﻿Jówẹlu.
2.
Unu gbua ụpyoku lẹ Ugvu Záyọnu! Unu echia mkpu-ọgu l'ugvu mu ono, dụ nsọ ono! T'iphe bụ ndu bu l'alị-a nmakwaa kpakpakpa; kẹ l'eswe Ojejoje abyaakwa; mbụ l'o ruakwaru eruru. 
Mbọku ono a-gba ọchi; dụkota gadzụgadzu. Mbọku ono; bẹ urukpu a-phukputa ẹkemeke ọbule; ọchi agbakọta dụdurudu. Ikpoto ndu sọja, ndu ike nọ awụ gidigidi atsọ nyịkunyiku abya l'ọ bụ ọchi nchi-abọhu sakputaru eli eze ugvu; mbụ egbe iya ọphu ta dụbudua keshinu ndiche; ọphu ọ byadụ adụ l'ọgbo ọphu abya nụ. 
Ọku nọ ẹphe l'ụzo ifu l'ekepyashi iphe ekepyashi; nọdu ẹphe l'azụ l'enwu phophopho. Alị, nọ ẹphe l'ifu dụlephu l'ọ bụ mgbabu Ídẹnu; l'ụzo azụ bụ echi-ẹgu, daburu ochobo; tọ dụ iphe anahụje ẹphe anahu. 
Ẹphe gbaru ụgbugba ịnya; l'akfụ karagidingu karagidingu l'ọ bụ ịnya-ọgu. 
Igidi ẹphe dụlephu l'ọ bụ igidi ụgbo-ịnya; l'ẹke ẹphe akfụ gidimu-gidimu l'eli ugvu. Igidi ẹphe dụlephu l'ọ bụ ọda ekperima, ọku adzụ; mbụ l'ọ bụ ikpoto ndu sọja, a chịkoberu ọnu gude eje ọgu. 
Iphe bụ mbakeshi, phụru ẹphe anọduje ata chịchichi. Iphe bụ onye phụru iya nụ alajẹru iya ẹhu iche. 
Ẹphe eshigabeje k'ọgu l'ọ bụ ndu ike ka l'ọgu; l'enyije ụpho-mkpuma l'ọ bụ ndu sọja. Ẹphe akpọje giriri; l'adzọ eje; ọphu ọ dụdu onye ahaje ẹka iya nk'iya; shia ẹka iya ọdo; 
tọ dụ onye akwajẹ ibe iya akwakwa. Onyenọnu akfụjeru jịngu l'adzọ eje. Ẹphe adzọje je adajahu ọgu; ọphu ẹphe ejebedu vudo. 
Ẹphe ezehuje zeba lẹ mkpụkpu; l'enyi ụpho-mkpuma gòdógòdó; nyitsua nyiba l'ime ụlo; shi lẹ windo bahụ l'ụlo l'ọ bụ ndu iphura. 
Mgboko anmakọta ẹphe jijiji l'ifu. Akpamigwe l'anma yikayika. Ẹnyanwu yẹle ọnwa agbakọta ọchi; mkpọ-kpodo ta fụhe. 
Ojejoje nọ ndu sọja iya l'ifu l'ekfu iphe eme nụ; kẹle ndu alụru iya ọgu bụ 'agụta agụta; ẹge ono; bẹ ike dụ ndu, emeje iphe o kfuru. Eswe kẹ Ojejoje bụkwa oke ụboku; dụ egvu. ?Bụ onye ha k'ọkpofu iya l'ifu? 
Ojejoje sụru: “Lẹ nta-a bụlekwaa ẹgwa. Unu gude obu unu l'ọ ha lakfuta iya! Unu swịa aswịswi; gude ẹkwa; daa ẹhu lata!” 
Unu lajaa obu unu; haa ọlaja uwe! Unu lakfuta Ojejoje, bụ Nchileke unu; kẹ l'oomeje eze-iphe-ọma; ẹge ono b'ọ phụje imiko! Ẹhu te eghujedu iya eghughu ẹgwegwa. N-yemobu nk'iya abụru 'o nwe agwụgwu. Ẹge ono b'ẹ tọ tụjedu kparara ome tẹ madzụ jee iphe-ẹhuka. 
?A maru m'ọo-ghakọbe phụaru unu imiko; mbụ gọru ọnu-ọma nụ unu; meeru unu iphe-ọma; mbụ nụ unu nri; mẹ mẹe, unu e-gudeje l'agwa Ojejoje, bụ Nchileke unu. 
Unu gbua ụpyoku ọbu lẹ Ugvu Záyọnu! Unu raa ya arara t'a swịaru Nchileke aswịswi, dụ nsọ! Unu tụa ndzuko, a-dụru Nchileke iche. 
Unu chịkobe ndu Ízurẹlu l'ẹkalanu! Unu emee tẹ ndu, byaru ndzuko ono dụ nsọ! Unu kukobe ndu bụ ọgurenya; unu achịkobe ụnwegirima; mẹ ndu ọphu eechekwadu ẹra! T'onye lụru nwanyi k'ọphungu hakwaa mkpura iya lụfuta; nwanyi, a lụru k'ọphungu ahaa mgbalabụ iya! 
Tẹ ndu, achịjeru Nchileke ẹja, bụ ndu ejeru Ojejoje ozi raa ẹkwa lẹ mgbaku nwụlo, eeshije abahụ l'eze-ụlo Nchileke yẹle ẹnya-ngwẹja. T'ẹphe kfua; sụ: “Nggụbe Ojejoje; phụnuaru ndu nke ngu imiko! Be emekwa tẹ ndu ono, bụ òkè-iphe ngu ono bụru iphe ee-gude eme iphe ọchi! T'ẹphe ba bụ iphe mbakeshi nọnu e-gude atụ mgbọnu. ?Nanụ ẹge ee-me t'a wata okfuru ndu Ízurẹlu: ‘?Bụ awe; bẹ Nchileke unu ọbu nọ?’ ” 
Ono teke Ojejoje a-wata oko okopho l'okfu ẹhu ndu alị ono, bụ ndu nk'iya ono; bya aphụaru ndibe iya imiko. 
Ojejoje eyeeru ẹphe ọnu; sụ: “Ya evutaakwaru unu nri yẹle mẹe ọphungu; mẹ manụ olivu Ya a-nụ iya unu; nụ iya k'etsutsu iya. Ya te emehedu unu t'unu bụru iphe iphe bụ mbakeshi e-gude l'eme ọnu-ọchi. 
Ya a-chị-mihuru unu ndu sọja ono, shi l'ụzo isheli ono achị-mihu; mbụ je achịru ẹphe ye lẹ kpọkpokirikpo alị, ẹ-te nwedu iphe nọ iya nụ. Ọgbo ivuzọ ọgu ẹphe; bẹ ya a-chịru ye l'eze ẹnyimu ụzo ẹnyanwu-ahata; chịru ndu ikperazụ ọgu ẹphe ye l'eze ẹnyimu ụzo ẹnyanwu-arịba. Nshishi odzu ẹphe a-nọdu achị madzụ ọso.” Iyee. Iphe Ojejoje meru pakwaru ẹka. 
Ba atsụshi egvu nggụbe alị Ízurẹlu! T'ẹhu gbe tsọ-chia ngu ẹna; nggu etee ẹswa; kẹle Ojejoje; bẹ mekotawaru iphe ha nshinu. 
Unu ba atsụshi egvu unubẹ anụ, bu l'ẹgbudu; kẹ l'ẹke unu atajẹ nri, nọ l'echi-ẹgu abyawa oruta iru. Oshi abyawa ọmishi nebyi. Oshi figu yẹle vayịnu abyawa ome ike ẹphe. 
Ẹhu tsọje unu ẹna; unubẹ ndu Záyọnu! Unu tee ẹswa Ojejoje, bụ Nchileke unu; kẹ l'ọ chịwaru mini adada ọdungu, bụ iphe o gude agụru unu nvụ. Ọ watawaru ọchishiru unu mini; mbụ ọ chị mini ọdungu; mẹ mini udzu-mini ẹge o shi achịjehawa iya. 
Ẹke, eetsuje witu; bẹ witu e-mekochaa ji. Iphe eeyeje mẹe; bẹ mẹe ọphungu yẹle manụ olivu e-mekochaa ji; l'awụshihu awụshihu. 
“Yẹbe Ojejoje a-kfụa unu ụgwo k'afa olemole ono, igube takọtaru iphe unu ono; mbụ oke igube; igube ndu ọgbo lanụ iya; mẹ ndu k'otsu-dididi iya; mbụ ndu sọja iya ono, ike dụ, ya yeru tụaru unu ono. 
Unu e-nweru iphe unu a-nọdu eri t'ẹpho ji unu; nwee k'etsutsu iya. Obenu l'ọ kwa Ojejoje, bụ Nchileke unu; bẹ unu e-tu ẹpha; mbụ onye ono, meru unu iphe dụ biribiri ono. Ndibe iya; bẹ ya te emehedu iphe-iphere ọdo. 
Teke ono; bẹ unu a-ma lẹ ya nọ-a lẹ Ízurẹlu; maru l'ọ bụ iya bụ Ojejoje, bụ Nchileke unu; l'ẹ tọ dụdu onye ọdo, nọnu. Ọphu iphere 'abyadu bya eme ndu nk'iya ọdo. 
“E -metsua; bẹ ya a-wụta Ume iya; wụshi iphe bụ madzụ. Ụnwu unu ndu k'unwoke; mẹ ndu k'ụnwanyi e-kfuchiru Nchileke; ndu bụ ọgurenya unu a-rọ nrọ; ụnwu-okorọbya unu aphụa àphụ̀. 
Mbọku ono; bẹ ya a-wụkwaphu Ume iya l'ẹhu ndu ozi iya ndu k'unwoke; mẹ ndu k'ụnwanyi. 
Ya e-koshi iphe-ọphulenya l'igwe; koshi iya lẹ mgboko kpamukpamu. Aa-phụ mee yẹle ọku; mẹ ọkpo-tụtutu ẹnwuru-ọku. 
Ee-eme ẹnyanwu; t'ọ gbaa ọchi; mee ọnwa t'ọ bụru mee; tẹmanu yo rua; mbụ oke ụboku Ojejoje ono, a-dụ egvu ono. 
Iphe bụ onye kpọ-kuru ẹpha Ojejoje; bẹ aa-dzọta; kẹle ndzọta a-nọ lẹ Ugvu Záyọnu; mẹ lẹ Jerúsalemu, bụ ẹge Ojejoje kfuru iya. Ndzọta ono a-nọru ndu a-wafụnu, bụ ndu Ojejoje kuru.” 
