﻿Egvu-Ọma.
138.
Egvu, Dévidi deru Nggụbe Ojejoje; mu e-gude obu mu l'ọ ha jaa ngu ajaja. Mu a-nọdu l'ifu agwa gụa egvu gude jaa ngu ajaja. 
Mu e-byishi ikpere l'ụzo eze-ụlo ngu, dụ nsọ; baaru ngu ẹja. Mu a-ja ẹpha ngu ajaja; kẹ l'ị bụ onye n-yemobu; bụru o-me-g'o-kfuru; kẹ l'i meru ẹpha ngu yẹle okfu ngu; yọ kakọta iphemiphe ọbule l'eli. 
Teke mu rakuru ngu; b'ị zaru mu. I meru; ike adụ mu; bya emee mu; mu anyalaha ǹdụ́. 
Iphe bụ eze ụnwu eliphe l'ẹphe ha a-ja ngu ajaja; nggụbe Ojejoje; mẹ ẹphe -nụa okfu, shi ngu ọnu. 
T'ẹphe gude ụzo kẹ Ojejoje gụa l'egvu; kẹ l'ọdu-biribiri iya ha nshinu. 
A makwaru-a lẹ Ojejoje nọ oreke-imeli; obenu l'ẹnya iya anọkotaje l'ẹke ndu ẹnya ẹphe larụ alị nọ. Ndu eku onwẹphe ekuku; bẹ ọonoduje ote-ẹnya maru. 
Ẹ to nwedu m'o -ruhuru; iphe-ẹhuka gbaa mu mgburumgburu; iidobejele mu-a ndzụ; t'ẹ b'ọ dụ iphe e-me mu nụ. Iigudeje ike ngu nwulala ẹphe azụ; mbụ ndu gude iwe l'achị mu. Yọ bụru ike ngu ono; bẹ iigudeje dzọfuta mu. 
Nchileke, a-chịko iphe bụ mkpa mu meeru mu. Nggụbe Ojejoje; n-yemobu ngu anọje jeye lẹ tutu yoyo. Byiko; ba ahakwa ozi ono, i gude l'ẹka ono. 
