﻿Egvu-Ọma.
146.
Tẹ mu jakwaa Ojejoje ajaja. Byiko; tẹ mu jakwaa Ojejoje ajaja. 
Mu a-nọdu aja Ojejoje ajaja jeye teke mu a-nọ-bebe. Mu a-nọdu agụ egvu, mu gude aja Nchileke mu ajaja gbururu jeyewaru. 
Ba akpọkwaru obu yeru ndu ishi; mbụ madzụ mmanu, ẹ-ta adụdu ike adzọta madzụ. 
Teke ẹphe nwụhuru; ẹphe ala azụ je abụru ẹja. Ọ bụ mbọku ono gẹdegede; bẹ iphe, bụ iphe, ẹphe chịru k'ememe atụkoje gvụ. 
Ọnu-ọma bụ k'onye, bụ Nchileke kẹ Jékọpu eyejeru iya ẹka; mbụ onye, bụ l'ẹke Ojejoje, bụ Nchileke iya nọ; bẹ ọochijeru ẹnya dobe; 
mbụ Nchileke ono, bụ onye meru igwe mee alị; bya emee eze ẹnyimu; mẹ iphemiphe ọbule nọ iya nụ; bya abụru onye evudoshije ike l'ire-lanụ jeye lẹ tutu yoyo. 
Ndu aakpa ẹhu bẹ ọohajeru enge; l'anụje ndu ẹgu agụ nri. Ojejoje emeje tẹ ndu a tụru mkpọro nweru onwẹphe. 
Ojejoje emeje tẹ ndu atsụ ìshì wata ọphu ụzo. Ookulije ndu e wozitaru alị; l'eyejeru ndu doberu ẹka ndoo obu. 
Ojejoje bụ iya anọduje eche ndu, laru alala nche; l'eche ụnwegirima, a tọru ogbe; yẹle ụnwanyi, nji ẹphe ta nọhedu. Obenu lẹ ndu akirishi bẹ ọogbachije ụzo. 
Ojejoje a-bụru eze jeye lẹ tutu yoyo; mbụ lẹ Nchileke kẹ nggụbe Záyọnu a-bụru eze chịa tsube l'ọgbo sweru ọgbo. Unu jaa Ojejoje ajaja. 
