﻿Ẹtu.
15.
Olu-odoo eselaje nseku azụ. Obenu l'okfu ẹhuka akpalije ọvuma. 
Ire onye maru iphe ekoshije mmamiphe. Obenu l'onye eswe bụ okfu eswe anọje iya l'ọnu. 
Ẹnya Ojejoje dzuru ẹkemeke ọbule: l'ẹke ndu ẹjo iya; mẹ kẹ ndu ọma. 
Gberuma eji obu oyi; ghẹlegheleghele eye ọku l'obu. 
Ọ bụ onye eswe anyịjeru ẹ̀tsù kpua l'ụzo, nna iya akpọ-ziru iya. Obenu l'onye egomunggo ruru alị; angabẹje nchị l'iphe eezi iya. 
Ụlo onye doberu ẹka ndoo; bẹ ẹku ejije ejiji. Obenu l'ẹjo madzụ; bụ iyi abyajẹ ẹku iya ndzuta. 
Onye maru mmamiphe anọduje araka iya araka t'o dzuru onyemonye ọbule. Obenu l'onye eswe; bẹ ọkpoma iya ta dụdu ẹge ono. 
Ẹja, ẹjo madzụ egwo; kwa akpamara l'ẹnya Ojejoje. Obenu l'ekfukfu, onye obu gụru iphoro ekfu anụ iya abajẹ iya l'obu. 
Ụzo, ndu ẹjo madzụ eshi abụje akpamara l'ifu Ojejoje. Obenu lẹ ndu ese t'ẹphe dobe ẹka ndoo b'o yejeru obu. 
Ọ kwa chịkikfuu bụ k'onye haru ọkpobe ụzo ono. Ọnwu abụru k'onye ọ dụ ashị teke aahụ̀ iya àhụ̀hù. 
Alị-maa; mẹ ọ-la-l'iyi dabukotaru ẹba l'ifu Ojejoje. ?Bụ-chia obu madzụ te gheduru iya ọnu l'ifu tọo? 
Onye ụru-ọnu avọjeru ọku ghụa ẹhu teke a baru iya mba. Ọphu o kwejedu kpanyabẹ ndu maru iphe ẹhu. 
Ẹhu-ọtso-ẹna emeje t'ifu tụsahu madzụ atụsahu. Obenu l'aphụ akpatajẹ ike agvụgvu. 
Onye obu ruru alị anọduje achọ mmamiphe. Obenu l'onye eswe bụlephu ririri b'ọ nọduje ekfu. 
Onye, aakpa ẹhu; bẹ ndzụ iya abụkotaje iphe ọtsu-l'ẹhu. Obenu l'onye ọkpoma tụsahuru atụsahu bẹ tekenteke abụjeru iya ajị. 
Ọ ka mma lẹ madzụ nwepeteru iphe enwepete; l'atsụ Ojejoje egvu; mẹ l'ẹku, o nweru; dzuru mgboko; iphe-ẹhuka eswiru iya. 
Ọ ka mma l'ọo mkpẹkwo; bụwaphu nri, nọnu; e gude n-yemobu l'ata iya; ma l'e gburu ọkpalukpo; gude ntafashị-ifu l'ata iya. 
Onye obu-ọku akpalije okfu akpali. Obenu l'onye, ataru okfu ǹshì anọduje abyanyi ụswo abyanyi. 
Iphe onye ẹnyiru yeru ẹka adụje l'e gude ogvu tụ-chishia ya atụ-chishi. Obenu lẹ kẹ onye obu gụru iphoro adụje werewere. 
Nwata, maru iphe emeje t'ẹhu tsọ nna iya ẹna. Obenu l'onye eswe; bẹ nne iya adụje ashị. 
Ome eswe atsọje onye ẹ-te nwedu egomunggo ẹna. Obenu l'onye nweru egomunggo emeje iphe iya; yọ kfụru nhamụnha. 
Onye ẹ-te nwedu onye atuziru iya ụzo; te nwekwa iphe oomekotajedu. Obenu l'a -dụ l'igwe chịa idzu; e mekota iphe a tụberu. 
Madzụ -yee ọnu l'okfu yechata iya; bẹ ẹhu atsọje iya ẹna. Ọnu, e yeru l'o ruberu iya abụru iphe ugvu. 
Onye maru iphe echibeje ifu l'ụzo ọphu edu ala lẹ ndzụ; onye eswe echebe nk'iya l'ụzo ọphu edu ala l'ọku alị-maa. 
Onye eku onwiya ekuku; bẹ Ojejoje enwutsuje. Obenu lẹ nwanyi, nji iya ẹ-ta nọhedu b'ọ dzọtajeru alị iya. 
Ọriri, ẹjo madzụ arị bụ akpamara l'ẹke Ojejoje nọ. Obenu l'ọriri kẹ ndu ọma adụje iya mma. 
Onye ẹkpiri erilatajeru ụlo iya iphe-ẹhuka. Obenu l'onye kpọru ẹka-azụ ashị; bẹ ndzụ e-dzu. 
Onye doberu ẹka ndoo arị-jeodu iphe oo-kfu arịri. Obenu l'ẹjo madzụ; bụ ẹjo okfu eshije iya l'ọnu. 
Ndu ẹjo madzụ; bẹ Ojejoje anọje ote-ẹnya. Ọ bụ l'ọonuje iphe ndu doberu ẹka ndoo ekfu anụ iya. 
Ifu-ọchi emeje t'ẹhu tsọ madzụ ẹna; nzi ọma l'eshije madzụ uri jeye l'ọkpu. 
Onye ngabẹru nchị lẹ mba, anụ ndzụ, a baru iya; bẹ yẹle ndu maru iphe e-mekochaa nọdu l'ọkpoku lanụ. 
Onye ẹ-te nwedu iphe ọ gụberu àhụ̀hù, aahụ̀ iya; bụ ashị b'ọ dụ onwiya. Obenu l'onye a hụ̀ àhụ̀hù; yọ nụa ya bụ onye nweru egomunggo. 
Ọtsu Ojejoje egvu ezije madzụ mmamiphe; ọdo abụru l'i -wozita onwongu alị; ugvu etso iya. 
