﻿Azáya.
62.
Ọ kwa l'okfu ẹhu Záyọnu; bẹ mu e-gude; mu ta adahụdu nkịchi. Mu e-gude okfu ẹhu Jerúsalemu; mu ta anọkirishihedu; gbururu jeye teke odobe-ẹka-ndoo ya achafụta t'a phụ iya l'ọ bụ ẹke nchi bọhuru; mbụ ndzọfuta iya enwua phoo l'ọ bụ itsu-ọku, eke phophopho. 
Iphe bụ mbakeshi a-phụ odobe-ẹka-ndoo ngu; ndu eze ẹphe aphụ o-gbu-nwịi-nwịi ngu; a bya agụa ngu ẹpha ọphungu, bụ Ojejoje e-gude ọnu iya gụa ngu iya. 
Ịi-nọdu Ojejoje l'ẹka; bụru okpu-eze, dụ ugvu, o gude. Ịi-dụ l'ọ bụ okpu-eze, nọ Nchileke l'ẹka. 
Ẹphe te ekuhedu ngu “onye a gbagharu agbagharu.” Ọphu eekuhedu alị ngu “Alị, ẹgbara kfụru.” Iphe aa-gụ ngu bụ “Ọtsomahu Nchileke.” Iphe ee-kulahaa alị ngu bụ: “Nwanyi ọphungu;” kẹle Ojejoje e-gude ngu eme ẹswa. Alị ngu adụ l'ọ bụ nwanyi, a lụru k'ọphungu. 
Ọ bụ ẹge ono, nwokorọbya alụje nwata mgbọko ono bụ ẹge ụnwu ngu a-lụru nggụbe Záyọnu. Yọ bụru ẹge ẹhu atsọje onye eme ẹswa-nwanyi, ọ lụru k'ọphungu; bụ ẹge Nchileke ngu a-nọdu eme ẹswa ngu. 
Mu wowaru ndu nche yetsua t'e che nche l'ụpho-mkpuma nggụbe Jerúsalemu. Ọphu ẹphe abyadụ bya edobe ọnu ndoo: eswe l'ẹnyashi. Unubẹ ndu akpọ-ku Ojejoje; unu ba tụtakwa ume! 
Ọphu unu ekwekwa t'ọ tụfu ume jeye teke oo-me Jerúsalemu t'o vudo; mee ya t'ọ bụru iphe mgboko l'ọ ha e-gude aja Nchileke ajaja. 
Ojejoje ribuwaru angụ iya; sụ “L'ẹ to nwehedu lẹ ya eworu iphe ị kọru l'okfu nụ ndu ọhogu ngu t'ẹphe ria ọdo; ọphu 'onwehedu lẹ ndu mbyamụmbya angụa mẹe ọphungu ono, i seru akanya iya ono ọdo. 
Ọ bụ ndu riru aphụ iya; kpata ya e-ri iya; jaa Ojejoje ajaja iya. Ẹge ono b'ọ bụ ndu awọ akpụru vayịnu a-ngụ mẹe ya l'ogbodufu mu ono, dụ nsọ.” 
Unu shia ya; unu shia ọnu ẹke e shije abahụ mkpụkpu ono! Unu meeru ndu ono ụzo! Unu kpaa; unu kpaa eze oje ono! Unu kpashịa mkpuma, nọ iya nụ! T'e woliaru iphe bụ mbakeshi ẹkwa-ọhubama ono! 
Lenu; Ojejoje raakwaru iya arara jeye l'ẹke mgboko jeberu; sụ: “Unu sụ ndu Záyọnu t'ẹphe phụkwa l'onye ndzọta ẹphe abyaakwa! O gudekwa iphe oo-gude akfụ ụgwo; mbụ l'o gudeekwa iphe oo-gude ebu nggo.” 
Iphe ee-ku ẹphe bụ: “Ndu nsọ Nchileke.” Aa-nọdu ekukwaphu ẹphe: “Ndu Ojejoje gbataru.” Nggụbedua bẹ ee-ku: “Nwanchọta;” mẹ “Mkpụkpu, ẹ taa kwafụhedu akwafu.” 
