﻿Émọsu.
9.
Mu abya aphụa àphụ̀; phụa Ojejoje l'ẹke o vudo l'iku ẹnya-ngwẹja. Yọ sụ: “Chia iphe l'eli ọnungonu itso, gude eze-ụlo-wa; k'ọphu ukfu-ụlo ono a-nma jijiji. Yo zee zepyabe onyemonye ọbule l'ishi. Nwa ndu ọphu phọduru nụ; bẹ ya e-gude ogu-mbeke gbushia. Ẹ tọ dụdu m'ọo onye lanụ anahụ nụ; to nwe onye ọphu agbala nụ. 
Ẹ to nwedu mẹ ẹphe tụru nsụ tụ-rua alị-maa; ya te yedu ẹka l'ẹke ono gụta ẹphe. To nwe mẹ ẹphe nyiru nyirua imigwe; ya te shiru l'ẹke ono lọ-zita ẹphe. 
Ẹ to nwedu mẹ ẹphe jeru je edomishia onwẹphe lẹ Ugvu Kamẹlu; ya ta achịru nta ẹphe chirua ẹke ono je akpụfuta ẹphe. Ẹphe -jee jee m'ọo je edomishia onwẹphe l'ebo eze ẹnyimu; bẹ ya ezilee agwọ; t'o je l'ẹke ono je ataa ẹphe. 
Ẹ to nwedu mẹ ndu ọhogu ẹphe kpụru ẹphe lẹ ndzụ lashịa alị ẹphe; ya te ziru ogu-mbeke t'o je egbushia ẹphe. Ya e-lepyabe ẹphe ẹnya tẹ ya mee ẹphe ẹjo iphe; ẹ tọ bụkwa tẹ ya mee ẹphe ọhuma.” 
Ọ kwa Nnajiufu, bụ Ojejoje; bụru Ọkaribe-Kakọta-Ike: onye bụ; o -denyi eliphe ẹka; yọ ngazehu; iphe bụ ndu, bu iya nụ agụ aphụ; alị-wa l'ọha abya utso l'ọbu Ẹnyimu Náyịlu; e -metsua; yọ dazita l'ọbu nggele alị Íjiputu. 
Ọ kpụshiru ụlo eli iya dobe l'imigwe. Yọ bụru eliphe b'ọ tọru ukfu-ụlo ọphu. Ookuje mini, dọru l'ẹnyimu oku; yọ chịaru iya eliphe mgburumgburu. Ọ kwa Ojejoje bụ ẹpha iya. 
Ọwaa iphe Ojejoje ekfu. Ọ sụru: Unubẹ ndu Ízurẹlu; unu lẹ ndu Kúshi; ?unu ta bụdunua iphe lanụ l'ẹke ya nọ? ?Tọ bụdunua lẹ Íjiputu; bẹ ya jeru je eduta ndu Ízurẹlu; je eduta ndu Fílisutiya l'alị Kafuto; je eduta ndu Áramu l'alị Kíru? 
“Kamẹnu, bụ okfu bụ l'ẹnya Ọkaribe-Kakọta-Nụ nọkwaa l'alị-eze ono, egbe ẹjo iphe dụ ẹge ono eme. Ya e-mebyishikota iya; mee tẹ ọkpu iya kpọhu lẹ mgboko-a. Obenu l'ọnu-ụlo Jékọpu; bẹ ya te emekwa t'ọ gvụ.” Ono iphe Ojejoje ekfu ndono. 
“Kẹle ya a-tụ ekemu. Ya a-yọ ọnu-ụlo Ízurẹlu ayọyo l'iphe bụ mbakeshi. Ya e-ye ẹphe lẹ nkata; yọo ẹphe l'ọ bụ ịsisa. Ọ bụ l'ẹ t'o nwedu akpụru iya m'ọo nanụ e-ru alị. 
Iphe bụ ndu ẹjo iya, nọkota lẹ ndu nke mu a-lakọta l'ogu-mbeke; mbụ iphe bụ ndu ono, anọduje ekfu l'eze iphe-ẹhuka te eshitakwa ẹke ẹphe nọ ono.” 
“O -bee mbọku ono; bẹ ya a-kpukwazi ụlo-ije Dévidi ono, daru adada ono. Ya e-mekwa iphe bụ ẹke o mebyihutsuaru emebyihu; bya emekwazi iya; ẹgbara ta kfụhe iya; mbụ mee ya; yọ dụ ẹge o shi adụjehawa; 
k'ọphu nwa ndu wafụru nụ lẹ ndu Édọmu; yẹle iphe bụ mbakeshi, bụ ndu, eeku ẹpha iya a-bụru òkè-iphe ẹphe.” Ono kwa iphe Ojejoje kfuru; mbụ onye ono, bụ iya e-mekota iphemiphe ọbule ono. 
Ọwaa iphe Ojejoje ekfu: “L'ụboku abyaakwa teke ndu, akpata iphe akpata e-gudekwadu iya-a l'ẹka akpa; ndu ọkori egbe akọwanu iphe. Onye adzọshi akpụru vayịnu anapyabewa nụ onye emebe iphe l'alị ẹka. Mẹe ọphungu e-shitsua l'eli ugvu l'ata paapaa; mbụ shi l'eli ugvu l'atsọ gborogboro. 
Ndibe iya; mbụ ndu Ízurẹlu ono, a kpụru lẹ ndzụ ono; bẹ ya e-dulatakota. Ẹphe a-bya akpụkwazikota mkpụkpu ono, ẹgbara shi kfụa ono; bya ebuchi iya ọdo. Ẹphe a-wata iya ọko mgbo vayịnu; ngụlahaa mẹe, shi iya nụ. Ẹphe agbalahaa mgbabu; rilahaa iphe shi iya nụ. 
Ya a-dzabẹ ndu Ízurẹlu l'alị ẹphe gẹdegede; to nwe l'e fefu ẹphe l'alị ono, ya nụru ẹphe ono.” Ono kwa iphe Ojejoje, bụ Nchileke unu ekfu ndono.
