﻿Egvu-Ọma.
139.
Egvu-ọma, Dévidi deru nụ onye ishi egvu Nggụbe Ojejoje; ị vọwaru mu ọkpoma; maru ẹge mu gbaru. 
Ị maru teke mu nọdu anọdu; maru teke mu gbeshiru egbeshi. Ịinoduje ote-ẹnya maru iphe mu arị l'obu mu. 
Ị maru teke mu gbeshiru l'eje iphe; maru teke mu zẹ azẹe. Iphe bụ ụzo mu l'ọ ha dokotaru ngu ẹnya. 
Ọobuje; okfu -bya eshi mu l'ọnu lụfuta; b'ị makọtawaru iphe mu abya ekfukfu; nggụbe Ojejoje. 
Ị nọ-pheru mu mgburumgburu: ifu l'azụ. I wowaru ẹka ngu byabẹ mu l'ishi. 
Amama ono, ị maru mu ono dụkwa mu biribiri; ọ bụlephu l'ẹ to dodu mu ẹnya. 
?Bụ awe bẹ mu a-nọdu, bụ ẹke Ume ngu ta nọdu? ?Bụ awe bẹ mu a-gbaru laa, bụ ẹke ẹ tịi phụdu mu? 
Mu -pheru lashia l'imigwe; b'ị nọwa l'ẹke ono. Mu -tụgbua; je agbaa oshi-azẹe mu l'alị-maa zẹru; b'ị nọkwa iya phụ. 
Mu -phehu pheru phesweta ụzo ẹnyanwu-ahata tụgbua; m'ọ -bụ pheru pherua ẹke ẹnyimu tsọ-beru gbụru; 
l'ẹke ono bẹ ịi-nọdulekwaa edu mu; gude ike ngu l'eyetaru mu ẹka. 
Mu -sụ lẹ mu marua l'ọchi e-domi mu; l'iphoro a-bụru-a ẹnyashi; nọ-phee mu anọ-phe; 
bẹ ii-koshile-e l'ọchi ono ta bụdu ọchi l'ẹke ị nọ. Ẹnyashi ono a-nọdu echile-e swachaswacha l'ọ bụ echi eswe; kẹle nggụbedua bẹ ọchi dụle-ẹ l'ọ bụ iphoro. 
Kẹ l'iphemiphe ọbule, nọ mu l'ime ẹhu bụ nggu meru iya; bụru nggu dzekfuru mu teke mu nọ nne mu l'ẹpho. 
Mu aja ngu ajaja; kẹ l'i meru mu l'ụzo, dụ egvu bya adụ biribiri. Iphe doru mu ẹnya ọhuma bụ l'ozi ngu dụ biribiri. 
Ọkpu, nọ mu l'ẹhu l'ọ ha ta dụdu ọphu e domiru ngu edomi teke ono, eeme mu l'edomi ono. Teke a nọ l'ẹke miru emimi dzekfua mu; mu abụru nanụ; 
b'i gudehawa ẹnya ngu phụa ugwẹhu mu ọphu ẹ tii dzekfudua ẹge ọo-dụ. Tsuberu lẹ mbọku k'ọdungu; b'a tubuhawaru rụ ujiku ole, mu a-nọ lẹ mgboko-a; mbụ dehawa iya rụ l'ẹkwo ngu. 
Ọriri ngu dụkwa mma; nggụbe Nchileke. A -chịkobe iya achịkobe; b'ọ hakwa nshinu. 
Ọ -bụru tẹ mu wata iya agụgu; b'ọ kakwa ẹja, nọ l'alị l'igwe. Mu -kua mgbẹnya; tehu; bẹ mu lẹ nggu nọkwaa ẹge ayi nọ. 
Nggụbe Nchileke; ọ dụ mu t'a sụ l'ị chiko ndu akirishi gbushia. Unu paru mu haa; unubẹ ndu ono, ogbu ọchi anọduje agụ l'ọ bụ onye mini agụ ono. 
Ndu ono anọduje ekfubyishi ẹpha ngu ekfubyishi; chịta onwẹphe koga-beru ngu k'ome iphe dụ ẹji. 
Iphe bụ ndu nggụbe Ojejoje dụ ashị; bẹ dụkwa mu phụ ashị. Iphe bụ ndu etso ngu okfu; bẹ mu a-nọdu akpọ-yiru ukuvu. 
Ẹphe adụje mu ashị dụshia mu iya ike; mbụ lẹ mu agụkobeje ẹphe lẹ ndu ọhogu mu. 
Vọchanua mu ọkpoma; nggụbe Nchileke; maru iphe nọ mu l'obu. Datanu mu; maru ẹge ọriri mu gbaru. 
Lenua mu ẹnya maru; ?m'o nweru ẹke ụzo kpọ-swehuru mu. Ọ -bụru l'o nweru; t'i dulata mu azụ l'ụzo kẹ ndzụ ojejoje. 
