﻿Jeremáya.
50.
Ọwaa ozi, Ojejoje shi l'ẹka Jeremáya, bụ onye nkfuchiru iya zia l'okfu ẹhu ndu Bábyilọnu; mẹ l'alị ẹphe. 
“Unu raa ya arara radzuru iya iphe bụ mbakeshi t'a nụkota iya! Unu palia ẹkwa-ọhubama; raa ya t'a nụ-dzuru iya! T'ẹ b'ọ dụkwa iphe unu a-ha l'azụ. Iphe unu a-nọdu ekfu bụ: ‘Lẹ ndu Bábyilọnu b'a kpụkwaru lẹ ndzụ. Belu b'e mekwaru iphe-iphere. Ọphu bụ Maruduku; b'e mewaru egvu ye l'ẹhu. Nte ẹphe b'e meekwaru iphe-iphere; bya emewaru egvu ye iphe bụ iphe ono, a kpụru akpụkpu ono l'ẹhu.’ 
Ndu mba, shi l'ụzo isheli byawaru ndu Bábyilọnu ọgu. Oo-me alị ẹphe t'ẹgbara kfụa ya; ọphu ọ dụdu onye ebu iya nụ; madzụ mẹkpo anụmanu a-tụko shi iya gbalashia.” 
“O -rua mbọku ono; bẹ ndu Ízurẹlu yẹle ndu Júda a-tụgbabe; gude ẹnya-mini je achọo Ojejoje, bụ Nchileke ẹphe. Ono iphe Ojejoje ekfu ndono: 
“Ẹphe a-jị ajị ụzo, e shi eje Ugvu Záyọnu; tụgbua; shia ụzo iya onanu. Ẹphe a-bya; ẹphe lẹ Ojejoje atụgba bụru nanụ l'ọgba-ndzụ ojejoje, ẹ ta byadụ bya azaha azaha! 
Ndibe iya dụ l'ọ bụ atụru, tufahuru etufahụ. Yọ bụru ndu eche ẹphe; bẹ dusweru ẹphe ụzo; bya emee ẹphe; ẹphe aghalahaa ngvudangvu l'eli ugvu. Ẹphe etsoru ugvu ugvu l'aghaphe; zahaa ẹke, ẹphe anọduje atụta ume. 
Iphe bụ ndu phụru ẹphe ripyaberu ẹphe. Ndu ọhogu ẹphe asụ: L'ikpe ta nmakwa ẹphe; kẹ l'ẹphe mesweru Ojejoje, bụ ọkpobe onye nche ẹphe; mbụ Ojejoje, bụ onye nna ẹphe oche phẹ tụru obu yeru. 
Unubẹ ndu Ízurẹlu; unu gbafụkwa lẹ Bábyilọnu! Unu lụfulekwaphu l'alị Bábyilọnu kpamukpamu! Unu dụlekwaphu l'ọ bụ mkpi, l'edu igweligwe eghu ndu ọphu. 
Ishi iya abụru lẹ ya a-kpali igweligwe mba, shihuru ike; t'ẹphe tụgbabe ẹka bya etso Bábyilọnu ọgu. Ọ bụ l'ụzo isheli bẹ ya e-shi; bya edokaa onwẹphe; kwabẹru iya. Ọ bụ ẹke ono bẹ ẹphe e-shi bya alụ-gbua ya. Ndu ono bụ ẹphe bụ ishi lẹ kẹ akfụ; nk'ẹphe mbụ akfụ bụ o-je-ta-gba-ẹka. 
Ọo ya bụ lẹ ndu Bábyilọnu; bẹ aa-kwa l'ọkwata. Ndu a-kwa iya l'ọkwata ọbu te nwedu iphe ẹphe, ẹphe a-ha.” Ono iphe Ojejoje ekfu ndono. 
“A makwaru-a l'unu ete ẹswa; ẹhu l'atsọ unu ẹna; mbụ unubẹ ndu ono, vụkaru òkè-iphe iya ono. A makwaru-a l'unu adzọ gidimu gidimu l'ọ bụ nweswi, adzọshi witu; l'ara l'ọ bụ oke ịnya. 
Obenu l'eze obodo unu; bẹ iphere e-mekochaa mee. Mbụ lẹ Bábyilọnu; bẹ ifu e-mekochaa kpua lẹ ntụ. Oo-mekochaa bụru iya; bẹ ẹnya a-katsụa alala l'iphe bụ mbakeshi. Ọo-bụru echi-ẹgu bụru mgbẹgu l'alị-ọkponku; bụru alị-eveve. 
Keshinu ẹhu eghu yẹbe Ojejoje eghughu b'e tee buhedu lẹ Bábyilọnu ọdo. Ọ buchia ochobo; bẹ aa-tọgbo iya; k'ọphu ọo-nyị iphe bụ onye, swetaru l'alị ndu Bábyilọnu ẹdzu; ẹphe egude iya gbalahaa mgbọnu. Iphe a-kpa iya nụ abụru ẹge e mebyishitaru iphe ndu ono. 
Unubẹ ndu agbajẹ akfụ l'unu ha; unu kpọo onwunu; nọ-phee Bábyilọnu mgburumgburu; Unu wata iya ọgba akfụ ono; T'ẹ b'ọ dụkwa ọnu-akfụ unu m'ọo nanụ, unu a-gbaphodo agbaphodo; kẹ l'ọo Ojejoje b'o meru iphe dụ ẹji! 
Unu chia mkpu-ọgu kpua obodo ono ẹka ẹbo-ẹbo! Bábyilọnu; bẹ ike gvụakwaru; ụlo-ngge iya adashịwa! Ụpho-mkpuma, e gude kpuphee ya mgburumgburu; b'e tsukposhiwaru! Keshinu ọ bụ emelata; bẹ Ojejoje emelata iya; unu melata iya iphe o shi emeje! Unu mee ya iphe o shi emeje ndu ọdo! 
Unu be ekwekwa t'o nweru iphe ee-mebe emebe lẹ Bábyilọnu; ọphu unu 'ekwekwa t'o nweru iphe ẹphe a-kpata akpata. Iphe bụ ndu, shi eshishi, bu l'alị ono e-gude ọtsu egvu ndu sọja ono gbalaa; lashia ẹke ẹphe shi. 
Ízurẹlu dụkwa l'ọ bụ atụru, agụ chịkashiru achịkashi. Ọ bụ eze ndu Asiriya; bẹ vuru ụzu bya alụpyaa ẹphe. Eze kẹ ndu Bábyilọnu, bụ iya Nebukadineza abya egwepyaa ọkpu ẹphe.” 
Keshinu ọ bụ ẹge ọ dụ ndono; ọwaa iphe Ojejoje, bụ Ọkaribe-Kakọta-Ike; mbụ Nchileke kẹ ndu Ízurẹlu ekfu: Ọ sụru: “Lẹ ya a-nụ eze ndu Bábyilọnu; mẹ ndu alị iya l'ẹphe ha aphụ; ẹge ono, ya nụru iya eze ndu Asiriya ono. 
Obenu lẹ ndu Ízurẹlu; bẹ ya e-duphuta azụ l'alị-ọma iya. Ẹphe abya erilahaa nri, a kọtaru lẹ Ugvu Kamẹlu; mẹ l'alị Báshanu ọdo; mbụ shi lẹ nri, a kọtaru lẹ ugvu ugvu Ífuremu; yẹle alị Gíledu; rijilahaa ẹpho.” 
O -rulephu mbọku ono; l'oge teke ono gẹdegede bẹ ee-lekpoo ẹnya t'a maru; m'o nweru ẹke ikpe nmaru ndu Ízurẹlu; ọle ẹ tọ dụdu ọphu aachọ-vu. Aa-vọ iphe dụ ẹji ndu Júda nta; vọo ya imo; ọle ẹ tọ dụdu ọphu a phụ. Ishi iya abụru lẹ nwa ndu ono, ya meru t'ẹphe phọdu ono; bẹ ya a-gụru nvụ. Ono iphe Ojejoje ekfu ndono. 
Ọwaa iphe Ojejoje ekfu: Unu je ọgu lẹ Meratayimu; Pekodu! Unu chịa ẹphe; gbufu ẹphe! Unu mekota iphemiphe ọbule, ya sụru unu tẹ unu mee! 
Ẹphu-ọgu aphụakwa l'alị ono; mbụ ẹphu kpurupyata, dụ egvu. 
Bábyilọnu gweru iphe, bụ mbakeshi ogwe uri. Nta-a; bẹ ẹgbara kfụwaru lẹ Bábyilọnu! 
Ya gbabẹru ngu ọnya nggụbe Bábyilọnu; to doo ngu ẹnya. Nta-a; b'ọ nmawaru ngu; kẹ l'ọo Ojejoje bẹ iitso ọgu. 
Ojejoje gụhaakwaru ụlo-ẹku iya ghebe ọnu; bya atụko ngwa-ọgu kẹ oke ẹhu-eghughu iya chịshia; kẹle Nnajiufu, bụ Ojejoje; bya abụru Ọkaribe-Kakọta-Ike nwekwaru iphe ọobya ememe lẹ Bábyilọnu. 
Unu shi ẹke teru ẹnya bya ọgu! Unu gụhashia iphe, bụ ụlo-witi iya; ghebe ọnu! Unu vua ya doo l'ọ bụ ọkwata. Unu mee ya t'ọ gvụ; t'ẹ b'ọ dụkwa onye a-wafụ nụ! 
Unu tụko oke-eswi iya gbushikota! T'a chịkotaru ẹphe je l'ẹke ee-gbushi ẹphe! Nshọo ẹphe; kẹ l'ògè nke ẹphe ruakwaru; mbụ ògè teke, aa-nụ ẹphe aphụ. 
Unu ngabẹkpodaphu nchị nụa olu ndu agba ọso ọgu, bụ ndu shi lẹ Bábyilọnu nahụ; l'agba ala Záyọnu; l'ekfu ẹge Ojejoje, bụ Nchileke ẹphe gwataru ụgwo iphe, e meru eze-ụlo iya. 
Unu kua ndu agbajẹ akfụ t'ẹphe dzukobe tsoo Bábyilọnu ọgu; mbụ iphe bụ ndu maru ẹge eeseje ụta! Unu kpọbe ụlo-ẹ́kwà unu nọ-phee ya mgburumgburu. T'ẹ b'ọ dụkwa m'ọo onye lanụ, a-nahụ nụ! Unu kfụa ya ụgwo iphe o meru! Unu mee ya iphe o meru ndu ọdo; kẹ l'ọo Ojejoje b'o ngeru ọkpa l'ishi; mbụ Onye nsọ kẹ ndu Ízurẹlu. 
Ọo ya bụ; l'iphe bụ ụnwu-okorọbya ẹphe; bẹ ee-gbushikota lẹ mbadụzo; gbushikota ndu sọja ẹphe l'ẹphe ha mbọku ono. Ono iphe Ojejoje ekfu ndono. 
Ọwaa iphe Ojejoje ekfu: “Lekwa; lẹ ya bụakwa ọgu dụru ngu; nggụbe ọphu, eku onwongu ekuku; kẹ l'oge iya nke ngu ruwaru; mbụ oge teke aa-nụ ngu aphụ. 
Onye eku onwiya ekuku; bẹ ụkfu a-dụ l'ọkpa; yọ daa; ọphu ọ dụdu onye a-pali iya nụ. Ya e-ye ọku l'iphe bụ mkpụkpu iya l'ọ ha; ọku, e-tsua tsua iphe bụ iphe nọ l'iku ẹke ono.” 
Ọwaa iphe Ojejoje, bụ Ọkaribe-Kakọta-Ike ekfu: “Lẹ ndu Ízurẹlu; bẹ eemekwa mkpawere. Ọ kwaphụ ẹge ono bẹ eeme iya ndu Júda. Ndu kpụru ẹphe lẹ ndzụ gudeshi ẹphe ike; ọphu ẹphe 'ekwedu t'ẹphe laa. 
Obenu lẹ Onye a-gbafụta ẹphe; bẹ shihuru ike. Ẹpha iya bụ Ojejoje, bụ Ọkaribe-Kakọta-Ike. Ọo-gbaru ẹphe ọdzori; gbashia ya ike; k'ọphu oo-me t'obu rua ndu alị ẹphe alị; mekwanua t'obu be egvuru ndu ọphu bu lẹ Bábyilọnu egvuru. 
Ọwaa iphe Ojejoje ekfu: L'ogu-mbeke a-bụru ọgu nọduru Bábyilọnu; bụru ọgu nọduru ndu bu iya nụ; bụru ọgu nọduru ndu ishi ẹphe; mẹ ndibe ẹphe; ndu ọphu maru iphe! 
Ọgu a-bụru kẹ ndu nkfuchiru ẹphe ono, ẹ-te ekfudu ire-lanụ ono; k'ọphu ẹphe a-bụkotaru ndu eswe. Ọgu a-bụru kẹ ndu sọja ẹphe; k'ọphu ẹphe a-wata ọtsu egvu. 
Ogu-mbeke a-bụru ọgu nọduru ịnya ẹphe; mẹ ụgbo-ịnya ẹphe; mẹ iphe bụ ndu amị, e butaru ebuta, nọ l'ime iya; k'ọphu l'ẹphe ha a-bụkotaru nwanyi. Ogu-mbeke a-bụru ọgu nọduru ụlo-ẹku iya; k'ọphu aa-kwa iphe iya l'ọkwata. 
Ẹjo mkpọ-anwụ a-byaru ẹphe ọgu; mini atashịhukota. Ishi iya abụru l'ọ bụ alị, iphe aagwa agwagwa jiru ejiji. Iphe ono, ẹphe agwa ono eriwa ẹphe ishi. 
Ọo ya bụ l'iphe e-mekochaa buru lẹ Bábyilọnu bụ anụ-ẹgu-ẹgbudu; mẹ a-chị-atabu. Ọ bụ l'ẹke ono; bẹ enyi-nwẹnu e-buru; ọphu 'o nwedu lẹ madzụ ebua ya ebubu ọdo; tsube l'ọgbo sweru ọgbo.” 
Ọwaa iphe Ojejoje ekfu ndọ-ọ: “Ọ kwa ẹge ono, Nchileke mebyishiru Sódomu; Gọmóra; mẹ mkpụkpu, nọ-pheru iya nụ ono bụ ẹge ẹ-tọ dụdu onye e-buru iya nụ; ọphu ọ dụdu onye, byaru bya a-kwata iya ufu buru. 
Unu lenu! O nweru ndu amị, shi l'ụzo isheli abya. Ọ bụ mba, ha nshinu; bya abụru ndu eze, dụ l'igwe b'e jeru je akpalia; ẹphe shi l'ẹke mgboko jeberu l'abya. 
Iphe ẹphe chị bụ akfụ yẹle arwa. Ẹphe nweru ẹjo ọkpoma; ẹphe t'ama iphe bụ obu-imiko. Ekiri, ẹphe ede l'ẹke ẹphe agba ịnya ẹphe abya; ada l'ọ bụ eyii eze ẹnyimu. Ẹphe doru onwẹphe l'ọ bụ ndu nọ l'ọgu; l'abyaru unu ọgu; unubẹ ndu Bábyilọnu!” 
Eze ndu Bábyilọnu nụakwaru akọ ẹphe; ẹka akụda iya. Yọ tsụlahaa egvu; iphe-ememe egude iya; ẹhu ahụlahaa ya ọku l'ọ bụ nwanyi, ime eme. 
Unu lekwa-a! Ọ kwa ẹge agụ, shi l'ọswa, nọ l'iku Ẹnyimu Jọ́danu kwofuta; bya afụaru atụru, dọru l'ọdu-atụru, nri dụ nshinu bụ ẹge ya e-kwo gburumu bya achịfu ndu Bábyilọnu l'alị iya lẹ ntụlukfu. ?Bụ onye bẹ ya fọtaru t'ọ bụru onye ya a-tụ ẹka t'o mee iphe ono? ?Bụ onye dụ l'ọ bụ iya? ?Bụ onye ha kẹ oku iya ikpe? ?Bụ onye bụ onye ono, eche atụru ono, a-dụ ike vudo tẹ yẹle iya mee ono? 
Ọo ya bụ; unu nụkwaa iphe Ojejoje chịru lẹ ya e-me Bábyilọnu; mbụ iphe ọ chịru lẹ ya e-me ndu alị Kalúdiya. Ẹ tọ dụkwa iphe a-kpọshi t'ẹ b'a kpụ ụnwu iya l'ẹphe ha lẹ ndzụ; kpụfu. Ọo-dụ onyemonye biribiri. 
Teke Bábyilọnu daru; bẹ ọo-da too; nmayia mgboko anmayi. Iphe bụ mbakeshi a-nụ ụzu-ẹkwa. 
