﻿Zefanaya.
3.
Nshọo nggụbe mkpụkpu ono, kwefuru Nchileke íkè; mbụ mkpụkpu, merushiru onwiya ono; bụru mkpụkpu, mmegbu dụ! 
Ẹ tọ dụdu onye ọonujeru okfu; to nwe iphe ookweje lẹ ya mesweru. Ẹ to dakobejedu Ojejoje; ọphu ọokpakfubejedu Nchileke iya ntse. 
Ndu ishi, achị mkpụkpu ono anọduje ede ekiri l'ọ bụ agụ. Ẹphe bụ nkụta-ẹgu, ẹ-te nwedu iphe ọo-hajẹ tẹ nchi bọkfu iya. 
Ndu nkfuchiru iya tụko eku onwẹphe ojerima; bya abụkotaru ndu, bụ nwoderu-oye phẹ. Ndu achịjeru ẹphe Nchileke ẹja merushiwaru ẹke, dụru Nchileke lẹ nsọ; bya egude ike dakakọta ekemu Nchileke. 
Ojejoje, bụ onye doberu ẹka ndoo. Ẹ too mejedu iphe dụ ẹji. Mbọku-mbọku; bẹ oomeje t'a maru lẹ ya ekpeje ikpe, dụ maa; ọphu ọ dụdu mbọku, mụtaru amụta, ẹ too mejedu iya. Obenu lẹ ndu ẹ te dobedu ẹka ndoo; bẹ iphere gvụru l'ifu. 
“Ya mewaru tẹ mbakeshi, dụ l'igwe chịhu; bya etsukposhia ụlo-mgbochi, ẹphe gude gbobuta onwẹphe. Ya mewaru ogborogbo-ụzo ẹphe; yọ dakọta nyongu; tọ dụhe ọphu madzụ eshikwadu eshishi. Mkpụkpu ẹphe l'ọ ha; bẹ ẹgbara kfụkotawaru; tọ dụhe onye bu iya nụ. 
Mu abya ekfuru nụ mkpụkpu ono; sụ iya l'ọ tsụfutaje mu egvu; natakwaphu àhụ̀hù, aahụ̀ iya; k'ọphu ẹke ẹphe bu ta bụdu ẹke e mebyishiru emebyishi; m'ọ kwanu tẹ mu shi l'àhụ̀hù, mu a-hụ̀ ẹphe gwaa ẹphe ọchi. Obenu l'iphe anọduje enwu ẹphe ọku l'obu bụ ome mkpako-mkpako l'iphe ẹphe eme ememe.” 
Ọo ya bụ l'ọo iphe Ojejoje ekfu bụ t'unu ngabẹnuru iya jeye mbọku ono, ya e-gbeshi bya agbaa ngu ekebe. Ya kpebuwaru lẹ ya e-kukobe ọha, dụ iche iche l'ẹke lanụ; bya achịkobe alị-eze, dụ iche iche; tụ-koshi ẹphe oke ẹhu-eghughu iya l'ọha. Mbụ l'okopho, ya eko e-tsu mgboko l'ọha l'ọ bụ ọku, enwu enwunwu. 
“Ọ bụ teke ono; bẹ ya e-me tẹ olu ndiphe gua egugu; k'ọphu iphe bụ l'ẹphe ha a-wata ọkpo-ku ẹpha Ojejoje; bya egude obu lanụ balahaaru iya ẹja. 
Ndibe iya ono, anọduje abaru iya ẹja ono; mbụ ndu ono, a tụkashiru nanụ nanụ ono e-shije l'azụ Ẹnyimu Itiyópiya l'egwotaru iya iphe. 
O -rua mbọku ono b'e te emehedu ngu iphe-iphere k'iphe ono, i meru gude kwefuru mu íkè ono; kẹle iphe bụ ndu ono, jiru onwẹphe ẹpho; l'eku onwẹphe ono; bẹ ya e-woshikota l'alị unu. Ọphu unu 'abyadu bya ekubaa onwunu ekuku l'ugvu mu ono, dụ nsọ ono. 
Ndu ya a-haru unu bụ ndu dụ agu; bya ewozita onwẹphe alị; mbụ ndu kpọru obu yeru ẹpha Ojejoje. 
Nwa ndu ono, a-phọdu lẹ Ízurẹlu ono te emehekwa iphe ẹ-te vudodu nhamụnha. Ẹphe ta adzụhedu ẹjo-ire; ọphu ọ dụdu onye anụ ẹphe okfu ẹregede l'ọnu. Ẹphe e-rije nri; laa l'ụlo; tọ dụ onye abya ẹphe oye egvu.” 
Unu gụa egvu ẹhu-ọtso-ẹna; unubẹ ụnwanyi Záyọnu! Unubẹ ndu Ízurẹlu; unu tụa ụzu ẹhu-ọtso-ẹna! T'ẹhu tsọje unu ẹna; unu egude obu unu l'ọ ha tee ẹswa; unubẹ ụnwanyi Jerúsalemu. 
Kẹ l'ikpe ono, Ojejoje shi nma unu ono; b'ọ tukofuwaru unu l'ishi. Ọ chịphuwaru unu ndu ọhogu unu azụ. Ojejoje, bụ eze ndu Ízurẹlu nọkwaa; swiru unu. Ọphu ọ dụdu iphe dụ ẹji, unu atsụkwadu egvu ọdo. 
O -rua mbọku ono; bẹ aa-sụ Jerúsalemu: “Nggụbe Záyọnu; ba atsụkwa egvu! Be ekwekwa t'ẹka tsụa ngu ụme! 
Ojejoje, bụ Nchileke ngu nọkwaa swiru ngu. Ọ bụ onye ike dụ l'ọgu; ọo-dụ ike dzọo ngu! Oo-shi lẹ n-yemobu iya; mee unu ẹka k'iche ọdo! Oo-gude egvu; tee ẹswa l'ẹhu unu.” 
“Mgbamuche k'eswe-iphe unu l'oge iya l'oge iya; bẹ ya e-wofu unu l'obu; kẹ l'ọ bụ unu ivu-ẹra; bya abụru unu iphe-iphere. 
Teke ono rulephu; bẹ ya e-byikwa ndu, akpa unu ẹhu ẹka. Ya a-dzọfuta ndu ngvụru; bya achịkobe iphe bụ ndu e shi chịkaa nanụ nanu. Ya e-me t'a jaa ẹphe ajaja; kwabẹ ẹphe ugvu l'iphe bụkpo alị ono, bụ ẹke shi mee ẹphe iphe-iphere ono. 
O -rua teke ono; bẹ ya a-chịkobe unu. Mbụ l'o -rua teke ono; bẹ ya a-chịlata unu l'ufu. Ya e-mee t'a kwabẹ unu ugvu; jaa unu ajaja l'iphe bụ mbakeshi teke ono, ya e-dophuta unu azụ l'ọnodu unu ono. Ya e-me iya; unu egude ẹnya unu phụ iya.” Ono iphe Ojejoje ekfu ndono.
