﻿Jeremáya.
31.
Ojejoje abya asụ: L'o -rua teke ono; bẹ ya a-bụru Nchileke k'ikfu l'ikfu ndu Ízurẹlu l'ẹphe ha; ẹphe abụru ndu ndibe iya. 
Ndu ono, wafụrunu ono bẹ ya meru eze-iphe-ọma teke ẹphe nọ l'echi-ẹgu. Teke ndu Ízurẹlu shi achọ ẹke, ẹphe a-nọdu tụta ume 
bẹ ya shi l'ẹke teru ẹnya mee t'ẹphe phụa ya. Ya yeru unu obu; yeru iya unu k'ojejoje. Ọ kwaphụ ẹge ono bẹ ya e-yegburu unu obu kwasẹru. 
Teke ono bẹ ya a-chịkobe unu; unubẹ ndu Ízurẹlu; t'unu bya agbabe ọkpa; bụru mba ọdo. Teke ono; bẹ unu a-chịta nkwa unu je etsoru ndu ẹhu atsọ ẹna; wata ote egvu. 
Teke ono kwaphu bẹ unu a-wata ọko okfu vayịnu l'eli ugvu ugvu Samériya ọdo. Ndu kọru okfu; e-ri iphe ẹphe kọtaru iya; 
kẹ l'oge abyaa; teke ndu eche nche a-nọnyaa; chilahaa mkpu l'alị ugvu ugvu ndu Ífuremu; sụ: “Unu bya t'ayi je lẹ Ugvu Záyọnu; jekfu Ojejoje, bụ Nchileke ayi.” 
Ọwaa iphe Ojejoje ekfu: “Unu gụa egvu ẹhu-ọtso-ẹna nụ Jékọpu! Unu tụa ụzu ẹhu-ọtso-ẹna nụ mba ono, bụ ishi mbakeshi ono! Unu gụa egvu ekele unu; sụje: ‘Ojejoje; dzọwaru ndu nk'iya; ọ nafụtawaru ndu Ízurẹlu ndu ọphu phọduru nụ l'ẹphe ha!’ 
Unu lekwa; ya e-shi lẹ isheli dulata ẹphe. Ya eshi l'ẹke mgboko jeberu rukoo ẹphe. Ya a-chịta chịta jeye mẹ ndu ìshì; ndu ngvụru; ụnwanyi, dụ ime; mẹ ndu ọphu ime eme. Ọ bụlephu lẹ ndu a-lata nụ a-dụ l'igwe. 
Ẹphe a-nọdu amụ ọnu-ọchi l'alata. Ẹphe a-nọdu ekfu anụ iya; ya edu ẹphe l'ala. Ya e-du ẹphe dughaa nggele nggele; dua ẹphe shia ụzo, dụ kwọru akwọkwo; k'ọphu ụkfu ta akpọdu ẹphe l'ọkpa. Ishi iya abụru l'ọo ya bụ nna Ízurẹlu; Ífuremu abụru ọkpara iya. 
Unu nụkwaa iphe Ojejoje ekfu; unubẹ mbakeshi! Unu araa ya arara tẹ ndu bu l'eli-alị nụa ya! L'onye ono, chịkashiru ndu Ízurẹlu ono a-chịkobekwaphu ẹphe ọdo. L'oochekwa ụnwu atụru iya ọbu nche l'ọ bụ onye eche atụru; 
kẹle Ojejoje gbafụtawaru Jékọpu; kfụa aswa ishi iya l'ẹka ndu ka ẹphe ike. 
Ẹphe a-bya agụa egvu ẹhu-ọtso-ẹna lẹ Ugvu Záyọnu. Ẹphe etee ẹswa k'iphe-ọma, Ojejoje doberu ẹphe; mbụ witu; mẹe ọphungu; manụ; ụnwu atụru; ụnwu eghu; mẹwaru ụnwu eswi. Ẹphe a-dụ l'ọ bụ okfu, a kọru; l'agba iya mini ọhuma; ẹphe ta anọhedu l'aphụ ọdo. 
Teke ono bẹ ụnwu-mgbọko a-wata ote egvu; ẹhu atsọshi ẹphe. Ụnwu-okorọbya; mẹ ndu bụ ọgurenya; bẹ ẹhu a-nọdu atsọkwaphu. Ono teke ya e-me tẹ aphụ, ẹphe shi agụ bụru ẹphe ẹhu-ọtso-ẹna. Ya a-dụ ẹphe obu; bya agbanwee aphụ, tsọru ẹphe t'ọ bụru ẹphe ẹhu-ọtso-ẹna. 
Ndu achịjeru Nchileke ẹja; bẹ ya a-nụkpoo iphe dụ mma; nụa ya ẹphe kẹ etsutsu iya. Ya e-me t'ẹpho ji ndu nk'iya ọhuma.” Ono kwa iphe yẹbe Ojejoje kfuru ndono. 
Ọwaa iphe Ojejoje ekfu ndọ-ọ: “A nụru ụzu-ẹkwa lẹ Ráma; ọ bụ ẹkwa anwụhu mẹ oke nggụmaphu. Ọ bụ Rechẹlu l'ara ẹkwa ụnwu iya; ọphu o kwedu t'e gbobuta iya egbobuta; okfu l'ụnwu iya gvụ-geru. 
Gberuma! Ba rahẹ ẹkwa! Fuchaa ẹnya-mini, nọ ngu l'ẹnya; kẹ l'ee-mekochaa bua ngu nggo ọru ngu; mbụ l'ẹphe e-shi l'alị ndu ọhogu latakọta.” Ono kwa iphe yẹbe Ojejoje kfuru ndono. 
“Ọo ya bụ t'unu lee ẹnya; l'ụzo ifu a-dụrua unu lẹ mma. Ụnwu ngu a-latakọta l'alị ẹphe.” Ono kwa iphe yẹbe Ojejoje kfuru ndono. 
“Ude, Ífuremu atsụ bẹ ya nụwaru; l'ọ sụru: “ ‘L'a hụ̀waru iya àhụ̀hù l'ọ bụ onye àhụ̀ nweswi, ẹ-te kwedu t'a gọta iya agọta. A hụ̀kwanaa ya hụ̀ta. Wo t'a hanụa ya tẹ ya laphuta azụ; kẹ l'ọo mu bụ Ojejoje bya abụru Nchileke iya. 
Ya kpaphuhutsuaru; izimana abya alaphuta iya azụ. Ọnodu, ya nọ abya edole iya phụ ẹnya; Ya abya efuru efuru; woru ikpere byishi l'alị; l'ẹke iphere guderu iya; yọ kpọo ya okfu; kẹ l'ọo iphe ya meru teke ya bụ nwokorọbya bẹ byaru bya etee ya ntụ l'ifu nta-a.’ 
Ífuremu ?ta bụdunua nwa iya, ya yeru obu; mbụ nwa iya, bụ: ya -phụ iya; ẹhu atsọ iya ẹna. A makwaru-a lẹ ya ahajẹru ekfu okfu iya k'ẹji; obenu lẹ ya anyatajẹkwa iya-a. Ọo ya bụ l'obu iya dụ iya nshinu; mbụ lẹ ya a-phụru iya imiko nshinu.” Ono iphe Ojejoje ekfu ndono. 
“Meshia iphe-ọhubama dobegbaa l'echi esu-ụzo! Nggu ekoshia ogvudu ogvudu dobegbaa! Nggu elezita ẹnya l'ụzo, iishi! Latakwaphu azụ; nggụbe nwamgbọko Ízurẹlu! Latakwaphu azụ lẹ mkpụkpu ngu ono l'ọ ha! 
?Nanụ teke ii-ghaphebe ẹge-a; rua; nggụbe nwada ono, ẹ te egudedu ire ngu ẹka ono? Ojejoje meekwaru iphe ọphungu lẹ mgboko-a: lẹ nwanyi a-wata oleta nwoke ẹnya.” 
Ọwaa iphe Ojejoje, bụ Ọkaribe-Kakọta-Ike ekfu ndọ-ọ; mbụ Nchileke kẹ ndu Ízurẹlu: Ọ sụru agha: Lẹ ya -shilephu l'ẹke, a kpụru ẹphe lẹ ndzụ duphuta ẹphe azụ; bẹ ndu, nọ l'alị Júda yẹle mkpụkpu lẹ mkpụkpu iya a-wata okfu okfu-a ọdo; sụ: “Tẹ Ojejoje gọoru ngu ọnu-ọma; nggụbe ishi ẹke ono, doberu ẹka-ndo; bya abụru ugvu, dụ nsọ ono!” 
Ndu Júda mẹ mkpụkpu, nọkota iya nụ a-tụko bukotaru l'ẹke ono. Ndu akọ okfu e-buru iya; ẹphe lẹ ndu chị eghu mẹ atụru ẹphe aghaphe aghaphe; 
kẹ l'onye ike gvụru bẹ ya e-me t'ẹpho ji; ya emee ndu ike gvụru t'ẹphe gbakerehu. 
Teke ono bẹ ndu madzụ a-wata okfu: “L'ẹphe kuru mgbẹnya; tehu; ẹhu atsọ ẹphe ntụmatu.” 
Ọwaa iphe Ojejoje ekfu: “L'oge abyakwa-a; teke ya e-woru nebyi madzụ yẹle anụ woru ghaa l'alị Ízurẹlu yẹle alị Júda. 
Ọo bụlephu ẹge ya cheru ẹphe nche; bya efeshia ẹphe; nwukposhia ẹphe; bya emekputa ẹphe; mebyishia ẹphe; ẹphe alaa l'iyi; ọ kwaphu ẹge ono bẹ ya e-che ẹphe nche; bya akpụkwaa ẹphe; dzaphu ẹphe azụ.” Ono kwa iphe yẹbe Ojejoje kfuru ndono. 
O rua teke ono b'ẹ taa sụhedu: “ ‘Lẹ nna ẹphe bụkwa akpụru vayịnu, ẹ-ta achadu achacha; bẹ ẹphe taru; yọo kpọ ụnwu ẹphe izize.’ 
Iphe e-gbe mechianu bụ l'onyemonye a-la l'iphe o metaru. Onye riru vayịnu, ẹ-ta achadu achacha; eze akpọwa iya rụ izize.” 
Ọwaa iphe Ojejoje ekfu: “L'oge abyakwa teke yẹle ndu Ízurẹlu; mẹ ndu Júda a-gba ndzụ ọphungu. 
Ono ta adụhedu l'ọ bụ ọgba-ndzụ ọphu yẹle nna ẹphe oche gbaru; teke ono, ya gude ẹka sefuta ẹphe l'alị Íjiputu ono; kẹ l'ọ bụ oswi-okfu l'ọo yẹbedua bụ nji ẹphe; ọle ẹphe mebyiru ọgba-ndzụ ono. 
“Ọwaa ndzụ ọphungu yẹle ndu ọnu-ụlo Ízurẹlu a-gba: m'o -rulephu teke ono. Ekemu iya; bẹ ya e-ye ẹphe l'egomunggo; dee ya ẹphe edede l'ọkpoma. Ya a-bụru Nchileke ẹphe; ẹphebedua abụru ndibe iya. 
Madzụ te ezihedu ibe iya iphe ọdo; ọphu madzụ 'ezihedu nwunne iya iphe kẹ t'ọosuje iya: ‘Makwaru Ojejoje’; kẹ l'ẹphe e-shilephu l'onye ẹnya katsụa alala l'ime ẹphe jeye l'onye ọphu ẹnya katsụa nshinu maru iya. Ishi iya abụru lẹ ya a-gụru ẹphe nvụ l'iphe dụ ẹji, ẹphe meshiru; ọphu ya 'anyatahẹdu iphe dụ ẹji ẹphe ọdo lẹ phuu.” Ono kwa iphe yẹbe Ojejoje kfuru ndono. 
Ọwaa iphe Ojejoje ekfu ndọ-ọ; mbụ onye ono, doberu ẹnyanwu; sụ t'oochije l'eswe; bya emee tẹ ọnwu; mẹ mkpọ-kpodo chije l'ẹnyashi; mbụ onye ono, bụ iya anmawoje eze ẹnyimu anmawo; eyii-mini iya edee mba ono; ẹpha iya bụ Ojejoje, bụ Ọkaribe-Kakọta-Ike. 
Ọ sụru l'ọ -bụru l'o nweru teke aa-nọnyaaru; iphe-a, ya keshiru; dobe iya l'ọru iya-a gbakahu; ono teke ndu eri Ízurẹlu a-chịhu; ẹphe ta abụhedu ọha k'ẹka ẹphe l'ifu iya gbururu jeye lẹ gbururu. Ono iphe Ojejoje ekfu ndono. 
Ọ -bụru l'o nweru mbọku, ee-wota imigwe tụa l'iphe aatụje iphe; bya egvua alị gvurua ẹke a tọru ọkpa mgboko l'ọ ha; tẹmanu ya egude iphe ndu eri Ízurẹlu mekotaru l'ọ ha jịka ẹphe. Ono iphe Ojejoje ekfu ndono. 
Ọwaa iphe Ojejoje ekfu: “L'oge abyakwa teke ee-mekochaa kpụkwaa mkpụkpu-a doberu yẹbe Ojejoje; tsube l'oje Hananẹlu jeye l'ọnu-ụzo ono, aza Ọnu-ụzo Aghachi ono. 
Ogologo iphe e-gude atụ iphe e-shi l'ẹke ono daburu ogologo jeye l'eli ugvu Garẹbu; bya agọ-zia lụfu Gowa. 
Nsụda ono l'ọha, shi bụru ikirikpọ; bụkwaruphu ẹke aawụshi iya ntụ phụ; mẹkpo ẹgu ono l'ọ ha jeye lẹ Kídirọnu l'ụzo ẹnyanwu-ahata; gbururu jeye l'iku Ọnu-ụzo Ịnya l'ọ ha a-dụkotaru Ojejoje nsọ. Ẹ to nwedu l'e efefukwadu mkpụkpu ono efefu; ọphu ee-nwukposhihedu iya enwukposhi ọdo.” 
