﻿Émọsu.
2.
Ojejoje sụru: “Lẹ keshinu ndu Móabu chịwaru ẹka ye l'ome iphe dụ ẹji; e -gude ọwaa ekfu; ẹphe eme ọdo eye iya; bẹ ya te eselakwaru ẹphe ẹka azụ l'oke ẹhu-eghughu iya; kẹ l'ọkpu onye eze ndu Édọmu; bẹ ẹphe kpọru ọku; jeye yọ bụru uke. 
Ya e-ye ọku l'alị Móabu; yọ dzụkota iphe bụ ụlo, a kpụru; yo shihu ike lẹ Keriyotu. Ndu Móabu a-gvụ l'ẹke eechi mkpu ọgu; l'eegbu ụpyoku. 
Ya e-gbu onye achị ẹphe; gbua gbua ndu, o yeru l'ishi l'ẹphe ha.” Ono iphe Ojejoje ekfu ndono. 
Ojejoje sụru: “Lẹ keshinu ndu Júda chịwaru ẹka ye l'ome iphe dụ ẹji; e -gude ọwaa ekfu; ẹphe eme ọdo eye iya; bẹ ya te eselakwaru ẹphe ẹka azụ l'oke ẹhu-eghughu iya; kẹ l'ẹphe jịkaru ekemu Ojejoje; jịka ome iphe ọ tọru ọkpa iya sụ t'e tsoje. Ọ bụ ụgho ono, nna ẹphe je etsoru ono; bẹ duphuru ẹphe. 
Ya a-tụ ọku l'ụpho-mkpuma Júda. Yọ dzụkota iphe bụ ụlo, a kpụru; yo shihu ike lẹ Jerúsalemu.” 
Ojejoje sụru: Lẹ keshinu ndu Ízurẹlu chịwaru ẹka ye l'ome ẹjo iphe; e -gude ọwaa ekfu; ẹphe eme ọdo; bẹ ya te eselakwaru ẹphe ẹka azụ l'oke ẹhu-eghughu iya; kẹ l'ẹphe reru ndu doberu ẹka ndoo l'ụgwo, ẹphe ji; bya eree ndu, ẹ taa dụdu ike ọzu m'ọo eri akpọkpa; t'ẹphe gude dochita ụgwo, ẹphe ji ẹphe. 
Ẹphe adzọje ndu ụkpa ọkpa l'ishi; dzọ-mia ẹphe l'evevee. Ndu aakpa ẹhu; bẹ ẹphe te ekpejeduru ikpe, dụ maa. Nna lẹ nwa anọduje ara nwamgbọko lanụ; shi ẹge ono tụrua ẹpha yẹbe Ojejoje ono, dụ nsọ ono. 
Ẹphe azẹtsujee l'iku iphe bụ ẹnya-ngwẹja, dụ iche iche l'eli uwe, e yeru l'itumo. Ẹphe anọduje l'ụlo agwa ẹphe l'angụ mẹe, e retaru lẹ nre. 
Ya mebyishiru ndu Amọru l'ifu ẹphe; mbụ ndu Amọru ọbu, hatsụa ogologo l'ọbu oshi sida; bya eshihu ike l'ọbu akpụrata. Ya mebyishiru nebyi, ọ mịru l'eli; mebyishia ọ́gbaragba iya l'alị. 
“Ya shi l'alị Íjiputu dufuta unu; bya edua unu ụkporo afa labụ l'echi-ẹgu; k'ọphu ya a-nụ unu alị ndu Amọru. 
Ya byakwarụphu bya afọfuta ụnwu unu unwoke t'ẹphe bụru ndu nkfuchiru; bya afọfutakwaphu ụnwu unu ndu k'okorọbya t'ẹphe bụru ndu riburu nte l'ifu Nchileke. Unubẹ ndu Ízurẹlu; ?bụ ẹjo-ire tọo?” Ono iphe Ojejoje ekfu ndono. 
Obenu l'unu meru ndu ono, riburu nte ono; ẹphe angụa mẹe; bya asụ ndu nkfuchiru t'ẹphe be ekfuhe iphe Nchileke ziru ẹphe. 
“Nta-a; bẹ ya a-byaru unu ishi ye l'alị; ẹge ono, ẹpho edejeru ụgbo-ivu lẹ mini teke e doru iya witu ono. 
Ndu ọkpa-ẹgwa ta anahụkwa; to nwe iphe ndu, agburu-ẹhu e-gude agburu-ẹhu ẹphe eme; ọphu ndu mkparawa 'adụkwa ike ọdzo ẹphe ndzụ. 
Ndu, maru ọgba akfụ te ekekwaru ọkpa; ọphu ndu, maru ọgba ọso 'adụkwa ike agbala; ọphu ndu agbaje ịnya 'adụkwaphu ike ọdzo onwẹphe. 
Mbọku ono; bẹ ndu, bụ ọ-ka-mkparawa a-gbakwaru ọtu gbalaa.” Ono iphe Ojejoje ekfu ndono. 
