﻿Jeremáya.
17.
“Ẹjo iphe ndu Júda meshiru dụkwa l'ọ bụ ígwè b'e gude kashịa ya akashị; bya egude iphe tụpyiru ọnu dee ya l'obu ẹphe, dụgbaa l'ọ bụ mkpuma; m'ọ kwanu lẹ mpo, nọgbaa l'ẹnya-ngwẹja ẹphe. 
Ụnwu ẹphe nyatarua ẹnya-ngwẹja ẹphe; nyata itso Ashera, ẹphe doberu l'iku iphe bụ oshi, nweru idzu; mẹ l'iphe bụ ugvu, ha l'eli; 
mẹ l'eze ugvu, nọgbaa l'ẹgbudu. Ẹku ẹku, unu kpataru; mẹkpo iphemiphe ọbule, unu nweru; bẹ ya e-mekota t'e gvotakota l'ọ ha. Ono abụru aswa, unu akfụ kẹ iphe dụ ẹji ono, dzuru alị unu l'ọ ha ono. 
Ọ bụ unubẹdua bẹ oo-shi l'ẹka; òkè-iphe ya nụru unu anahụ unu. Ya e-woru unu mee ohu ndu ọhogu unu l'alị ẹke unu ta amadụ; kẹ l'unu kpatsuwaru iya iwe; ẹhu-eghughu iya e-ghu iya gbururu jeye lẹ gburu” 
Ọwaa iphe Ojejoje ekfu ndọ-ọ: “Ọnu b'a tụru nụ onye dakoberu madzụ; mbụ onye ẹke ike nọ bụ l'ẹhu madzụ mmanu; ọkpoma iya ta nọhe l'ẹke Ojejoje nọ. 
Onye ono a-dụ l'ọ bụ iru, ruru l'echi-ẹgu. Ẹ tọ phụdu teke iphe dụ mma abya. Yọ bụru ẹke dụ kpọkoro kpọkoro kpọkoro l'echi-ẹgu ọbu bẹ oo-buru; mbụ alị únú, ẹ-te nwedu onye bu iya nụ. 
Obenu l'ọnu-ọma bụ k'onye dakoberu Ojejoje; onye bụ Ojejoje b'ọ kpọru obu yeru. 
Onye ono a-dụ l'ọ bụ oshi, e yeru l'iku mini, chịru ọ́gbaragba iya ye lẹ nggele. Ẹ tọo tsụdu egvu m'o okpomọku -bya. Tekenteke bẹ ẹkwo iya anọduje ájà àjàjà. Ẹ tọo yọjedu ọshi l'ẹjo mkpọ-anwụ byaru; ọphu ọ dụdu teke ẹ tọo nọdujedu amị amịmi.” 
Obu madzụ te nwedu iphe ka iya ẹregede. Ẹjo ọkpoma, nọ iya nụ te nwe nwunne. ?Bụ onye a-dị ike maru iya? 
“Ọo yẹbe Ojejoje enyoje obu; l'eleleje ọriri madzụ elele; k'ọphu ya a-kfụ onyemonye ụgwo l'ẹge umere iya dụ; mbụ l'ẹge iphe o meru gbaru.” 
Onye akpa ẹku ẹregede dụ l'ọ bụ ọkwa, achịtaje ụnwu, ẹ tọ vụdu hee. Kẹ l'ọ bụ teke ndzụ onye ono keleruphe ẹbo; ẹku iya ono agwọbe iya gbakashịhu. Yọ bụru l'ikperazụ iya ono; bẹ ọo-maru lẹ ya bụ onye eswe. 
Ụlo, ayi doberu nsọ bụ aba-eze, dụ akpabiri; tsubekpoo lẹ ọdungu; b'ọ bụ ẹke eedo nsọ. 
Nggụbe Ojejoje; ọ bụ nggu bụ onye ndu Ízurẹlu ele ẹnya l'ẹka! Iphe bụ ndu gbadoru ngu nụ; bẹ iphere e-mekochaa bụru nk'ẹphe. Ndu gharu ngu azụ; bẹ ee-de ẹpha ẹphe l'ẹja; kẹ l'ọo Ojejoje bẹ ẹphe gbadoru; mbụ ishi mini, emeje t'a nọdu ndzụ. 
Gwọo mu l'iphe eme mu nụ; nggụbe Ojejoje; k'ọphu mu a-bụru onye ẹhu dụ mma! Dzọo mu rụ; k'ọphu mu a-bụru onye a dzọtaru; kẹ l'ọ bụ nggu bụ onye mu ajajẹ ajaja. 
Iphe ẹphe anọduje ekfuru mu bụ: “Nanụhunu iphe ọbu, Ojejoje kfuru ọbu? T'o renua ẹge o kfuru!” 
Mu ta gbakwa ọso; lẹ mu te echeheduru ngu atụru; ọphu ọ dụdu teke ẹjo ụboku gụjeru mu. Nggụbedua maru l'iphe shi mu l'ọnu lụfuta daburu ẹba l'ifu ngu. 
Be eyekwa mu egvu! L'ọ kwa nggu; bẹ mu agbabẹje; zeeru ndzụ teke iphe-ẹhuka byaru. 
Kpunua ndu akpa mu ẹhu ifu lẹ ntụ; ọle bẹ ekwekwa t'e kpua mbẹdua ifu lẹ ntụ! Menua t'ẹphe bụru ndu eeye egvu; ọle bẹ ekwekwa t'e yee mbẹdua egvu! Mee t'iphe-ẹhuka dakfuta ẹphe! Gude oke ọ-la-l'iyi laa ẹphe l'iyi! 
Ọwaa iphe Ojejoje kfuru mu. Ọ sụru: “Tẹ mu je evudo l'ọnu edukfu mkpụkpu, bụ ụzo ẹke ndu eze ndu Júda eshije bata; shikwa iya phụ l'alụfu. Tẹ mu tụkokpelekwaphu iphe bụ ọnu-ụzo, eeshije abata lẹ Jerúsalemu je evudo; 
sụ ẹphe: Unu ngabẹ nchị l'iphe Ojejoje ekfu; unubẹ ndu eze ndu Júda; ndu Júda l'unu ha; mẹwaru iphe bụ onye bu lẹ Jerúsalemu, bụ ndu eshije l'ọnu ẹke-a. 
Ọwaa iphe Ojejoje ekfu: Unu kwabẹnuphu ẹnya t'unu be evuje ivu lẹ mbọku ọtu-ume; ọphu unu 'evujekwaru iya shia ọnu ẹke ono, eeshije abahụ Jerúsalemu ono. 
Unu be shijekwa l'ụlo unu vuru iphe lụfuta etezi; ọphu unu 'ejejekwa ozi lẹ phuu mbọku ọtu-ume. Ọ bụ-chikwa t'unu dobeje mbọku ọtu-ume nsọ, bụ iya bụ iphe ya sụru ndiche unu phẹ t'ẹphe meje. 
Obenu l'ẹphe te yedu ọnu; ọphu ẹphe 'angadụ nchị. Ẹphe kwefuru íkè; jịka l'ẹphe ta angadụ nchị; ọphu ẹphe 'eyedu ọnu lẹ mba, ya baru ẹphe. 
Obenu l'ọwaa bụ iphe Ojejoje ekfu: L'ọ -bụru l'unubẹdua tọru nwẹhu l'angaru iya nchị; unu te evuje ivu bata l'ẹke, eeshije abata lẹ mkpụkpu-a mbọku ọtu-ume; ọ -bụru l'unu doberu mbọku ọtu-ume ono nsọ; k'ọphu bụ l'ẹ tọ dụdu ozi, unu ejeje mbọku ono; 
ono teke ndu eze, nọ l'ọkwa eze Dévidi a-wata oshi ẹke, eeshije bata lẹ mkpụkpu-a; ẹphe lẹ ndu ejeru ẹphe ozi. Ẹphebedua ẹphe lẹ ndu ejeru ẹphe ozi a-nọdu agba l'ụgbo-ịnya; mẹ l'eli ịnya l'abata lẹ mkpụkpu-a. Ndu Júda l'awụ etso ẹphe; mẹkpo iphe bụ ndu bu lẹ Jerúsalemu. Ọ bụ teke ono bẹ ee-bu lẹ mkpụkpu-wa jeye lẹ tutu yoyo. 
Ndiphe e-shi lẹ mkpụkpu, nọgbaa l'alị ndu Júda l'abya; mẹ l'edukfu, nọgbaa lẹ Jerúsalemu mgburumgburu; mẹ l'oke-alị ndu Bénjaminu; mẹ ndu bu l'ọkpa-ugvu, nọ l'ẹnyanwu-arịba; mẹ ndu bu l'alị ugvu ugvu; mẹ ndu ụzo ọhuda. Ẹphe egudegbaa ngwẹja-ukfuru; waa anụ ọdo, ee-gbu egbugbu; mẹ ngwẹja nri; mẹ ínsẹnsu; mẹ ngwẹja-ekele; gude abya ọgwaru Ojejoje l'eze-ụlo iya. 
Ọle; ọ -bụru l'unu te emedu iphe ya sụru t'unu meje; k'ọphu bụ l'unu te edobejedu mbọku ọtu-ume nsọ; unu evuje iphe l'abata Jerúsalemu mbọku ọtu-ume bẹ mu a-phunwu ọku, e tee menyidu emenyi l'ẹke eeshije abata Jerúsalemu. Yọ bụru ọku ono a-tụko iphe bụ ẹke a rụshiru ike l'ime iya kekota.” 
