﻿Ẹtu.
9.
Mmamiphe gbeshiru je akpụa ụlo; bya eworu itso ẹsaa gvua ya. 
Yo gbushia anụ; shia dobe; bya akụa mẹe; shia ite dobe. 
Yọ bya ezi ụnwu-mgbọko, ejeru iya ozi t'ẹphe je evudogbaa l'ẹke, katsụa l'eli lẹ mkpụkpu ono; raa ya arara; sụ: 
“T'iphe bụ ndu egomunggo swehuru bya.” Ndu eswe b'ọ sụru: 
“Unu bya eria nri, ya shiru; unu angụa mẹe, ya kụru dobe. 
Unu haa ome eswe; tẹ ndzụ dzua unu! T'iphe dojenua unu ẹnya! 
Onye, abaru onye ụru-ọnu m̀bà bụkwa iphere b'oo jetaru onwiya. Onye alọkwanu ẹjo madzụ ẹka lẹ nchị abụru ụswo b'ọ chọ. 
Ba ahụjekwa onye ụru-ọnu ọgbo; ọdumeka bẹ ii-dụkwa iya ashị. Bachịaru onye maru iphe mba; nggu aphụ l'oo-yeru ngu obu. 
Lọo onye maru iphe ẹka lẹ nchị; nggu aphụ l'ọo-kabaaru ọmaru iphe; Kuziaru onye doberu ẹka ndoo iphe; yọ kabaaru ọmaru iphe. 
Ọ kwa ọtsu Ojejoje egvu bụ ẹke mmamiphe dụberu. Ọmaru Onye ono, dụ Nsọ ono abụru iya bụ iphe-odo-ẹnya. 
Kẹ l'ọ bụ yẹbe mmamiphe e-me t'ị kaa nka; nọribabee lẹ mgboko-a. 
Onye maru iphe; bẹ mmamiphe ebuje nggo. Onye ụru-ọnu abụru iya nwẹnkinyi iya e-ri iphe tso iya nụ.” 
Nwanyi, eme eswe; bẹ olu iya anọduje ada eli eli. Ẹ ta hụ̀du iya àhụ̀hù; to nwe iphe ọ maru. 
Ọ dụgajeru l'ifu ibo iya. Ẹke, kakọta l'eli lẹ mkpụkpu abụru ẹke, o jeje je asụgabe onwiya; 
l'eku iphe bụ ndu eswe esweswe, ejeru iphe ẹphe eje: 
“T'iphe bụ onye eswe bata ẹke-a!” Ndu ọphu egomunggo swehuru bẹ ọosuje: 
“Lẹ mini, e zitaru ezita adụjekwaa mma; nri, e riru lẹ mpya abụru iya kakọta ọtso ẹna!” 
Obenu l'ẹphe ta madụ lẹ ndu, nọ l'ụlo iya bụwa ndu maa. Ndu, byaru iya ẹbyee anọduwa l'alị-maa. 
