﻿Egvu Sólomọnu.
8.
Ọ dụ mu t'a sụ l'ị bụ nwunne mu nwoke; ngụa nne mu ẹra; mẹ mu etsutaje ngu ọnu; mẹ ayi phụ l'esu-ụzo; to nwe onye a-sụ mu sụu. 
Mu e-duta ngu dubata l'ụlo nne mu, bụ iya bụ onye ziru mu iphe; chebe ngu akụru-akụ mẹe, mu kụtaru l'oshi ụtara-okumu mu. 
Ọ dụ mu t'a sụ l'o cheberu mu ẹka-ibyita iya l'ishi; gude ẹka-ụtara iya rụkota mu. 
Unubẹ ụnwanyi Jerúsalemu; unu kwee mu ụkwa l'unu ta akpatsudu n-yemobu rua teke ọo-bya l'onwiya. 
?Bụ onye bụ onye ono, dakoberu a -phụ mini; e -me ẹkfu iya; shi l'echi-ẹgu abya ẹge ono? Ọ kwa lẹ mkpuli ụdara b'ị zẹ; mu abya akpalia ngu. Ọ bụ l'ẹke ono; bẹ nne ngu tsụtaru ime ngu; bụru l'ẹke ono; bẹ ime taru iya; yọ mụa ngu. 
Mee mu iphe-ọhubama dobe onwongu l'obu; bụru echi-ọhubama, ịigba l'ẹka; kẹle n-yemobu shihukwaru ike l'ọ bụ anwụhu. Okopho iya abụru 'arọ-buta arọ-buta l'ọbu ili. Oonwuje l'ọ bụ ovovo-ọku; mbụ l'ọ bụ oke ire-ọku. 
Ọchi-ọku mini ta azụ-nyighekwa n-yemobu; ọphu ẹnyimu e-kpotaghekwa iya. Ọ -bụru lẹ madzụ gude iphe bụ iphe o nweru tẹ ya zụta n-yemobu; bụkwa ewena bẹ oo-metaru onwiya. 
Ayi nwekwaru nwunne nwanyi, ẹra ta nọkpoduanu l'ọkpoma. ?Bụ ngụnu bẹ ayi e-meru nwunne ayi ono mbọku, nwoke a-jị ajị iya? 
Ndẹge ọ bụ oshi-ẹpoto; mẹ ayi akwaa ya mkpọla-ọcha nkwatankwa l'ẹhu. Ndẹge ọ bụ ibo; mẹ ayi egude oshi sida kụ-chia ya. 
Mu shihuru ike l'ọ bụ ụpho-mkpuma. Ẹra mu vudokwa gamugamu l'ọ bụ ụlo-eli. Onye ono makwarua lẹ mu -nọnyabe iya; bẹ ẹhu a-dụ iya agu. 
Sólomọnu nweru mgbo vayịnu lẹ Bálụ Hamọnu; bya eworu iya ono ye ndu a-nọdu akfụ iya ụgwo l'ẹka. Iphe ndu ono e-wotajeru iya l'onye l'onye l'ọzori akpụru vayịnu ono bụ ẹkpa mkpọla-ọcha iri iri. 
Obenu lẹ mgbo vayịnu nke mu bụ mbẹdua nwe iya. Yọ bụru ẹge dụ mu mma; bẹ mu a-nọdu eme iya. Ẹkpa mkpọla-ọcha iri l'iphe e retaru lẹ vayịnu; bụ nggụbe Sólomọnu e-nweru iya. Ẹkpa mkpọla-ọcha labụ abụru kẹ ndu eletaje akpụru vayịnu ono ẹnya. 
Nggụbe onye ọphu, bu lẹ mgbabu ono; ọnya mu phẹ ngabẹkwaru ngu nchị t'ẹphe nụa olu ngu. Tẹ mu nụedukwa olu ngu! 
Nggụbe; 'a -phụ mini; 'e -me ẹkfu mu; kfụkwaa sangụ-sangụ byakfuta mu ẹge ono, umoro; mẹ nwele akfụje l'ugvu, a kụshiru iphe eshi mkpọ ono!
