﻿Émọsu.
7.
Ọwaa iphe Ọkaribe-Kakọta-Nụ koshiru mu: Mu phụru Ojejoje l'ẹke ọokwakobe igube, a-bya atapyashịa iphe e meberu l'alị, e-fushi ome teke a kpatatsụaru k'ọdungu. K'ọdungu ono bụ ọphu aanụje eze l'ọ bụ iphe ruberu iya nụ. 
Igube ono atafụtsua iphemiphe ọbule, futaru l'alị ono; mu echia mkpu; sụ: “Nggụbe Ọkaribe-Kakọta-Nụ; gụnua nvụ byiko! ?Nanụ ẹge ụnwu Jékọpu e-shi waa; l'ẹphe ẹ-ba ba nwishi!” 
Ọ kwa iya bụ lẹ Ojejoje agbanwee obu iya; sụ: “L'ọwaa ta amụkwa!” 
Ọwaa iphe Ọkaribe-Kakọta-Nụ koshiru mu ndọ-ọ: Ọkaribe-Kakọta-Nụ kuru ndibe iya oku tẹ ya gude ọku, enwu enwunwu kpee ẹphe ikpe. Ọku ono adzụa jeye eze ẹnyimu atashịhu; alị akpọshihu nkụ. 
Tọ dụ iya bụ; mu echia mkpu; sụ: “Ẹka iya l'alị; nggụbe Ọkaribe-Kakọta-Nụ! ?Nanụ ẹge ụnwu Jékọpu e-shi waa; l'ẹphe ẹ-ba ba ishi!” 
Ọ kwa iya bụ lẹ Ojejoje agbanwee obu iya; sụ: “L'ọwaa ta amụkwaphu!” 
Ọwaa iphe o koshiru mu ndọ-ọ: Ojejoje vudo l'iku ụpho-mkpuma. Iphe o gude l'ẹka abụru iphe eegudeje atụ ụpho-mkpuma t'o vudo nhamụnha. Yọ bụru iphe ono b'e gude kpụa ụpho-mkpuma ono. 
Ojejoje abya ajị mu; sụ: “Émọsu; ?bụ ngụnu; bẹ mu phụru?” Mu asụ iya: “L'ọ kwa iphe eegudeje atụ ụpho-mkpuma t'o vudo nhamụnha.” Nnajiufu asụ mu: “Tẹ mu lekwa; lẹ ya e-woru iphe eegudeje atụ ụpho-mkpuma doberu ndu Ízurẹlu. Ya ta ahahẹkwa ẹphe tẹ ya ba nụ ẹphe aphụ. 
“Ẹnya ẹke ono, Áyizaku dobetsuaru ono; bẹ ee-mebyishikota; tsukposhia ẹke ndu Ízurẹlu doberu nsọ. Ya e-je atatso ndibe Jeróbuwamu ọgu.” 
Tọ dụ iya bụ; Amazáya, bụ onye achịjeru Nchileke ẹja, l'agwa iphe lẹ Bẹ́telu abya ezia ozi t'e je ezia Jeróbuwamu, bụ eze ndu Ízurẹlu; sụ iya: “Lẹ Émọsu nọkwa lẹ Ízurẹlu gẹdegede l'achịru ngu ẹjo idzu. Alị ta edzuhekwa omebe iphe emebe emebe. 
Kẹ l'ọ kwa iphe Émọsu ekfu: “ ‘Lẹ Jeróbuwamu lafutaje l'ọgu; to nwe iphe e-me t'ẹ b'a kpụ ndu Ízurẹlu lẹ ndzụ; chịta ẹphe chịfu l'alị ẹphe.’ ” 
Amazáya egbeshi bya ejekfu Émọsu je asụ iya: “Gbeshi l'ẹka-a nggụbe nwọphu àphụ̀! Tụgbua la azụ l'alị Júda; nggu anọdu l'ẹke ono kpatajẹ nri, ii-ri; nggu anọdu l'ẹke ono kfuchijeru Nchileke! 
Ba anọduhekwa lẹ Bẹ́telu; sụ l'i kfuchiru Nchileke; kẹ l'ẹke ono bụkwa ẹke, dụru eze lẹ nsọ; bya abụru ẹke ndu alị-eze ndu Ízurẹlu kpụru eze-ụlo ẹphe.” 
Ya ndono; Émọsu abya asụ Amazáya: “Lẹ ya te shikwa bụru onye nkfuchiru; ọphu ọ bụkwa onye nkfuchiru mụru iya. Ọ kwa onye eche atụru; bẹ ya shi bụru; bya abụru onye akọ sikamo. 
Tọ dụ iya bụ; Ojejoje abya ekua ya l'ẹke ya nọ eche atụru; sụ: ‘Tẹ ya je Ízurẹlu; je ekfuchiaru iya l'ẹke ono.’ 
Nta-a ọwaa; kwa t'i ngabẹ nchị; nụa iphe Ojejoje ekfu. “Ị sụru: ‘Tẹ ya be ekfuchitakwaru Nchileke kfugude Ízurẹlu. Ya ahaa okfu kfugude ndu ọnu-ụlo Áyizaku.’ 
“Ọwaa kwa iphe Ojejoje ekfu: “Ọ sụru: ‘Lẹ nyee ngu e-mekochaa wata ọgba ọkpara. Ụnwegirima ngu ndu k'unwoke; mẹ ndu k'ụnwanyi abụru l'ọgu; bẹ ẹphe a-la. Alị ngu; bẹ ee-gude iphe tọo; kee; nggụbedua l'onwongu abụru l'alị ndu ẹ-ta madu Nchileke; bẹ ịi-nọdu nwụhu. Ndu Ízurẹlu te nwedu iphe ee-me t'ẹ ba akpụ ẹphe lẹ ndzụ; chịta chịfu l'alị ẹphe.’ ” 
