﻿Salmo.
24.
Salmo ni David. No tana aya am dira no Dios as kano atavo a miniminyan na. Dira na o mondo aya kano atavo sa a maviay diaya, 
ta inamaog na o tana aya a pinaytetnek na a mamanito kano danom kan taaw. 
Sino paro o tanggapen do tokon aya no Dios as sino pa o maparin a somdep do manamonamo aya a templo na. 
Sira o abo so kaparoan do atavo a parinyen da, sira o manamonamo so aktokto, sira o di manganianib so diosdiosan, sira o di maychirin so daday. 
Niaya sa o bendisionan no Dios as ividang na a abo so gatos. 
Niaya sa o sivog a maypasngen do Dios. Sira o mangay a omdaday so Dios aya ni Jacob. 
Iwangan so kapiahen o ayeran as kano pantaw no templo tapian somdep o Patol aya no gloria. 
Sino paro o Patol aya no gloria an dia voken a no Dios a oyod a makapamarin. No Dios a abo so makahomis sia. 
Iwangan so kapiahen o ayeran as kano pantaw no templo tapian somdep o Patol aya no gloria. 
Ta sino paro o Patol aya no gloria an dia voken a no Apohen no atavo. Iya o makapamarin a Patol! 
