﻿Egvu-Ọma.
127.
Egvu, aagụje teke eeje Jerúsalemu; onye deru iya nụ bụ Sólomọnu Ọ -bụru lẹ Ojejoje ta kpụdu ụlo l'onwiya; kwa aphụ bẹ ndu akpụ iya nụ eri. Ọ -bụru lẹ Ojejoje te chedu mkpụkpu; kwa aphụ bẹ ndu eche iya nụ eri. 
Ọ kwa kẹ mmanu; bẹ iitehuje lẹ nchi-abọhu; bya alasweta alasweta; ẹke iise akanya nri, ii-ri; kẹle ndu Ojejoje yeru obu abụje: ẹphe zẹkwadurua lẹ mgbẹnya; yo wotawaru ẹphe iphe ẹphe e-ri. 
Ụnwegirima bụ òkè-iphe shi Ojejoje l'ẹka; Ọtsu ime abụru obunggo, shi Ojejoje l'ẹka. 
Ụnwegirima, a mụru l'okorọbya adụ l'ọ bụ akfụ, nọ l'ẹka mkparawa. 
Ọnu-ọma bụ k'onye chị iya chị-jia ẹkpa iya. Iphere te emedu iya teke yẹle ndu ọhogu iya aswọ ụswo l'obu-edukfu mkpụkpu. 
