﻿Azáya.
11.
Nwiru e-shi l'ukfu oshi ono; mbụ Jesi ruta. Yọ bụru l'ọ́gbaragba iya bẹ ẹkali e-shi nyịta. 
Ume kẹ Ojejoje a-nọdu iya l'ẹhu; mbụ Ume kẹ mmamiphe; mẹ iphe-odo-ẹnya; Ume, akpọ-zije ụzo; Ume, anụje ike; Ume, emeje t'iphe doo ẹnya; bya abụru Ume, emeje t'a tsụ Ojejoje egvu. 
Iphe adụje iya mma abụru t'a nụjeru Ojejoje okfu. Ẹ tọ bụdu iphe o gude ẹnya phụa bẹ oo-gude ekpe ikpe. Ọphu ọ bụdu iphe ọ nụru lẹ nchị; bẹ oo-gudeje kpe-bua iphe. 
Oo-gude odobe-ẹka-ndoo kpee ndu ẹ-ta dụdu ẹge ọ haru ẹphe ikpe. Yọ bụru ọkpobe ikpe; bẹ oo-gudeje bua ikpe ndu ụkpa lẹ mgboko. Mgboko bẹ oo-gude ọnu iya, bụ mgbọro chitsushia. Yọ bụru uphere-ọnu iya; bẹ oo-gude gbushia ndu ẹjo iya ono. 
Odobe-ẹka-ndoo a-bụru akpọ-buleti iya. Madzụ ogude ẹka l'iphe o kfuru abụru akpọ-buleti iya. 
Oo-me ẹjo nkụta-ọswa yẹle ụnwu atụru akpalahaa ẹghirigha. Oduma yẹle eghu adọlahaa l'ẹkalanu. Ụnwu eswi; ụnwu agụ; mẹwaru ụnwu anụ, gbaru ẹ̀bà akpalahaa ẹghirigha. Yọ bụru ụnwegirima nshịi a-nọdu eche ẹphe. 
Nneswi yẹle nkụta-ọswa a-nọdu akpa nri ẹghirigha. Ụnwu ẹphe a-tụko l'adọ l'ẹkalanu. Agụ awata ọta ẹwu l'ọ bụ eswi. 
Nwata, angụkwadua ẹra a-nọduje l'ọnu ẹnu óghù l'egvu egvu. Nwata, a mịfuwaru ọnu l'ẹra e-wojeru ẹka ye l'ẹnu ogiji. 
Iphe ono l'ọ ha; ta dụdu ọphu e-meka madzụ iphe; k'ọphu ọ bụru k'ogbu madzụ l'ugvu, mu dobetsuaru nsọ l'ọ ha; kẹ l'ọ bụ ẹge ono mini ejije ẹnyimu ono bụ ẹge mgboko l'ọ ha a-makọtaru Ojejoje. 
Oge teke ono; bẹ ọ́gbaragba Jesi ono a-bụru ẹkwa-ọhubama kẹ ndu mgboko. Yọ bụru iya bẹ mbakeshi, nọnu a-nọduje agba agbakfu; ọkpoku iya a-dụ biribiri l'ẹnya. 
L'o -rua mbọku ono; bẹ Nnajiufu e-gude ike iya k'ugbo ẹbo dufuta nwandibe iya ndu ọphu a-phọdu nụ lẹ Asiriya; Íjiputu; Paturọsu; mẹ ndu ọphu e-shi lẹ Itiyópiya; Élamu; Shịna; Hámatu; jeye lẹ ndu ọphu e-shitsua l'ikfuli eze ẹnyimu. 
Ẹkwa-ọhubama; bẹ ọo-paliru mbakeshi; gude koshi lẹ ya abyawa ọchilatakota ndu Ízurẹlu ono, e shi chịkashia achịkashi ono. Ya abya erulatakwaphu ndu Júda ono, a tụkashiru l'ẹkemeke ọbule lẹ mgboko ono. 
Ẹnya-kfụrukfuru ndu Ífuremu a-la. Ndu ọhogu ndu Júda bẹ ee-me ẹphe achịhu. Mbụ lẹ ndu Ífuremu ta dụhedu ndu Júda ẹnya-kfụrukfuru; ọphu ndu Júda ta dụheru ndu Ífuremu ẹhuka. 
Ẹphe a-tụgba ziru phaa je agbakụshi iya ndu Filisutayịnu l'ụzo ẹnyanwu-arịba. Ẹphe atụgbabe je akwaa ndu ụzo ẹnyanwu-ahata ọkwata. Ẹphe a-zụ ndu Édọmu yẹle ndu Móabu gbirimu. Ndu kẹ Amọnu abya anọdu ẹphe l'ẹka. 
Ojejoje e-me tẹ nkụlahu eze ẹnyimu Íjiputu tahụ. Oo-gude phẹrephere, akpọ iphe nkụ; phee ẹka lẹ Ẹnyimu Yufurétusu. Oo-me iya; yọ ta-bushihu uzi ẹsaa; k'ọphu madzụ a-dzọje girimu gadamu swee lụfu azụ iya ọphu. 
Nwandibe iya ndu ọphu phọduru nụ, e-shi l'alị ndu Asiriya alata; bẹ aa-kparu oje mbeke, a-daburu kẹ phorokotongu; ẹge ono, a kparu iya ndu Ízurẹlu teke ono, ẹphe shi Íjiputu alata ono. 
