﻿Náhumu.
1.
Ọwaa bụ ozi ẹhu mkpụkpu Nínive; ẹkwo e deru àphụ̀, ọ phuru mbụ Náhumu onye Ẹlukoshi. 
Ojejoje bụkwa onye okopho; bụru Nchileke, agwatajẹ ụgwo iphe. Ojejoje bụ onye agwatajẹ ụgwo iphe; bụru onye oke ẹhu-eghughu. Ojejoje emelatajekwa ndu, kpọru iya ashị iphe ẹphe meru iya; l'ewojekwaruphu oke ẹhu-eghughu iya tụ-koshi ndu ọhogu iya. 
Ojejoje bẹ ẹhu t'eghujekwa eghughu ẹgwegwa; bụkwaruphu onye ike iya haa nshinu. Ojejoje ta ahakwa onye ikpe nmaru t'ọ laa kẹ manụ. Ọ bụ oke phẹrephere; mẹ ọku-maa b'o gude tọo ụzo, ooshije; urukpu abụru udzu-ẹja, etsu iya l'ọkpa. 
Ọ bajẹru eze ẹnyimu mba; mee ya t'ọ tahu. Oomeje iphe bụ ẹnyimu l'ọ ha t'ọ tashịhukota. Alị Báshanu me ẹwu, nọ lẹ Ugvu Kamẹlu; bẹ oomeje; yọ nwụa kpaa; ẹge ono kwaphu bẹ oomeje tẹ iru, nọ lẹ Ugvu Lébanọnu nweshia enwenwe. 
Eze ugvu l'ugvu haa anmajẹ jijiji l'ifu ya; ndu ọphu bụ ụnwu ugvu angazeshihu. Mgboko gbaa mgburumgburu; mẹ iphe bụ iphe bu iya nụ anọduje anma furafura l'ifu iya. 
?Bụ onye a-dụ ike vudo iya l'ifu teke iphe eghu iya eghughu. ?Bu onye a-du ike wafụ l'oke ẹhu-eghughu iya? Oke ẹhu-eghughu iya adụje l'ọ bụ onye e kpuru ọku; Mkpuma agbajẹ yọgiriyogiri l'ifu iya. 
Ojejoje dụ mma; bya abụru agbarike madzụ teke onye ọbu nọ l'iphe-ẹhuka. Iphe bụ ndu gbabaru lẹ mkpuli iya je ozeru ndzụ; bẹ ooletaje ẹnya. 
Obekwanu l'oo-gude ẹjo utso mee tẹ ndu Nínive chihu. Ndu ọhogu iya; bẹ ọo-chị chịba l'ẹkpuru-ọchi. 
Iphe bụ ẹjo idzu, ẹphe achịru Ojejoje; bẹ oo-mebyishi; ọphu ndu ọhogu iya 'apalihekwa ishi ọdo kẹ ugbo ẹbo. 
Ọo teke a nmakọru ẹphe l'ọ bụ eri-ogvu; ẹphe angụa mẹe; yọ tsụshia ẹphe atsụtsu; bẹ ọku e-tsu ẹphe ẹge ootsuje ẹkwo akpe ọkponku. 
Ọ bụ lẹ nggụbe Nínive b'o nweru onye lụfutaru nụ; bya awata ọchiri Ojejoje ẹjo idzu; nọdukwaphu lẹ mgbazi t'e mee iphe dụ ẹji. 
Ọwaa iphe Ojejoje ekfu. Ọ sụru: “L'a makwarua l'ẹphe shihuru ike bya adụ l'igwe; ọle ee-me ẹphe t'ẹphe bụru kpurupyata; gvụ. A makwarụa lẹ mu meru unu; unu anọdu l'iphe-ẹhuka; ọle mu te emehedu t'unu jebaa iphe-ẹhuka ọdo. 
Nta-a; bẹ mu a-nyafụ ajaba ono, ẹphe nyabẹru unu l'olu ono; tọfukwaphu unu odogoro ono, ẹphe keru unu ono.” 
Ojejoje tụakwaru ekemu l'okfu ẹhu ngu; sụ: “Lẹ awa ngu a-gvụ; ẹpha ngu ephuhu. Ya e-mebyishi iphe a pyịru apyịpyi; mebyishia ndu ọphu a kpụru akpụkpu dobegbaa l'ụlo agwa ngu. Ya a-tụ ili, ee-li ngu; kẹ l'ị bụ 'ọ-ga-lẹ-mkpa.” 
Lee ẹnya l'eli ugvu ono; phụ ọkpa onye gude ozi-ọma l'abya; mbụ onye ezi ozi-ọma ẹhu-agu. Unubẹ ndu Júda; unu gbaa ajị unu; unu emee iphe unu kweru ụkwa iya. Ishi iya abụru lẹ ndu ẹjo-obu; mbụ ndu Nínive ta abyahẹdu unu ọkpa ẹhu ọdo; kẹ l'ee-me tẹ akọ ẹphe ba adụhe ọdo. 
