﻿Egvu Sólomọnu.
1.
Egvu, kakọta mma l'iphe bụ egvu. Ọ bụ egvu Sólomọnu. 
Nggụbe nwoke ono; nmanụa mu akpa; nggu etsuta mu ọnu; kẹle n-yemobu ngu kakwa mẹe ọtso ẹna. 
Mkpọ, manụ, ị jịru l'atsọ ẹna nshinu. Ẹpha ngu l'eshi mkpọ l'ọ bụ manụ senti, a wụfuru awụfu. Ọ bụ iya meru iphe ụnwu-mgbọko yeru ngu obu. 
Duta mu; t'ayi tụgbu-kebe! T'eze dubata mu l'òbù iya; ẹke ayi a-nọdu t'ẹhu tsọo ayi ẹna; ayi etee ẹswa l'ẹke ị nọ; jaa n-yemobu ngu karia ẹge aajajẹ mẹe. Ọ gbarụphu t'ụnwu-mgbọko yeru ngu obu! 
Unubẹ ụnwanyi Jerúsalemu! A makwaru-a lẹ mu eji uji; obekwanu lẹ mu ama mma; lẹ mu jiru jita l'ọ bụ ụlo-ẹ́kwà ndu Kéda; obenu lẹ mu amakwanu l'ọ bụ ẹkwa, e geru l'ụlo Sólomọnu. 
Unu be elekwa mu phoriphori; okfu l'anwụ chiru mu; mu ejikputa ejikputa! L'ọ kwa unwunne mu; ndu k'unwoke; bẹ ẹhu ghuru eghughu l'ẹke mu nọ. Ẹphe enwuru mu yee; tẹ mu letaje mgbo vayịnu. To nwe teke ụzo, dụjeru mu k'oleta onwomu ẹnya. 
Nggụbe nwoke ono; kanụru mu ẹke iicheje atụru ngu; mẹ ẹke ẹphe atụtaje ume l'eswe; k'ọphu mu ta awatadụ ọgha-phe l'ọ bụ nwanyi ọkpara l'ọdu-atụru ndu ọdo. 
Ọ -bụru l'ẹ tị madu ẹke ọbu; nwanyi-mbeke; bụkwa t'ị tụgbua tsochita owere atụru ono je echee ụnwu eghu ngu l'iku ụlo ụnwu-eswi ndu ono, eche atụru ono. 
Iphe mu atụ ngu eyeru; nwanyi-mbeke; bụ ada-ịnya, akpụje ụgbo-ịnya Fero. 
Iphe-nchị ngu meru ishi-nchị ngu; yọ dụ ùgvù. Ịyagba, i doru l'olu kweru ngu ekwekwe. 
Ayi e-metaru ngu ịyagba mkpọla-ododo, a kpụpyabetsuaru mkpọla-ọcha. 
Teke eze shi dụgaru l'oshi iya; bẹ mkpọ manụ nadi mu ngashịru angashị. 
Nwoke ono dụ mu l'ọ bụ ẹkpa mẹeru, eshi mkpọ, mu tụ-koberu lẹ mkpakụ ẹra. 
Nwoke ono dụkwa mu l'ọ bụ ọfoko igu oshi Hena, eshije kwẹkwekwe, shi lẹ mgbabu ndu Ẹ́nu-Gedi. 
Ị dụ ùgvù; nwanyi mbeke! Iye! Ị dụ ùgvù! Ẹnya ngu dụ l'ọ bụ kẹ ndo. 
Lewaru ẹge ị dụ ùgvù; nggụbe nwoke ono! Iye! Ị dụ k'ekfukfu! Ẹke ayi azẹje azẹe dụ gẹkfungu. 
Osweru, ayi gude kpọo uko ayi bụ oshi sida. Oshi, ayi gude sweshia ya esweshi bụ oshi payịnu. 
