 
“Omhes kamo na a mayarap,” kwana no Dios, “as kasinchad nio do kayaken no Dios a mamanito kano atavo a nasiones as maynolay do mondo aya.” 
No makapamarin aya a Dios o machangay diaten. No Dios aya ni Jacob o pachipelan ta. 
