﻿Émọsu.
8.
Ọwaa iphe Ọkaribe-Kakọta-Nụ koshiru mu: O koshiru mu nkata, akpụru oshi, charu achacha. 
Yọ bya ajị mu: “Émọsu; ?bụ ngụnu; bẹ mu phụru?” Mu asụ iya: “L'ọ kwa nkata akpụru oshi, charu achacha.” Ojejoje asụ mu: “Oge ndibe iya, bụ iya bụ ndu Ízurẹlu chaakwaru. Ya ta ahahẹkwa ẹphe ọdo; tẹ ya ba nụ ẹphe aphụ.” 
Ọwaa iphe Ọkaribe-Kakọta-Nụ ekfu: “O -rua mbọku ono; bẹ egvu, aagụje l'eze-ụlo Nchileke a-bụru ụzu-ẹkwa. Odzu a-dụ l'igwe dabutsuaru l'ẹkemeke ọbule. Ẹkemeke ọbule adaa nyonyoronyongu.” 
Unu nụkwa iphe-a; unubẹ ndu adzọpyashi ndu ẹ-ta dụdu ẹge ọ haru ẹphe ishi; l'eme tẹ ndu ụkpa, bu l'alị unu gvụ. 
Unu asụje onwunu: “?Bụ teke ole; bẹ Ajị Ọnwa Ọphungu agvụnua; k'ọphu ayi a-wata ore akpe? ?Bụ teke ole; bẹ mbọku ọtu-ume a-gvụnua; k'ọphu ayi a-wata ore witu; habọta witu l'ogbonga iya; mee aswa iya; t'ọ ka nshinu; mbụ gude iphe-ụgho l'atụ iphe; gude iya l'eme ndiphe iphuruphuru-ẹnya. 
Ayi egude okpoga zụta ndu ụkpa; gude aswa akpọkpa zụta ndu ẹ-to nwedu ẹge ọ haru ẹphe; mbụ kpota ẹswa witu gwakọbe l'ọkpoberu iya; ree.” 
Ojejoje ono, ndu ikfu Jékọpu gude eku onwẹphe ono riakwaru angụ; sụ: “L'iphe ẹphe meru; bẹ ya ta azahadụ azaha. 
Alị e-gude k'iphe-a nmaa jijiji; ndu, bu iya nụ l'ẹphe ha agụa aphụ. Ọo-dụ l'ọ bụ teke Ẹnyimu Náyịlu byaru utso l'akpa kulakula; o -tselihu; yọ dazita.” 
Ọkaribe-Kakọta-Nụ asụ: “L'o -rua mbọku ono; bẹ ya e-me t'ẹnyanwu nyịhu l'echi oke-eswe; mee; t'eliphe mgburumgburu gbakọta ọchi l'echi-eswe. 
Ajị, unu agbaje; bẹ ya a-gbanwe t'ọ bụru unu nggụmaphu; gbanwee egvu unu t'ọ bụru unu aphụ. Ya e-me unu l'unu ha t'unu kpụshikota ishi; yee uwe-aphụ. Ya e-me oge teke ono t'ọ dụ l'ọ bụ onye ume nwata nwoke lanụ, ọ mụtaru meru. Eswe mbọku ono bya agvụ; bẹ ọo-nọdu atsọ age.” 
Ọkaribe-Kakọta-Nụ asụ: L'oge abyaakwa teke ya e-me t'ẹjo ẹgu bya l'alị-a. Ẹ tọo bụdu ẹgu nri; tọo bụ ẹgu mini. Ọ bụ ẹgu k'okfu Ojejoje. 
Ndiphe a-nọdu aghaphe: ẹphe -shi l'ụzo ẹnyanwu-ahata; ẹphe ejeshia ụzo ẹnyanwu-arịba. Ẹphe -shi l'ụzo isheli; ẹphe ejeshia ụzo ọhuda; l'ẹke ẹphe achọ ẹke ẹphe a-nụ okfu Ojejoje; ọ bụ l'ẹphe t'aphụdu iya. 
“Mbọku ono; bẹ ụnwanyi, charu achacha; mẹ unwokorọbya, gbaru agbagba a-nọdu avẹhu avẹhu; l'ẹke ẹkpiri akpọ ẹphe nkụ. 
Ndu ono, gude ụru-alị kẹ Samériya l'eri angụ; mbụ ndu ono, egudeje: agwa ndu Dánu; mẹ kẹ ndu Besheba l'ekfu; ‘kamẹnu’; ndu ono a-da; ẹphe te egbeshihe ọdo.” 
