﻿Egvu-Ọma.
141.
Egvu-ọma, Dévidi deru Nggụbe Ojejoje; mu araku ngu. Gbanuaru mu mkpu ẹgwegwa. Nụnua olu mu teke mu rakuru ngu. 
Tẹ ekfukfu, mu ekfu anụ ngu shikwa ngu mkpọ l'ọ bụ ínsẹnsu. Tẹ ẹka, mu chiliru imeli l'ekfu anụ ngu dụkwa ngu l'ọ bụ anụ, e gburu gude egworu ngu ngwẹja l'ụzo-urẹnyashi. 
Yetanuru mu ẹka; nggụbe Ojejoje; tẹ mu dobe ọnu ndoo. Menua tẹ mu daa ashị. 
Be ekwekwa t'ẹgu ome ẹjo iphe wata mu agụgu; ọphu mu 'etsokwaru ndu akirishi wata ome ẹjo iphe. Be ekwekwa tẹ mu tsoru ẹphe ria iphe ẹphe kwakọberu. 
T'onye doberu ẹka ndoo chia mu rụ iphe. Ọo-dụ mu rụ l'ọ bụ iphe-ọma; yo meeru mu iya. T'ọ baaru mu rụ mba. Ono e-gberu dụ mu l'ọ bụ manụ, eshi mkpọ bẹ ọowu mu l'ishi. Ọo-nọduru atsọ mu ntụmatu. Obenu lẹ mu a-nọdujelephu ekfu anụ ngu; sụ t'i mee t'ẹjo idzu ndu akirishi ba avụ. 
Ndu ishi ẹphe; bẹ ee-shi l'ọnungonu ẹke ẹphe nọ nwutsushia. Teke ono; ndu akirishi amaru l'iphe mu kfuru bụ oswi-okfu. 
Ẹphe asụ: “L'ọ bụ ẹge eegvukposhije alị; kọo ọkori-a bụ ẹge a tụkashiru ọkpu ayi nanụ nanụ l'ikiri-kpọo.” 
Obenu lẹ mbẹdua bụ l'ẹke ị nọ bẹ mu doberu ẹnya; nggụbe Ojejoje, bụ Nnajiufu mu. Ọ bụ l'ime ngu; bẹ mu gbabaru tẹ mu nọdu zeeru ndzụ. Byiko; be enwukwaru mu haaru ọnwu. 
Menua tẹ mu ba adalahụ l'ọnya, ẹphe gbaru mu; mbụ l'igbudu, ndu akirishi gbaru doberu mu. 
Tẹ ndu akirishi nmakwaa l'ụgbu, ẹphe geberu. Tẹ mbẹdua sweta; t'ẹ b'ọ dụ iphe e-me mu nụ. 
