﻿Ẹtu.
25.
Ndu ọwaa; kwaphu ẹtu ẹtu ọdo, Sólomọnu nmashịru. Ndu deru iya l'ẹkwo bụ ndibe Hezekáya, bụ eze ndu Júda. 
Odomi iphe edomi abụjeru Nchileke ugvu. Obenu l'ọvo iphe avọvo bụ ugvu kẹ ndu eze. 
Ọ bụ ẹge igwe habe l'eli; alị adụ-be ogvu; bụ ẹge obu onye eze bụ-be iphe ẹ taa vọ-rudu avọ-ru. 
Kweshia ẹgba, gbaru lẹ mkpọla-ọcha; onye ụzu enweru iphe oo-gude kpụa mkpọla-ọcha, ama mma. 
Rushia ndu ẹjo iya ono l'ẹhu eze; nggu aphụ; aba-eze iya egude odobe-ẹka-ndoo ngụru angụru. 
Ba anọdukwa l'ifu onye eze atụ-li onwongu! Ọphu i jekwa asụgaru l'ẹke ndu oke amadụ nọ! 
Ọ kakwa mma t'ọ bụru yẹbedua e-gbe sụ ngu: “Gbeshi; bya anọdu l'ẹke ọwaa, ka mma;” mẹ l'i gbe je anọdu l'ẹke dụ mma; a sụ ngu t'i lụfuta je anọdu l'ẹke ẹ-ta dụdu mma; nggu emewaphu onwongu iphe-iphere l'ifu oke amadụ ono. 
Ba agbakebejekwa ọso; je ọgbaru madzụ ẹkwo; kẹ l'ọ -bụru l'e mekochaaru; okfu ono nmaa ngu bẹ ọo-ghakọbekwa; mee ngu iphe-iphere. 
Teke nggu lẹ madzụ ibe ngu atụ ntụtego; be ewokwaru iphe madzụ kfuru ngu l'edomi kfua. 
Ọdumeka bẹ onye nụru iya nụ e-mekwa ngu iphe-iphere; Ọphu ẹjo ẹpha, ii-vuta ta byadụ bya alụfu ngu alụfu l'ẹhu. 
Okfu, e kfuru l'ẹge ọ gbaru dụ l'ọ bụ ororo mkpọla-ododo, a gakọberu mkpọla-ọcha. 
Mba, onye maru iphe abaru onye angabẹje nchị l'okfu, eekfuru iya dụkwa l'ọ bụ iphe-nchị, e gude mkpọla-ododo mee; m'ọ bụ iphe ọdo, e gude ọkpobe mkpọla-ododo mee. 
Ọ bụ ẹge aka-mini eguje ẹhu egugu l'oge okpomọku bụ ẹge nwozi, e gude ire iya ẹka eguje ndu ezi iya ozi ẹhu egugu. Mbụ l'oomeje; obu egua ndu nwe iya nụ egugu. 
Onye asa nsasa iphe-ọma, ẹ to medu bẹ dụkwa l'ọ bụ igwe, ruru eruru; bya ephee phẹrephere; tọ chịhe mini. 
Ọ kwa ọta nshi; bẹ e-gude mee onye achị nụ; yo mee iphe ẹ to shidu kwe lẹ ya e-me. Mbụ l'ọo ire-ọma; b'e gude tapyaa ọkpu. 
Ị -phụa manụ-ẹngu; ritakwa iya l'oge-ẹpho ngu; I -rinuka iya; bẹ ịi-gbọkwa iya. 
Jetaje kẹ madzụ l'o-ruberu. L'ị -gbalaha ya ọshitoshi; bẹ ịi-byakwa bya adụ iya ashị. 
Ọ bụ ẹge mgbọro; m'ọ bụ ogu-mbeke; m'ọ bụ akfụ, atsụ nkọ ahụje ọku; bụ ẹge nwoke, agba madzụ ibe iya ẹjo ekebe adụje. 
Ọtu-kobe onye ẹ-te medu ire-lanụ ishi teke iphe atsụ madzụ l'ẹhu; dụkwa l'ọ bụ onye eme t'ọ taa iphe l'eze; iphe eme iya; m'ọ bụ onye eme t'o gude ọkpa, nwụhuru iya anwụhu jee ije. 
Ọgu egvu anụ onye aphụ jiru ọkpoma; dụlekwaphu l'ọ bụ onye yefuru uwe iya teke oyi atsụ iya; m'ọ bụ onye eteru ose l'ẹke ọnya nọ iya. 
Ẹgu -agụ onye ọhogu ngu; nụkwa iya nri t'o ria. Teke mini agụ iya; kekwa ya mini t'ọ ngụa; 
lẹ teke iime ẹge ono; bẹ bụ iphere bẹ iimeta ekpu iya. Iphe ono ahụa ya ọku l'ẹhu. Ọdo abụru lẹ Ojejoje e-bu ngu-a nggo. 
Ọ bụ ẹge phẹrephere, shi ụzo ugvu egudeje mini bya; bụ ẹge okfu-azụ akpatajẹ ọdzu ifu. 
Ọ kakwa mma l'i bu l'azụ-ụtsulo; mẹ lẹ nggu lẹ nwanyi okfu-ọnu bu. 
Ọ bụ ẹge mini, guru egugu adụje onye ẹkpiri akpọ nkụ bụ ẹge ozi-ọma, shi ẹke, teru ẹnya adụje. 
Onye doberu ẹka ndoo -woru onwiya haaru ẹjo madzụ; dụkwa l'ọ bụ ọgba, a swọru aswọswo; mbụ l'ọ bụ nwogvu, a farụshiru afarụshi. 
Ẹ tọ dụdu mma o rinuka manụ-ẹngu. Ọ kwaphụ ẹge ono; b'ẹ t'ọ dụdu mma madzụ o gude ẹka eme t'a kwabẹ iya ugvu. 
Onye, ẹ-ta adụjedu ike ọkpa-de onwiya dụkwa l'ọ bụ mkpụkpu, e nwukposhiru ụpho-mkpuma iya; yo gheru ọnu. 
