﻿Jeremáya.
49.
A -bya l'okfu ẹhu ndu Amọnu; ọwaa bụ iphe ookfu; mbụ Ojejoje: “?Ọ bụ lẹ Ízurẹlu te nwedu ụnwegirima unwoke tọo? ?To nwedu onye e-ri iphe iya tọo? ?Nanụ ẹge e meru; Mólẹ̀ku egbe nata alị ndu Gádu; yọ bụru òkè-iphe iya? ?Nanụ ẹge e meru; ndibe iya abụru lẹ mkpụkpu iya bẹ ẹphe bugbaa?” 
Obenu l'oge abya-a teke ya e-me tẹ ndu Rába, nọ l'alị ndu Amọnu nụa mkpu ọgu. O -rua mbọku ono bẹ Rába a-bụru ikpọzu. Ụnwu mkpụkpu, nọ-pheru iya mgburumgburu etsufukọta l'ọku. Ọo teke ono bẹ ndu Ízurẹlu a-chịfu ndu shi chịfu ẹphebedua. Ono iphe Ojejoje ekfu ndono. 
Unu tụa ụzu-ẹkwa; unubẹ ndu Hẹ́shibonu; kẹle mkpụkpu Eyayi; b'e mebyishiakwaru! Unu chishikwaa mkpu ike; unubẹ ndu bu lẹ Rába! Unu yee uwe-aphụ; gụa aphụ. Unu daa gbigbigbi; gbaru shia ọwaa; gbaru shia ọphu; lẹ mgboromgboro ụpho-mkpuma mkpụkpu unu; kẹle Mólẹ̀ku bẹ aa-kpụkwa lẹ ndzụ laa alị ọdo; yẹle ndu achịjeru Nchileke ẹja, agwajẹ iya nụ; mẹ ndu ishi iya. 
?Nanụ ẹge e meru; unu egude nsụda nsụda alị unu l'eku onwunu; mbụ unubẹ ndu, ẹ te gudedu ire ẹphe ẹka; mbụ unubẹ ndu tụru obu ye l'ẹku unu; l'asashị; l'ẹ to nwedu onye abya unu otso ọgu. 
Ya e-gude ndu bupheru unu mgburumgburu wata unu oye egvu. L'unu ha l'onye l'onye bẹ aa-chịfu achịfu; ọphu ọ dụdu onye a-chị-phuta ndu gbalawaru nụ azụ. Ono kwa iphe Nnajiufu ekfu ndono; mbụ Ojejoje, bụ Ọkaribe-Kakọta-Ike. 
“Ọle ya e-mekochaa dophu ndu Amọnu azụ l'ọnodu ẹphe.” Ono iphe Ojejoje ekfu ndono. 
A -bya l'okfu ẹhu ndu Édọmu; ọwaa kwa iphe ookfu; mbụ Ojejoje, bụ Ọkaribe-Kakọta-Ike kfuru: “?T'o nwehekpodua mmamiphe, phọduru nụ lẹ Témanu tọo? Ọkpobe idzu; ?ọ gvụwaru l'ẹka ndu maru oye ọnu l'okfu tọo? Mmamiphe ẹphe: ?o rehuwaru erehu tọo? 
Unubẹ ndu bu lẹ Dedanu; unu ghakọbe gbalaa! Unu gbalaa je edomia onwunu l'ime ẹnu; kẹle ya gudekwa iyi l'abyakfuta ndu eri Ị́so teke ya a-bya ẹphe ọnu aphụ-a. 
Ndu awọ akpụru vayịnu byakfuta ngu; ?ẹphe ta awọ-phododuru ngu tọo? Ndu iphura -bya nke ngu l'ẹnyashi; ?tọ bụdu iphe dụ ẹphe mma bẹ ẹphe e-wota? 
Obenu lẹ ndu eri Ị́so; bẹ ya gbabẹwaru ọtu. Ẹke ono, ẹphe shi edomishije onwẹphe ono bẹ ya kpuhawaru ghebe ọnu; k'ọphu ẹphe te edomikotahedu onwẹphe. Ụnwegirima ẹphe; mẹ ndu abụbu ẹphe; mẹ obutobu ẹphe lakọtaakwaru l'iyi. Ẹphebedua achịhukwaphu. 
Unu haaru iya ụnwu unu ndu ọphu a tọru ogbe; ya e-letaa ẹphe ẹnya. T'unyomu unu ndu ọphu maa tụfuru chịru ụkfu kwẹe ya!” 
“Ọ -bụru lẹ ndu ẹ-te nwedu iphe ẹphe meru b'a hụ̀rù àhụ̀hù; ?bụ ngụnu a-kpata t'a haa unu t'ẹ b'a àhụ̀ unu àhụ̀hù? Ẹ taa hakwa unu t'ẹ ba nụ unu aphụ. Unu tafụtaje aphụphu, gbaru unu; 
kẹ l'agha; ya gudeekwa onwiya ria nte lẹ mkpụkpu Bọzura e-mekochaa bụru ikpọzu; bụru iphe aakpọ-yiru ukuvu. Mbụ l'ẹgbara a-kfụ iya; yọ bụru iphe eegude akọ l'ọnu. Iphe bụ mkpụkpu, nọkota l'alị ndu Édọmu a-bụkotaru ikpọzu gbururu jeye lẹ gbururu. Ono kwa iphe yẹbe Ojejoje kfuru ndono.” 
Ya nụkwaru ozi, Ojejoje ziru. Onye ozi bẹ e ziru t'o jekfu iphe bụ mbakeshi; je asụ ẹphe t'ẹphe dzukobekwa onwẹphe byaru ndu Édọmu ọgu; mbụ t'ẹphe gbalihukwa jeshia ọgu! 
Kẹle ya mewaru; unu aha nwanshị l'iphe bụ mbakeshi; ọphu ọ dụdu iphe ndiphe gụberu unu. 
Ọ kwa egvu, unu shi eyeje ndu ọdo; yẹle ekuku, unu eku onwunu bẹ duphuru unu; mbụ unubẹ ndu ono, bu l'ime ọgba-mkpuma ono; onye bu l'ẹke ugvu kakọta l'eli. Ẹ tọ dụkwa m'o -ruhuru; unu je akpaa ẹkfuna unu l'ephekerephe ephekerephe l'ọ bu ugo; bẹ ya e-shikwa l'ẹke ono mee tẹ unu daa. Ono iphe Ojejoje ekfu ndono. 
“Ndu Édọmu e -mekochakwaa bụru iphe aakpọ-yiru ukuvu. Iphe bụ ndu swetaru ẹke ono; bẹ ishi anyị ẹdzu. Ẹphe egude ẹphe gbalahaa mgbọnu. Ishi iya abụru eze iphe-ẹhuka ono, a-dakfu ẹphe ono. 
Ọo ẹge ono, e mebyishiru Sódomu mẹ Gọmóra; bya emebyishia mkpụkpu ndu ọphu, nọ-pheru iya mgburumgburu ono. Ono kwa ẹge ẹ tọ dụdu onye e-bu l'alị ndu Édọmu; ọphu ọ dụdu onye a-kwata iya ufu.” Ono kwa iphe yẹbe Ojejoje kfuru ndono. 
“Ọ kwa ẹge agụ shi l'ọswa, nọ l'iku Ẹnyimu Jọ́danu kwofuta; bya etsoru atụru, dọru l'ọdu-atụru, nri dụ nshinu bụkwaphu ẹge ya e-kwo gburumu je atụ ndu Édọmu l'ụkfu; chịfu ẹphe l'alị iya. ?Bụ onye bẹ ya fọtaru t'ọ bụru onye ya a-tụ ẹka t'o mee iphe ono? ?Bụ onye dụ ẹge ya dụ? ?Bụ onye a-dụ ike kẹ oku iya ikpe? ?Bụ onye bụ onye eche atụru, a-dụ ike kfụru tẹ yẹle iya mee?” 
Ọo ya bụ; t'unu nụkwaa iphe Ojejoje chị-buwaru lẹ ya e-me ndu Édọmu; mbụ iphe ọ chịru lẹ ya e-me ndu bu lẹ Témanu. Ẹ tọ dụdu iphe a-kpọshi t'ẹ b'a kpụta ụnwu ẹphe kpụfu; Ọ bụ iphe a-dụ ụnwu ẹphe ono biribiri. 
Teke Édọmu a-da bẹ ụkporo iya anmajikwa mgboko anmaji. Ẹkwa, ẹphe a-nọdu ara; bẹ aa-nọdu lẹ Eze Ẹnyimu Uswe anụ. 
Unu lenu! Ndu etso Bọzura ọgu a-bya l'ọ bụ egbe-nwọku; gbasaa ẹ́bà iya agbasa. Mbọku ono bẹ obu a-yọshihu ndu sọja Édọmu l'ọ bu nwanyi, ime eme. 
A -bya l'okfu ẹhu ndu Damásukọsu; “Ndu Hámatu yẹle ndu Apadu b'e kpuakwaru ifu lẹ ntụ; kẹ l'ẹphe nụwaru ẹjo nzi. Meji tọfuwaru ẹphe. Ọkpoma akfụwa ẹphe gbúdugbúdu l'ọ bụ eze ẹnyimu, a swọngaru aswọnga. 
Ndu Damásukọsu; bẹ ẹka kụshihuwaru. Ẹphe ghakọbekwaru; l'agbalawa agbala. Meji tọfuakwaru ẹphe. Ẹjo iphe-ẹhuka egudeshiwa ẹphe l'ọ bụ nwanyi, ime eme. 
?Nanụ ẹge e meru; b'e gbe gwọbe mkpụkpu ono, a maru amaru ono? Mbụ mkpụkpu ono, ama mma ono? 
Ọo ya bụ l'ụnwu-okorọbya ẹphe; bẹ aa-nọdu egbushi l'echi mbadụzo. Ndu sọja ẹphe l'ẹphe ha; bẹ a-gvụ nụ mbọku ono. Ono iphe yẹbe Ojejoje, bụ Ọkaribe-Kakọta-Ike ekfu ndono. 
“Ya a-tụ ọku l'ụpho-mkpuma Damásukọsu; yo tsua ufu-eze ndu Bénu-Hadadu kpụru kpụshia ike.” 
A -bya l'okfu ẹhu ndu Kéda yẹle alị-eze ndu Házọ, bụ ọphu Nebukadineza, bụ eze ndu Bábyilọnu lụ-kputaru; ọwaa kwa iphe o kfuru; mbụ Ojejoje, bụ Ọkaribe-Kakọta-Ike: “Unu zelihu tsoo ndu Kéda ọgu; unu emebyishia ndu shi ụzo ẹnyanwu-ahata! 
Ụlo-ẹ́kwà ẹphe; jeye l'iphe bụ elu ẹphe l'ọ ha; bẹ unu e-rutakota. Ẹkwa, ẹphe egudeje gechia ụlo-ẹ́kwà ẹphe; mẹ iphe bụ iphe ẹphe nweru enweru; jeyekpo l'ịnya-ivu ẹphe bẹ aa-chịtakota. Ndiphe a-nọdu echi mkpu l'ekpu ẹphe: ‘Lẹ ụmuruku amụkwa l'ẹkemeke.’ 
Ọwaa iphe Ojejoje ekfu: Unu gbalakwaa agbala; unubẹ ndu Házọ. Unu jekwa je edomishia onwunu l'ime ime ọgba; kẹle Nebukadineza, bụ eze ndu Bábyilọnu chịakwaru unu ẹjo idzu; kpebuwaa iphe ya e-me ẹphe; sụ: 
t'ẹphe wụ-lihu je etso ndu mba ono, tụsaru ẹhu ono ọgu; mbụ mba ono, ẹ-ta adụdu onye ẹphe atsụ egvu ono; ẹphe te nwedu ọguzo; m'ọ bụ ụpho-igwe ono; mbụ ndu ono bulephu jaherengu ono.” 
Ịnya-kamẹlu ẹphe; bẹ aa-kwa l'ọkwata. Elu ẹphe; bẹ aa-lụtakwaphu l'ọgu. Iphe bụ ọha, bu ote-ẹnya; bẹ ya a-tụkashi nanụ nanụ. Ya e-shi l'ụzo, dụ iche iche mee tẹ oke iphe-ẹhuka dakfuta ẹphe. 
“Mkpụkpu Házọ l'e-mekochaa bụru ẹke nkụta-ọswa a-dọjeru; kẹ l'ẹgbara a-kfụ iya gbururu jeye. Ẹ tọ dụdu onye e-bu l'ẹke ono; to nwe nwoke, eje iya ọkwata ufu.” 
Ọwaa iphe Ojejoje kfuru Jeremáya onye nkfuchiru l'okfu ẹhu ndu Élamu. Teke o kfuru iya ẹya bụ lẹ ntso-l'ọhu teke Zedekaya wataru ọbu eze ndu Júda. 
Ojejoje, bụ Ọkaribe-Kakọta-Ike asụ t'ẹphe lekwa; lẹ ya e-gbukwa iphe bụ ndu agbajẹru ndu Élamu akfụ; bụ iya bụ ndu ono, bụ ike ẹphe ono. 
Ya e-me tẹ phẹrephere, shigbaa ẹke, dụ iche iche bya ephee lẹ Élamu. Ya a-chịko ẹphe tụkashia l'ẹke, dụ iche iche; k'ọphu ẹ-tọ dụdu ẹke ndu Élamu ẹ-ta agbatsudua ọso ọgu laa. 
Ya a-tụkashi ndu Élamu nanụ nanụ l'ifu ndu ọhogu ẹphe; mbụ l'ifu ndu achọ ishi ẹphe. Ya e-me t'iphe dụ ẹji dakfu ẹphe; shi iya tụ-koshi ẹphe oke ẹhu-eghughu iya. Ono iphe Ojejoje ekfu ndono. Ya e-me t'e gude ogu-mbeke l'achị ẹphe jeye teke ya e-me t'ẹphe ba nọhe. 
Ya e-je egvube aba-eze iya bụ l'alị ndu Élamu; mebyishia ndu eze ẹphe; mẹ ndu bụ ishi ẹphe. Ono iphe Ojejoje ekfu ndono. 
Ọle ya e-mekochaa dophu ndu Élamu azụ l'ọnodu ẹphe; m'o rulephu l'oge l'ifu. Ono iphe Ojejoje ekfu ndono. 
