﻿Émọsu.
6.
Aphụ a-tsụkwaru unubẹ ndu akpa ụpha-ẹka lẹ Ugvu Záyọnu; mẹkwaphu unubẹ ndu nọ lẹ Ugvu Samériya l'arị l'ẹ t'o nwehedu iphe adụ ike anyabata unu; mbụ unubẹ ndu a maru amaru, shi lẹ mba, bụ ishi l'iphe bu mbakeshi, bụ ndu ono, ọnu-ụlo Ízurẹlu anọduje ejekfu ono. 
Unu jenu Kalune je aphụ ẹge ọ gbaru! Unu shi l'ẹke ono jeshia Hámatu; mbụ oke mkpụkpu ono! Unu -shi l'ẹke ono; unu ejeshia Gatụ lẹ Filisutayịnu! ?Ẹphe ka alị-eze unu l'ọ ha mma tọo? Alị ẹphe; ?ọ ka nke unu nshinu tọo? 
Unu ewojeru ẹjo ụboku dobe ote-ẹnya; unu ta ama l'ọo ẹge unu eye iya aswa-echile bụ ẹge ọonoduje abya ntse. 
Nshọbukwa ndu azẹje l'oshi-azẹe, e gude eze-enyi memashia. Unu azẹje; rashia onwunu l'oshi-azẹe unu. Nri unu bụ anụ nwatụru, a fọru afọfo; mẹ kẹ nweswi, gbaru ẹba. 
Unu anọduje agụ egoro; l'unu agụ egvu; l'akpọ une eye iya; nwetsuaru ngwa egvu ọphungu l'ọbu Dévidi. 
Iphe unu egudeje angụ mẹe bụ eze abamịda. Yọ bụru manụ, katsụa oshi mkpọ; bẹ unu ajịje. Obenu l'iyi ono, byakfutaru ndu ọnu-ụlo Jósẹfu ono t'erujedu unu l'ẹhu. 
Ọo ya kparu iphe ọ bụ unu; bẹ ee-vuru ụzo kpụa lẹ ndzụ. Ajị ono, unu azẹje rashia onwunu ono akfụshi. 
Ọkaribe-Kakọta-Nụ gudewa onwiya ria angụ; mbụ lẹ Ojejoje ono, bụ Nchileke, bụru Ọkaribe-Kakọta-Ike ono ekfu; sụ: “L'ekuku ono, ụnwu Jékọpu eeku onwẹphe ono; bẹ ya akpọfu akpọfu. Mbụ l'ụlo ụlo ono, ẹphe edomije onwẹphe ono l'ọ ha; bẹ dụkota iya ashị. Ọo ya kparu iphe ya e-woru mkpụkpu-wa; mẹ iphemiphe ọbule, nọ iya nụ ye ndu ọhodo l'ẹka.” 
Ọ -bụru l'ụmadzu iri phọduru l'ụlo lanụ; bẹ ẹphe a-nwụhukwaphu. 
Onye abụbu ẹphe, bụ onye a-kpọshi odzu ẹphe ọku a-bya iya achịshi l'ụlo ono. Oo-ku onye phọduru l'ụlo ono; jị iya m'o nweru onye ya ẹya nọ l'ẹke ono? Onye ọbu a-sụ iya: “Wawa-o!” Yọ sụ iya: “T'o dobelekwaphu ọnu ndoo; t'ẹphe be ejekwa ophota Ojejoje l'ẹpha lẹ phuu!” 
Ishi iya abụru lẹ Ojejoje tụwaru ekemu l'iphe bụ ụlo, ha nshinu; mẹ ndu ọphu, ha nwanshị; bẹ e-tsukposhi etsukposhi. 
Ịnya; ?ọogbaje ọso l'ẹke, dụ mkpuma mkpuma. ?Eegudeje eswi akọ ọkori l'eze ẹnyimu. Obenu l'unu mewaru ikpe, dụ maa; yọ bụru iphe egbu madzụ; bya emee akpụru, odobe-ẹka-ndoo amịje; yọ bụru iphe atsọ age. 
Unu ete ẹswa l'unu lụtaru Lodeba; l'eku onwunu l'ọo ike k'ẹka unu; bẹ unu gude lụta Kanemu? 
Ojejoje, bụ Nchileke; bụru Ọkaribe-Kakọta-Ike l'ekfu; sụru: “Lẹ ya e-je akpatsua mba, a-bya etso unu ọgu; unubẹ ndu ọnu-ụlo Ízurẹlu. Ẹphe e-shi lẹ Lebo-Hámatu hụa unu ishi l'ọku jeye lẹ nsụda Ẹnyimu Jọ́danu.” 
