﻿Azáya.
9.
Obenu l'e -megee bẹ ẹphe ta achịhedu obu l'ẹka; mbụ ndu ono, shi eje iphe-ẹhuka ono. Teke ndiche b'ọ kparu alị ndu Zébulọnu yẹle alị ndu Náfutali ẹhu. Obenu l'oge-l'ifu; bẹ ọo-kwabẹ ndu bu l'ụzo eze ẹnyimu ùgvù; mbụ ndu bu l'azụ Ẹnyimu Jọ́danu azụ iya ọphu, bụ iya bụ alị Gálili, bụ ẹke ono, ndu ọhodo bu ono. 
Ndu ono, nọ l'ẹkpuru-ọchi ono phụakwaru iphoro, ha nshinu. Ndu ọphu bu l'alị ono, gbaru tsụbalangu ono; bẹ iphoro nwuakwaru phoo. 
Ọha ono b'i mewaru; yọ ka nshinu; bya emee; ẹhu aka ẹphe ọtso ẹna. Ẹphe a-nọdu ngu l'ifu ete ẹswa l'ọ bụ ndu eme ẹswa iphe ẹphe kpataru l'okfu ẹphe; mbụ ndu eme ẹswa l'ẹke ẹphe eke iphe ẹphe lụtaru l'ọgu. 
L'ọ bụ-a ẹge i meru teke i mekputaru ndu Mídiya teke ndiche phụ bụ ẹge ị chịkashiru ivu ẹra, shi nyịpyabe ndibe ngu; bya anyakashịa mgbọro-ígwè, e shi swebe ẹphe l'ukuvu; yẹle oshi, ndu akpa ẹphe ẹhu shi gude akpa ẹphe ẹhu. 
Akpọkpa ndu sọja, e gude lụa ọgu l'ọ ha, jeye l'iiphe, bụ uwe, a gwọ-swiru lẹ mee; bụ ọku; bẹ aa-kpọkota iya. Ọo-bụru nkụ, eeye l'ọku. 
Mkpata iya bụ l'a mụru ayi nwata. A mụru ayi nwata nwoke. Ọ bụ iya a-bụ onye ishi, achị nụ. Iphe aa-nọdu eku iya bụ “Onye mkpozi-ụzo, dụ biribiri”; “Nchileke, bụ Ọkaribe-Kakọta-Ike”; “Nna, bụ Ojejoje”; mẹ le “Onye ishi, emeje tẹ nchị dụ ndo”. 
Ọchichi iya; mẹ nchị-ọdu-ndo, e-tso iya nụ a-nọdu aka nshinu akaka l'eje; ọphu ọ byadụ agvụ agvụgvu. Ọo-nọdu l'aba-eze Dévidi, bụ ochechoroche iya bụru eze. Oo-gude ọkpobe ikpe; mẹ odobe-ẹka-ndoo mee ya t'ọ ngụru angụru; jeye lẹ gbururu. Ojejoje, bụ Ọkaribe-Kakọta-Ike e-gude ẹge oovutabe iya l'obu; mee ya. 
Nnajiufu ziwaru iphe ya e-me eri Jékọpu. Iphe ono e-me ndu Ízurẹlu; 
k'ọphu bụ lẹ ndu Ízurẹlu l'ọ ha a-makọtaru iya; mbụ ndu Ífuremu; mẹ ndu bukota lẹ mkpụkpu Samériya; mbụ ndu egudeje ekuku, nọ ẹphe l'obu; mẹ ndu anya ndu; sụ: 
“Ụlo ono, e gude ẹja kpụa ono bẹ dakpọshihuakwaru nụ. Obenu l'ayi a-pyịcha mkpuma apyịcha gude kpụ-kwazilahaa ya. Oshi figu ono b'e gbutsushiwaru. Obenu l'ayi e-woru oshi sida dzakwazi l'ọzori iya.” 
Obenu lẹ Ojejoje yewaru ndu ọhogu Rezinu ọkpu-ike-ike t'ẹphe je etsoo ẹphe ọgu; mbụ l'ọ tụwaru ndu ọhogu ẹphe nanụ nanụ. 
Ndu Áramu shiwa l'ụzo ẹnyanwu-ahata; ndu Filisutayịnu eshi l'ụzo ẹnyanwu-arịba byawa bya eghechaa ọnu; lee ndu Ízurẹlu wọo. Obenu l'iphe ono te emedu t'obu tụ-zita Nchileke. Yọ dabẹlee ẹphe ẹka ẹge ọ dabẹru iya. 
Obenu lẹ ndu Ízurẹlu ta lakfutadu onye ono, chiru ẹphe iphe ono; ọphu ẹphe akpadu ishi Ojejoje ono, bụ Ọkaribe-Kakọta-Ike ono. 
Ọo ya bụ lẹ Ojejoje e-bu ndu Ízurẹlu ishi; bua ẹphe ọkpa; saa ẹphe ọ-sa-ẹkfu; nmaa ẹphe ẹka swọkoswoko l'akpụru ẹnyanwu lanụ. 
Yọ bụru ndu bụ ọgurenya yẹle ndu nweru ẹnya bụ ẹphe bụ ishi ọbu. Ọ bụ ndu nkfuchiru Nchileke, bụ ndu ezi iphe ta bụdu ire-lanụ bụ mgbọdzu. 
Ndu edu ndu Ízurẹlu eduswe ẹphe ụzo. Mbụ ndu ọbu, eedu ọbu b'e duphuwaru. 
Ọo ya bụ lẹ Nnajiufu bẹ ẹhu ta atsọdu ẹna l'ẹke ụnwu-okorọbya alị ono nọ. Ẹ tọo phụduru ndu a tọru ogbe imiko; tọ phụru iya ụnwanyi, maa tụfuru; kẹ l'ẹ to nwedu ẹphe onye eme ele Nchileke. Ẹphe l'ẹphe ha tụko bụru ndu ẹjo iya ono; l'ekfu ẹjo okfu. Obenu l'iphe ono te emedu t'obu tụ-zita Nchileke. Yọ dabẹlee ẹphe ẹka ẹge ọ dabẹru iya. 
Ẹjo iphe ẹphe eme enwu l'ọ bụ ọku. Ọodzuje ọgarama-mbo; l'adzụ uke; tụko ẹkfukala, nọ l'ọswa gvua kfurukfuru; k'ọphu bụ l'ire-ọku iya ejije ẹnwuru-ọku iya ala imeli imeli. 
Oke ẹhu-eghughu Ojejoje, bụ Ọkaribe-Kakọta-Ike bẹ a-nganwụ alị ono anganwụ. Ndu ono a-bụru nkụ, aa-nọdu eye l'ọku. Ọphu ọ dụdu onye aphụjeru nwunne iya imiko. 
Ẹphe e-gbu l'ụzo ẹka-ụtara ria; ọbule ẹgu a-nọdu agụle-ẹ ẹphe. Ẹphe anata madzụ iphe l'ẹka-ibyita; too dzukwaphu ẹphe. Onyemonye ọbule a-wata ọta nwatibe iya. 
Mbụ lẹ ndu Manásẹ a-wata ọta anụ ndu Ífuremu; ndu Ífuremu ata kẹ ndu Manásẹ. Ẹphe a-bya atụgbabe; tso ndu Júda ọgu. Obenu l'iphe ono te emedu t'obu tụ-zita Nchileke. Yọ dabẹlee ẹphe ẹka ẹge ọ dabẹru iya. 
