﻿Genesis.
5.
Nyaw pakasaritaan dan kapotōtan saw ni Adan. Do nakaparswaw ni Āpo Dyos so tawo, pinarswa naw tawo a akma dya. 
Pinarswa na sa mahakay kan mabakes. Binindisyonan na sa, kan pinangaranan na sas “Tawo.” 
Do nakapagtawen ni Adan so 130, myan pōtot na mahakay a akma dya a pinangaranan nas Set. 
Yapod nakaiyanak ni Set, nabyay pas Adan so 800 a tawen. Myan pa saw kadwan a pōtot na mahahakay kan mababakes. 
Nadiman si Adan do nakapagtawen nas 930. 
Do nakapagtawen ni Set so 105, myan pōtot na a mahakay a si Enos. 
Yapod nakaiyanak ni Enos, nabyay pas Set so 807 a tawen. Myan pa saw kadwan a pōtot na mahahakay kan mababakes. 
Nadiman si Set do nakapagtawen nas 912. 
Do nakapagtawen ni Enos so 90, myan pōtot na a mahakay a si Kenan. 
Yapod nakaiyanak ni Kenan, nabyay pas Enos so 815 a tawen. Myan pa saw kadwan a pōtot na mahahakay kan mababakes. 
Nadiman si Enos do nakapagtawen nas 905. 
Do nakapagtawen ni Kenan so 70, myan pōtot na a mahakay a si Mahalalel. 
Yapod nakaiyanak ni Mahalalel, nabyay pa si Kenan so 840 a tawen. Myan pa saw kadwan a pōtot na mahahakay kan mababakes. 
Nadiman si Kenan do nakapagtawen nas 910. 
Do nakapagtawen ni Mahalalel so 65, myan pōtot na a mahakay a si Jared. 
Yapod nakaiyanak ni Jared, nabyay pa si Mahalalel so 830 a tawen. Myan pa saw kadwan a pōtot na mahahakay kan mababakes. 
Nadiman si Mahalalel do nakapagtawen nas 895. 
Do nakapagtawen ni Jared so 162, myan pōtot na a mahakay a si Enok. 
Yapod nakaiyanak ni Enok, nabyay pas Jared so 800 a tawen. Myan pa saw kadwan a pōtot na mahahakay kan mababakes. 
Nadiman si Jared do nakapagtawen nas 962. 
Do nakapagtawen Enok so 65, myan pōtot na mahakay a si Matosalem. 
Yapod nakaiyanak ni Matosalem, ki nāw ni Enok a intalek byay na di Āpo Dyos do irahem no 300 a tawen. Myan pa saw kadwan a pōtot na mahahakay kan mababakes. 
No bidang no tawen a nakabyay na, ki 365 a tawen. 
Do dawri, maynamot ta nāw na naybibyay a monot do chakey no Dyos, naychihat a abo daw, ta inhap dana ni Āpo Dyos. 
Do nakapagtawen Matosalem so 187, myan pōtot na mahakay a si Lamek. 
Yapod nakaiyanak ni Lamek, nabyay pas Matosalem so 782 a tawen. Myan pa saw kadwan a pōtot na mahahakay kan mababakes. 
Nadiman si Matosalem do nakapagtawen nas 969. 
Do nakapagtawen ni Lamek so 182, myan pōtot na mahakay. 
Pinangaranan nas Noyi, kan binatan Lamek a kāna, “Iyaw nyaya adekey, ki manoroh anchi dyaten so kapangahwahok do marahmet a tarabako ta do tanaya a inabay ni Āpo.” 
Yapod nakaiyanak ni Noyi, nabyay pas Lamek so 595 a tawen. Myan pa saw kadwan a pōtot na mahahakay kan mababakes. 
Nadiman si Lamek do nakapagtawen nas 777. 
Do nakapagtawen ni Noyi so 500, myan pōtot na tatdo a mahahakay: sa Sem, Ham, kan Japet. 
