﻿Azáya.
49.
Unu geberu mu nchị unubẹ ndu bunyabe eze ẹnyimu! Unu nụkpoduduphu iphe-a unubẹ mbakeshi, butsua l'ẹke teru etete! Ojejoje kuru mu ru tẹmanu a mụa mu. Ọ bụru teke mu nọkwadua l'ẹpho nne mu b'o kuru mu ẹpha. 
O meru ọnu mu; yọ tsụ nkọ l'ọ bụ ogu-mbeke, a baru ababa; bya domia mu lẹ mkpuli ẹka iya. O meru mu; mu adụ l'ọ bu akfụ, a raru arara; bya eworu mu rụ-mia l'iphe ooyeje akfụ iya. 
Yọ sụ mu: “Ị bụkwa nwozi mu nggụbe Ízurẹlu. Onye bụ nggu bẹ mu e-gude koshi ẹge mu dụ biribiri.” 
Obenu lẹ mu sụkwanuru: “Mu seekwaru ẹza ọ-la-l'iyi. Mu aswị-gbushileruphu onwomu k'iphoro l'iphe bụ iphe-mmanu. Obenu; l'iphe gbaru mu bụ l'ẹka Ojejoje b'ọ nọ. Ẹge ono b'ọ bụ Nchileke e-bu mu nggo.” 
Yo be nta-a Ojejoje asụ; mbụ onye ono, moru mu l'ime ẹpho tẹ mu bụru nwozi iya; dulataru iya ụnwu Jékọpu azụ; chịkobe ụnwu Ízurẹlu chịtaru iya. Kẹle mu bụ onye aakwabẹ ugvu l'ẹnya Ojejoje; ẹge ono b'ọ bụ Nchileke mu bụ ike nke mu. 
Ojejoje asụ: “Ẹ tọ bụlekwaa t'ị bụru nwozi mu; dulataru mu ndu ikfu Jékọpu azụ ọdo; nggu edulataru mu ndu kẹ Ízurẹlu; mbụ nwa ndu ọphu mu doberu. Mu e-mekwa ngu phụ t'ị bụru iphoro l'ẹke ndu ẹ ta bụdu ndu Ju nọ; k'ọphu ii-me tẹ ndzọta mu rua ẹke mgboko jeberu.” 
Ọwaa iphe Ojejoje ekfu; mbụ onye ono, bụ onye mgbafụta; bya abụru onye nsọ kẹ ndu Ízurẹlu. Ookfu iya anụ onye ono, mbakeshi akpọfu akpọfu l'akpọ-yiru iya ukuvu ono; mbụ onye ono, bụ nwozi ndu ishi. Ọ sụru iya: “Lẹ ndu eze e-mekochaa; phụ ngu; wụ-lihu. Ndu bụ ishi a-phụ ngu; daaru ngu pẹe.” Onye e-me iya bụ Ojejoje; onye ono, emeje ire-lanụ; mbụ Onye nsọ ndu Ízurẹlu, bụ onye fọtaru ngu. 
Ojejoje sụru: “L'oge kẹ ome iphe-ọma -rulephu; ya emeeru ngu iphe-ọma. Oge kẹ ndzọta -ruta; ya adzọfuta ngu. Ya a-kwakọbe ngu; mee t'ị bụru iphe mu lẹ madzụ e-gude gbaa ndzụ; gude mee alị ono t'ọ lata azụ l'ọnodu iya; mee t'unu bya ebua l'alị unu ono, daburu ochobo nta-a ono. 
Mbụ t'ị sụ ndu ono, a kpụru lẹ ndzụ ono: ‘T'ẹphe lụfuta;’ nggu asụkwaphu ndu nọ l'ọchi: ‘T'ẹphe nweru onwẹphe.’ Ẹphe adụ l'ọ bụ ụnwu-atụru, akpa nri l'iku esu-ụzo; phụtsua nri l'ugvu, dụtsua chafụ chafụ. 
Ẹgu ta abyadụ bya agụ ẹphe; ọphu ẹgu mini 'abyadu bya agụ ẹphe; ọphu okpomọku, shi l'echi-ẹgu; mẹ ọphu shi l'anwụ te ekpodu ẹphe. Ọ bụ onye imiko ẹphe dụ; a-nọdu edu ẹphe. Ọo-nọdu edu ẹphe l'iku ọgba-mini. 
Mu e-me t'ugvu ugvu mu bụkotaru ụzo. Ẹge ono bẹ aa-kpa eze ụzo; yọ hatsụa l'eli. 
Lenu! Ẹphe e-shitsukwa ẹke teru ẹnya; ndu shi l'ụzo isheli; ndu eshi l'ụzo ẹnyanwu-arịba; ndu eshitsua ụzo Sinu.” 
T'igweli tee ẹswa; ẹhu atsọo mgboko ẹna. Unubẹ ugvu; unu byiswee egvu! Kẹle Ojejoje dụwaru ndibe iya ike. Ọo-phụru ndibe iya ono, shi eje iphe-ẹhuka ono imiko. 
Obenu lẹ Záyọnu sụru: “Ojejoje ta arịtajehekwa mu. Nnajiufu mu zahawaru mu.” 
Nne; ?ọozahaje nwa, angụ iya ẹra l'ọkpoma; kẹ t'ẹ b'ọ phụru nwa, bụ iya paru ẹpho ime iya imiko? O nwekwaru ẹge ọo-dụ; yọ zahaa ya; ọbule mbẹdua ta azahadụ ngu! 
Lenu; mu deekwaru ẹpha ngu l'ọbechere-ẹka mu; ọphu mu azahajẹdu ụpho-mkpuma ngu ono azaha. 
Ụnwu ngu gudewa ọso alata. Ndu ono, bụ ẹphe meru ngu t'ị chịhu ono alụfuakwa. 
Palikpoduduphu apali; chịkaa ẹnya achịka! Ụnwu ngu l'ẹphe ha dzukoru; l'awukfuta ngu. Ojejoje sụru: K'ọphu ya nọo; bẹ ii-mekochaa kwaa ẹphe ọkwa ngwa. Mbụ ii-gude ẹphe kwaa onwongu l'ọ bụ nwamgbọko, abya ọla nji. 
“A makwaru-a l'e mebyishiru ngu; nggu adaburu ochobo; ẹgbara akfụa ngu. Ọbule tsube nta-a; bẹ ị tịi dzuhedu ndibe ngu ebubu. Ndu ono, shi akpapyaa ngu ishi a-nọdu ngu ote-ẹnya. 
Ụnwegirima ono, a mụshiru ngu teke ono, ịino l'aphụ ono e-mekochakwaa kfua ya; nggu egude nchị ngu nụa ya: ‘L'ẹke-a hanụkakwa ayi nwanshị ebubu; chọfunuaru ayi alị ẹke ayi e-buru!’ 
Teke ono; bẹ ii-kfu l'ime obu ngu; sụ: ?Bụ onye mụshiru mu igweligwe ụnwegirima ọwaa? Obenu l'ụnwu mu; bẹ kpolashihuwaru nụ; mu agbaru ẹka. Mu abụru onye a kpụru lẹ ndzụ; laa alị ndu ọdo; ?Bụkwanu onye zụshiru mu ndu ọwaa; l'ẹke ọ kwa mbẹdua nkịnyi mu bẹ phọdurunu. Ndu ọwaa; ?bụ awe bẹ ẹphe shikwanu?” 
Ọwaa iphe Nnajiufu, bụ Ojejoje ekfu: “Lenu; mu e-pheru mbakeshi, nọtsuanu ẹka. Mu a-paliru ọha, nọtsuanu ẹkwa-ọhubama mu. Ẹphe e-gude ẹka ẹphe kulataru ngu ụnwegirima ngu: ndu k'unwoke; kwọru ndu k'ụnwanyi l'ukuvu kwọlataru ngu. 
Ndu eze a-bụru nna, ehe ngu nụ. Ndu eze-nwanyi abụru nne, ehe ngu nụ. Ẹphe a-nọdu ebyiru ngu ikpere; l'eburu ngu ifu l'alị. Ẹphe e-gude ire mịchaa udzu, nọ ngu l'ọkpa amịcha. Ọ bụ teke ono; bẹ ịi-ma l'ọ bụ-a mu bụ Ojejoje; lẹ ndu atụ ume atụ-kobe mu; b'e te yedu ẹnya mbo.” 
?Onye a-nataghekwanu ndu sọja iphe ẹphe lụtaru l'ọgu tọo? Tọo ?aanafụ-ghe ndu akirishi ndu ẹphe kpụtaru lẹ ndzụ? 
Obenu lẹ Ojejoje sụru: “Ee! Ndu a kpụru lẹ ndzụ; bẹ aa-naphuta azụ! Iphe ndu iwe kwaru l'ọkwata bẹ aa-natakwaphụ ẹphe. Ndu etso ngu ọgu bẹ ya e-tso ọgu. Ya abya adzọo ụnwu ngu. 
Ndu akpa ngu ẹhu; bẹ ya e-me t'ẹphe taa anụ onwẹphe; ẹphe a-ngu mee onwẹphe jeye yo melahaa ẹphe l'ẹnya l'ọ bụ mẹe. Ọ bụ teke ono; bẹ ndiphe mgburumgburu a-ma l'ọ bụ yẹbe Ojejoje bụ onye adzọje ngu nụ. Ọ bụ iya bụ onye agbataje ngu nụ; bụru iya bụ Ọkaribe kẹ Jékọpu.” 
