﻿Zekaráya.
9.
Ọwaa bụ ozi, Ojejoje ziru zitiru alị Hadụraku. Okfu ono a-tukowaru mkpụkpu Damásukọsu l'ishi; kẹ l'ẹnya ndiphe; mẹ ẹnya iphe bụ ndu ọkpa-ikfu Ízurẹlu bụkota lẹ Ojejoje b'a chịru iya doo. 
Okfu ono; bẹ adakwaphu l'ekpu mkpụkpu Hámatu, bụ ndu ẹphe l'ẹphe riru oke; mẹkwaphu mkpụkpu Táya yẹle mkpụkpu Sayịdonu; t'a gụfukwaru l'ẹphe maru iphe ntụmatu. 
Ndu Táya gudeekwa mgbodo tụ-pheta mkpụkpu ẹphe mgburumgburu; kpụshia ya ike. Mkpọla-ọcha b'ọ kụberu; yo byiru l'ọ bụ ẹja; kụbe mkpọla-ododo l'ọ bụ onye kụberu ọzu lẹ mgboro esu-ụzo. 
Obenu lẹ Nnajiufu a-nafụ ẹphe iphe bụ nk'ẹphe; bya enwuru ẹku ẹphe ye l'eze ẹnyimu. Ọku etsua yẹbedua tsufu. 
Ndu Ashikelọnu a-phụ iya; tsụa egvu. Ndu Gáza aphụa ya; talahaa chịchichi l'iphe-ẹhuka. Ọ kwaphụ ẹge ono b'ọo-dụ ndu Ẹ́kuronu; kẹ l'iphe ẹphe shi ele ẹnya iya a-bụru kẹ mmanu. Ndu Gáza; bẹ onye eze ẹphe a-nwụhu; Ashikulọnu abụru ẹke madzụ te ebudu ebubu. 
Ọ bụ ndu alị ọdo e-bu lẹ mkpụkpu Ashudọdu. Ndu kẹ Fílisutiya; bẹ ya eme tẹ ekuku, ẹphe eku onwẹphe kfụshi. 
Ya e-me t'ọnu ẹphe; ba tajẹhe anụ, a gwaru lẹ nte; bya akpashịa ẹphe nri ono, e meruru emeru, nyatsụaru ẹphe l'eze ono. Nwa ndu ọphu phọduru nụ a-bụru kẹ Nchileke ayi; dụ l'ọ bụ ndu ishi l'alị Júda. Ndu Ẹ́kuronu a-bya adụ l'ọ bụ ndu Jebusu. 
Obenu lẹ ndibe iya; bẹ ya a-nọdu alụ-chiru l'ẹka ndu ọgu, adzọ garamu garamu. Ẹ to nwehedu l'o nwekwaduru onye a-bya ọkpapya ndibe iya ishi ọdo; kẹle nta-a; bẹ ya chịwaru ẹnya zia l'ẹke ẹphe nọ. 
Unubẹ ndu Záyọnu! Unu tee ẹswa teshia ya ike; unu gụa egvu ẹhu-ọtso-ẹna; unubẹ ndu Jerúsalemu! Unu lekwa; l'eze unu abyakfutaakwa unu. Ọ bụ onye, doberu ẹka ndoo; l'adzọjekwaphu madzụ. O wozitaru onwiya alị; nọdu l'eli nkakfụ-ịgara l'agba abya; mbụ l'eli nwa nkakfụ-ịgara ọbu. 
Ndu Ífuremu; bẹ ya a-nafụ ụgbo-ịnya ẹphe; nafụkwaphu ndu Jerúsalemu ịnya-ọgu ẹphe. Ụta-ọgu ono; bẹ aa-gbaji. Eze unu a-ra iya arara; tẹ mba yẹle mba ibe iya dụ lẹ mma. Ẹke, ọochi e-shi l'eze ẹnyimu ọwaa daghaa eze ẹnyimu ọphu. Yo shikwaphu lẹ Ẹnyimu Yufurétusu nọo jeye l'ẹke mgboko jeberu. 
“A -bya lẹ nggụbedua; ya e-gude kẹ ndzụ ono, nggu l'iya gude mee gbaa ono; haa ndibe ngu, nọ lẹ mkpọro l'ime iduma ono, mini ẹ-ta nọdu ono; mee ẹphe; ẹphe enweru onwẹphe. 
Unu laphu azụ l'ẹke ono, unu kpụru; yo shihu ike ono; unubẹ ndu mkpọro ono, ẹnya dụ l'ụzo ono! Mbụ lẹ nta-a; bẹ ya arakwa iya arara: lẹ ya a-nụ unu iphe ha l'ọ bụ ọphu unu shi nwehawaru ugbo ẹbo; 
kẹle ya e-woru ndu Júda kwee l'ọ bụ onye, kweru ụta; woru ndu Ífuremu mee; t'ọ bụru akfụ, e gude agba ụta ọbu. Ya a-kpatsu unwoke Záyọnu; t'ẹphe bụru ọgu dakfu ndu kẹ Gurisu. Ya e-me ngu t'ị dụ l'ọ bụ ogu-mbeke, onye ike dụ l'ọgu pa.” 
Ono teke Ojejoje a-bụru pẹe l'ẹke ndibe iya nọ. Akfụ iya ezilahaa pẹremu pẹremu l'ọ bụ ebemu-igwe. Ọkaribe-Kakọta-Nụ a-bya egbua ụpyoku. Yọ bụru oke phẹrephere, shi ụzo ọhuda; bẹ oo-gude eje. 
Ojejoje, bụ Ọkaribe-Kakọta-Ike e-gbochita ẹphe. Ẹphe e-gude mkpuma ụrobo mebyishia iphe; gude iya mekputa ẹphe. Ẹphe a-ngu mẹe; baa l'ọ bụ ndu mẹe tsụru. Ẹphe e-ji ejiji l'ọ bụ ochi, eegudeje ephe mee l'ẹnya-ngwẹja Nchileke. 
Mbọku ono; bẹ Nnajiufu, bụ Nchileke ẹphe a-dzọfuta ẹphe; kẹ l'ẹphe haa l'ịgwe; bụru ndibe iya. Ẹphe a-nọdu acha too l'alị ono l'ọ bụ iphe, e gude dengaa okpu-eze edenga. 
Ọ dụ ugvu; l'ama mma. Iphe, a kọru akọko a-nọdu eme tẹ ụnwu-okorọbya ẹphe nweru ẹku; mẹe ọphungu emekwaphụ tẹ ụnwanyi ẹphe bahụ. 
