﻿Salmo.
36.
Salmo ni David. Pawnoten no gatos o tawol no makagatogatosen as kadi na sincharan do Dios a iya so mayanong a torohan so anib. 
Mato o iyangay na as kapangay na sia do aktokto na o kadi sia makapanmoan no Dios o mararahet sa a parinyen na. 
No chirin na am maynana marahet kano daday as ara pava o kasolivan na a mamarin so mapia. 
An maypeptad am ari a mayplano so mararahet a parinyen na. No dadakay na am marahet as machivawa ava do mararahet saya a pariparinyen. 
No addaw mo, O Apo ko, as kadi mo a maynyohan a mapatongtong so promisa mo am machipanda ava akma so kadi na machipandan no hanyit kano kademdeman. 
No kahosto no atavo a parinyen mo am mabdibdis ava akma so kadi na makabdibdisan no oyod sa rarakoh a tokotokon. Alit na no kapanhosga mo ta no karahman no kasolivan mo a manhosga am akma so kararahem no karáhman dana no taaw. Mayalit o tawoanmana vinyay am isanga mo sa. 
Oyod a makakniknin, O Dios, o di aya machipanda a addaw mo as do sirong no panid mo o pachipelan namen. 
As pakamiahen mo yamen no itoroh mo diamen a kanen. Akmay omoyog a danom o kapichapian mo a nia so inomen namen. 
Imo o pakayapoan no viay as makayamot do sehdang mo am kasehdangan kami. 
Paypangayen mo o addaw mo nira no sominchad dimo as kapaypangay mo so kapichapian mo dira do manamonamo so viay. 
Piahen mo sava o mahambog a omatetek diaken anmana sira o makagatogatosen a omhomis diaken. 
Do chinadodogan da no makagatogatosen a tawo am kapayvangonan da pava! 
