﻿Egvu-Aphụ.
2.
Nnajiufu; shiwa l'ẹhu-eghughu iya; gude urukpu kpọ-chia ndu Záyọnu. Eze ùgvù ono, ndu Ízurẹlu shi nweru ono; b'o mewaru; yọ bụru iphe-mmanu. O gudewa ẹhu-eghughu nwuhaa eze-ụlo iya lẹ Jerúsalemu. 
Nnajiufu tanyiru ẹnya mebyishikota ufu ndu Ízurẹlu. O gude ẹhu-eghughu nwutsushia ẹke ndu Júda kpụru; yọ bụru ọkpo-mgbinyiku; O mewaru alị-eze iya; mẹ ndu eze, achị iya nụ; ẹphe adarua alị; nafụ ẹphe ugvu ẹphe. 
O gude oke ẹhu-eghughu; nafụ Ízurẹlu ike iya. O sefuru ẹphe ẹka lẹ ndu ọhogu ẹphe rutaderu. O keru phophopho l'ọ bụ ire-ọku; kepyashia iphe, bụ iphe Jékọpu l'ọ ha. 
Ọ gọberu akfụ iya l'ọ bụ onye ọhogu; gude ẹka-ụtara iya seta iya kẹ jijiji. Iphe bụ ndu, ẹnya eje b'o gbushigeru. Ọ vọtaru oke ẹhu-eghughu iya kpukposhi ndu Záyọnu l'ọ bụ ọku. 
Nnajiufu gbe dụwanu l'ọ bụ ọhogu. O mewaru Ízurẹlu omeliwe; bya emebyishikota ufu-eze iya; kpukpoo iphe, bụ ẹke a kpụru; yọ bụru ọkpo-mgbinyiku lẹ Ízurẹlu. O mewaru t'aphụ; mẹ ẹkwa-aphụ karu ndu Júda. 
Ẹke ayi shi edzukoje abaru iya ẹja; b'o feshiwaru. Ojejoje mewaru; Záyọnu azahashịa eswe-iphe, oomeje; zahaa jeye mẹ mbọku ọtu-ume. O gudewa ẹhu-eghughu; t'ọ dụhe iphe ọ gụberu eze; mẹ onye achịjeru iya ẹja. 
Nnajiufu jịkawaru ẹnya-ngwẹja iya; pawaru ụlo-nsọ iya haa. Ọ hawaru tẹ ndu ọhogu kụkposhikota ụpho-mkpuma ụlo ndu eze lẹ mkpụkpu ono. Ẹphe anọdu l'ụlo Ojejoje tụa okokooko l'ọ bụ mbọku eswe-iphe. 
Ojejoje chị-buwaru iya; lẹ ya e-nwukposhi ụpho-mkpuma, e gude kpụ-pheta Záyọnu mgburumgburu. O gewaru iya ụdo. Ẹ to seladu ẹka azụ jeye; yo mebyishihu. O mewaru tẹ ẹke, a kpụ-shiru ike yẹle ụpho-mkpuma; raa ẹkwa-aphụ. Ẹphe atụko l'ẹphe ha mebyishihukota. 
Ọnu-ọguzo ẹke, eeshije abahụ dashịwaru. Mgbọro-ígwè, eegudeje akpọ-chi ọnu-ọguzo ono; b'ọ nyakwoshiwaru; yọ bụru iyi. Eze, achị iya nụ; mẹ ndu ishi iya b'a kpụkotaru lẹ ndzụ laa iphe, bụ mbakeshi. Ẹ tọ dụhedu ekemu, achị ẹphe. Ndu nkfuchiru Nchileke l'ẹphe ha; bẹ Ojejoje te mejehedu t'ẹphe phụa àphụ̀. 
Iphe bụ ndu bụ ọgurenya ndu Záyọnu gwọshitawaru l'alị; ọnu ta dụhe ẹphe k'okfu. Ẹphe kpowaru ẹja kpua onwẹphe l'ishi; yee uwe-aphụ ẹphe. Ụnwu-mgbọko Jerúsalemu; bẹ fukotawaru kpokongu. 
Mu rawaru ẹkwa; ẹnya ekoshia mu ekoshi. Meji akfụ mu nkfụ; obu l'ete mu egvu; kẹle ndu nke mu b'e gbugewaru. Ụnwegirima nshịi; mẹ ndu e he l'ẹka; bẹ avẹshihu avẹshihu lẹ mbadụzo mkpụkpu. 
Ẹphe anọduje echiru nne ẹphe mkpu nri: mẹ mkpu mẹe l'ẹke m̀bà abyatsua ẹphe atụtu lẹ mbadụzo; l'ọ bụ ndu e mekaru iphe; mbụ l'ẹke ẹphe nọtsua nne ẹphe l'ẹka; l'abya ọtu-bu ume. 
?Bụ ngụnu; bẹ ya e-kfuru ngu? ?Bụ ngụnu; bẹ ya a-tụru ngu yeru; nggụbe Jerúsalemu? ?Bụ ngụnu; bẹ ya a-sụ l'ị bụ oyeru iya? ?Bụ onye b'ọ dụjewaru ẹge ọ dụru ngu; k'ọphu ya e-gude iya dụa ngu ike; nggụbe Záyọnu? Iphe, meru ngu nụ hakwa l'ọ bụ eze ẹnyimu; ?bụ onye e-meghe t'ị ka mma? 
Àphụ̀, ndu nkfuchiru ngu phụru bụ ẹjire; bụru ụgho. Ẹphe te medu t'ẹjo iphe unu vọo; k'ọphu ee-me t'ẹ b'a kpụ unu lẹ ndzụ. Ẹja, ẹphe ziru bụ ẹjire; bụru iphe eduphu madzụ eduphu. 
Iphe bụ ndu esweta esweta akụje ẹka pyongu; nmaa ọtsa; phuphee ishi; sụ: “?Bụnu-a Jerúsalemu ndọ-ọ; mbụ mkpụkpu-a, e shi ekuje ‘Nwọma-mma’: ‘Ẹhu-ọtso-ẹna ndu mgboko l'ophu?’ ” 
Iphe bụ ndu ọhogu ngu ebukota iphu anụ ngu; l'atụpya okpuru-ọswa; avọru ngu eze; l'ekfushi; sụ: “Ayị mewaru; ọkpu ẹphe akpọhu ọbu! Ọ bụ ntanụ; bẹ ayi shikpo chetaru. Nta-a; bẹ ayi nọwa ndzụ phụ ishi iya.” 
Ojejoje bẹ mewaru iphe ọ tụberu. O mewaru iphe ọ sụru lẹ ya e-me, bụ ẹge o kfuru iya teke tehawaruru etete. Ọ tanyiru ẹnya kwatsua ẹphe. O mewaru tẹ ndu ọhogu ngu tụa okokooko kpua ngu. O mewaru ndu ọhogu ngu t'ẹphe ka ngu ike. 
Tẹ ndiphe raku Nnajiufu. Nggụbe ụpho-mkpuma Záyọnu; t'ẹnya-mini wụshikwaa ngu l'ẹnya l'ọ bụ ẹnyimu: eswe l'ẹnyashi! T'ẹ b'ọ dụkwa teke ịi-kwanyaa ẹkwa ono; haa ya; wata ofucha onwongu ẹnya. 
Gbeshi; wata ẹkwa l'ẹnyashi; l'oge teke ono, nche ẹnyashi awatajẹ ono! Tụshihuru Nnajiufu obu ngu l'ọ bụ onye wụshiru mini. Chị-lia ẹka; kpọ-kua ya l'okfu ishi ụnwegirima ngu, m̀bà atụtsua lẹ mbadụzo. 
Byiko Ojejoje; lenua ẹnya phụdudunu. ?Bụ onye bẹ i mejewaru ẹge-a; ?bụ t'ụnwanyi talahaa anụ ụnwegirima ẹphe tọo; mbụ ụnwegirima, angụkwadu ẹphe ẹra? ?Bụ t'e gbushilahaa ndu achịjeru Nchileke ẹja; mẹ ndu nkfuchiru Nchileke l'ụlo-nsọ kẹ Nnajiufu tọo? 
Nwata; mẹ ọgurenya; zẹshiwa lẹ mbadụzo. Ụnwu-okoro; me ụnwu-mgbọko mu phẹ; b'e gbukotawaru lẹ mma. I gbushiru ẹphe teke ẹhu eghu ngu eghughu. I tanyiru ẹnya gbushia ẹphe. 
“Ọ bụ ẹge eekukoje madzụ teke aagba ajị; bụ ẹge i meru iphe eye-egvu; a zaa bya agbaphee mu ẹka labụ. Mbọku, iphe eghu Ojejoje eghughu; b'ẹ tọ dụdu onye nahụru nụ; to dụ onye wafụru nụ. Iphe bụ ndu mu heru hefuta; bẹ ndu ọhogu mu gbugeru.” 
