﻿Jeremáya.
48.
A -bya l'okfu ẹhu ndu Móabu; ọwaa iphe Ojejoje, bụ Ọkaribe-Kakọta-Ike; mbụ Nchileke kẹ ndu Ízurẹlu kfuru: Tẹ aphụ tsọkwa Nebo; kẹ l'e meru iya; yọ bụru kpurupyata. Ndu Kiriyatayimu; b'e meru iphe-iphere; bya akpụa ẹphe lẹ ndzụ. A-gbabe-a-dzụru; b'e mewaru iphe-iphere nụ; gwee ya egwegwe. 
Ẹ ta ajahẹdu ndu Móabu ajaja. Ọ bụ lẹ Hẹ́shibonu; b'a nọdu chịaru ẹphe ẹjo idzu: t'ẹphe mee t'ẹphe chịhu. Unubẹdua kwaphụ; unubẹ ndu Madumenu; bẹ ee-mekochaa laa l'iyi. Ọ bụ ọgu e-mekochaachịa unu ẹjo ọso. 
Unu ngabẹkpoduaphu nchị nụa mkpu, eechi lẹ Horonayimu; mkpu oke iphe-ẹhuka; mẹ mkpaka. 
Ndu Móabu b'e mebyishiwaru. Ngabẹduduphu nchị l'ẹkwa, ụnwegirima ẹphe ara. 
Ẹphe a-wụru laa l'ụzo iya kẹ Luhiti; l'akwa ntụmatu eje atụgbu. Lẹ mgbazita ụzo iya kẹ Horonayimu b'a nụru mkpu, eechi kẹ iphe ono, lakọtaru l'iyi ono. 
Unu gbalaa! Unu gbaa ọso ndzụ unu! Unu gbaa l'ọ bụ nkakfụ-ịgara echi-ẹgu! 
Keshinu unu kpọru obu ye l'iphe unu adụje ike mee; mẹe l'ẹku unu bẹ aa-kpụfukwaa unubẹdua lẹ ndzụ. Agwa unu; mbụ Kemọshu; bẹ aa-kpụkwaphu lẹ ndzụ; yẹle ndu achịjeru Nchileke ẹja, agwajẹ iya nụ; mẹ ndu ishi iya. 
Ndu mgbugbu-madzụ a-bya l'iphe bụ mkpụkpu nọnu; ọphu o nwedu m'ọo mkpụkpu lanụ, a-nahụ nụ. Iphe bụ nsụda a-bụru kpurupyata. Iphe bụ obosara alị abụru iyi. Ono iphe Ojejoje ekfu ndono. 
T'a chọoru ndu Móabu ébà; k'ọphu ẹphe e-phelihu phefu. Iphe bụ mkpụkpu, nọ lẹ Móabu bẹ ẹgbara a-kfụ. Ẹ tọ dụdu m'ọo onye lanụ, e-bu iya nụ. 
Onye a tụru ọnu b'ọ bụ; mbụ onye gude ẹregede ejeru Ojejoje ozi! Onye a tụru ọnu b'ọ bụ; mbụ onye te gudedu nkogo iya l'egbu ọchi! 
Keshinukpo bẹ ndu Móabu nọkpelephu; tụsaru ẹhu l'ọ bụ ọhu-mẹe, dọru l'ite. Ọphu a wụ-phedu iya awụ-phe l'ite; kẹ l'ẹ ta akpụbua ẹphe lẹ ndzụ laa alị ọdo. Ọo ya meru iphe ọtso-ẹna ya dụkwadu ẹge ọodu; ọphu mkpọ iya 'eshibuhudu eshibuhu. 
Ọwaa iphe Ojejoje ekfu: L'oge abyakwa teke ya e-ye ndu awụ-phe mẹe l'ite. Ẹphe a-wụfuta ndu Móabu l'ite ono, ẹphe dọru ono; woru ite ono, o shi dọru ono kụkposhia. 
Ono bụ teke iphere agwa, bụ Kemọshu e-gude ndu Móabu; ẹge ono, iphere agwa Bẹ́telu guderu ndu Ízurẹlu; kẹ l'ẹphe shi chịru obu tukobe iya ono. 
“?Nanu ẹge unu e-shi sụ l'unu bụ mkparawa; l'unu bụ ndu ike-ka-l'ọgu? 
Onye abya ogbufu Móabu yẹle mkpụkpu, nọgbaa ya nụ; bẹ nọokwaa anọno. Unwoke ẹphe, bụ ndu ọphu gbaru mkparawa; bẹ ee-gbu ẹge eegbuje anụ.” Ọo mbẹdua bụ Eze; mbụ Ojejoje, bụru Ọkaribe-Kakọta-Ike ono. 
Teke ndu Móabu a-la l'iyi dụakwa ntse. Eze iphe-ẹhuka a-dakfukwa ẹphe ẹgwegwa. 
Unu rakwaa ẹkwa ẹphe; unubẹ ndu unu l'ẹphe bu obutobu! Mbụ unubẹ ndu maru ẹpha ẹphe. Unu sụ ẹphe: “?T'e lewaru ẹge obodo ono, shihuru ike ono meru echikahu; t'e lewaru ẹge ùgvù iya ono ghọru akọ-ife.” 
Unubẹ ndu bu lẹ Díbọnu; unu shinu l'ọnodu oke amadụ ono, unu nọ ono nyizita bya anọdu l'alị, dụ kakpọro-kakpọro; kẹle onye gbufuru ndu Móabu e-gbufukwaphu unu; mbụ gwepyakota mkpụkpu unu ono, a kpụshitsuaru ike ono. 
Unubẹ ndu Árowa; unu vudokpoduaphu l'iku esu-ụzo lee ẹnya! Unu jịa unwoke; mẹ ụnwanyi, agbala agbala. Unu jịa ẹphe iphe meru nụ. 
Ndu Móabu b'e meekwaru iphe-iphere kpua; kẹ l'ẹphe gvụakwaru. Unu raa ẹkwa anwụhu; rashia ya ike! Unu raa ya arara lẹ Ẹnyimu Amọ́nu lẹ Móabu; b'e mebyishiwaru! 
Ndu bu l'alị, daburu adaburu; bẹ ikpe gudeekwaru; mbụ ndu Holọnu; ndu Jahuza; ndu Mefatu; 
ndu Díbọnu; ndu Nebo; ndu Bẹ́tu-Dibulatayimu; 
ndu Kiriyatayimu; ndu Bẹ́tu-Gamulu; ndu Bẹ́tu-Meyonu; 
ndu Keriyotu; ndu Bọzura. Ọ dakfukotakwaruphu mkpụkpu lẹ mkpụkpu ndu Móabu l'ẹphe ha: ndu ọphu bu l'ẹke teru ẹnya; mẹ ndu ọphu bu l'ẹke dụ ntse. 
Ike ndu Móabu bẹ e chikwashiakwaru; mbụ chikwoshiwa iya ẹka. Ono iphe Ojejoje ekfu ndono. 
“Unu chee ya mẹe; k'ọphu oo-gude iya; kẹ l'ọo Ojejoje bẹ o ngeru ọkpa l'ishi. Tẹ ndu Móabu watanụ ori ẹgbo, ẹphe gbọru; t'ẹphe bụru iphe ee-gude agba mgbọnu. 
Ndu Móabu shi egudeje ndu Ízurẹlu l'agba mgbọnu? ?E guderu ndu Ízurẹlu l'ẹke ẹphe ezi oshi tọo; meru iphe e shi egudeje ẹphe ekwe nda-werere; teke unu ekfu okfu ẹhu ẹphe? 
Unubẹ ndu Móabu! Unu hatsụa mkpụkpu unu je eburu l'iku iku agbara-mkpuma; Unu je adụ l'ọ bụ kparakobe, bụ l'ọnu ọgba; bẹ ọokpaje ẹkfuna iya! 
Ẹphe nụakwaru ẹge ndu Móabu gude l'ekube onwẹphe. Mbụ l'ẹphe kunukaru onwẹphe; tsenuka etsetse. Ekuku, ẹphe eku onwẹphe; mẹ etsetse, ẹphe; mẹ ẹge ẹphe shi apali onwẹphe eli kabẹkwa tsobe iya etsobe. 
Ya makwarụa ẹge ẹphe e-kutabe onwẹphe; ọle ekuku ono bụkwanu iphe mmanu.” Ono iphe Ojejoje ekfu ndono: 
Ọo ya meru iphe ya akwa ẹkwa ndu Móabu. Mbụ l'ọo ndu Móabu l'ẹphe ha bẹ ya l'ara ẹkwa ẹphe; l'agụ aphụ ndu Kíru-Harẹsetu. 
Ya kakwa ọra ẹkwa unubẹ ndu Sibuma; mẹ l'ẹge ya ara ẹkwa ndu Jaza. Unu jaru ajaja; k'ọphu ẹkali unu rutsuaru eze ẹnyimu; mbụ jerutsua Eze Ẹnyimu Jáza. Ọ bụ l'e mebyishiwaru akpụru iphe unu meberu emebe. 
E wofuwaru ẹhu-ọtso-ẹna; mẹ ome ẹmirima l'ẹgu oshi-ọmi ndu Móabu; mẹ l'alị ẹphe. Mẹe bẹ ya mewaru t'ẹ ba akụtajehe l'ẹke aakụje mẹe. Ọphu o nwehedu onye atụjekwadu ẹvu-mẹe teke aakụ iya. A marua l'aanọduje anụ olu madzụ l'ẹke ono; ọle ẹ tọ bụkwanu olu onye atụ ẹvu 
Mkpu olu-ẹkwa ẹphe tụkookwa ẹkemeke ọbule rukota. E shi lẹ Hẹ́shibonu chikọta mkpu ọbu; je akpaa lẹ Eleyale; mẹ Jahazu. E shi lẹ Zówa chia ya jeye lẹ Horonayimu; mẹ Ẹgulatu-Shelishiya; kẹle mini tashihụkotaru je akpaa lẹ Nimirimu. 
L'alị ndu Móabu; bẹ ya e-me t'a gwabuhu iphe l'ẹnya ẹke, aagwajẹ iphe; mee t'ẹ ba kpọjehe ínsẹnsu ọku nụ agwa ẹphe. Ono iphe Ojejoje ekfu ndono. 
“Ya ara ẹkwa ndu Móabu; l'agụkwaphu aphụ ndu Kíru-Harẹsetu. Aphụ, ya agụ dụ l'ọ bụ ẹke aakụ ịkpa anwụhu; kẹ l'iphe bụ iphe ẹphe nwejeru gvụwaru. 
Onyemonye ọbule kpụshikotaru ishi; kpụshikota ẹji-agba; vukotaru ọnya-mma; bya ewekotaru uwe-aphụ l'ukfu. 
Iphe adakọta l'iphe bụ ufu, nọkota l'alị Móabu; mẹ l'edukfu l'edukfu ẹphe; ta dụkwa iphe ọdo, gbahaa ụzu-ẹkwa; kẹle ya tsukposhiwaru ndu Móabu l'ọ bụ ite-mẹe, ẹ-te nwedu onye chọru iya nụ.” Ono iphe Ojejoje ekfu ndono. 
“Ndu Móabu b'a tụkashiwaru nanụ nanu! Ọ bụ ụzu-ẹkwa l'ada wọwowo ẹge ono; iphere jiru ẹphe ifu! Ndu Móabu bụakwa iphe e gude agba mgbọnu. Iphe bụ ndu nọ ẹphe ntse; bẹ ọonyi ishi ẹdzu.” 
Ọwaa iphe Ojejoje ekfu: “Unu leduduphu! Ugo ephekwa l'ephezita ephezita; woru ébà iya gbasaa l'alị ndu Móabu. 
Mkpụkpu, nọgbaa ya nụ; bẹ aa-lụtatsua l'ọgu; natatsụa ẹphe ụlo, ẹphe edomije onwẹphe. Lẹ mbọku ono; bẹ ndu sọja ndu Móabu a-nọdu awa obu l'ọ bụ nwanyi, ime eme. 
Ndu Móabu l'ẹphe ha; bẹ ee-mebyishi; kẹ l'ẹphe dzọru Ojejoje ọkpa l'ishi. 
N-yemegvu; iduma iduma; mẹ ọnya, a gbashịru unu; bẹ nọgbakwa l'echeru unu; unubẹ ndu Móabu! Ono iphe Ojejoje ekfu ndono. 
“Onye nahụru n-yemegvu; yọ dalahụ l'iduma. Onye nyifutaru l'iduma; ọnya anmata iya; kẹ l'ono bụ iphe ya e-gude byakfuta ndu Móabu mẹ ògè teke ya a-hụ̀ ẹphe àhụ̀hù -rulephu.” Ono iphe Ojejoje ekfu ndono. 
“Ndu agba ọso ọgu l'ala Hẹ́shibonu ta mahẹdu iphe ẹphe e-me; kẹle Hẹ́shibonu bẹ ọku etsu; Mbụ o-nwu phuruphuru ọku, etsu l'ime Sihọnu. Yo tụko iphe bụ alị ndu Móabu tsukota l'ọ ha; mbụ tsukota ọkpu-ishi ndu ono, shi bụru ndu ẹnya-dụ-l'ọgu ono. 
Nshọo unubẹ ndu Móabu! Unubẹ ndu ono, shi agwa Kemọshu ono; b'e mebyishiakwaru. Ụnwu unu l'ẹphe ha: unwoke l'ụnwanyi b'a kpụkotawaru lẹ ndzụ laa alị ọdo. 
Ọle ya e-mekochaa dophu ndu Móabu azụ l'ọnodu ẹphe l'oge, dụ l'ifu.” Ono iphe Ojejoje ekfu ndono. Ono abụru ikpe, e kperu ndu Móabu. 
