﻿Egvu-Ọma.
115.
Ẹ tọ bụkwa ayi; bẹ aa-kwabẹ ugvu, gbaru nggụbe Ojejoje. Ẹ tọ bụkwa ayi. Ọ kwa nggụbedua nwẹnkinyi; bẹ gbaru t'a kwabẹje ngu ugvu. Ono kẹ l'i yenukaru ayi obu; bya abụru o-me-g'o-kfuru. 
?Bụ ngụnu meru iphe ndu ọhodo ajị; sụ: “?Nanụ Nchileke ayi?” 
Nchileke ayi nọnu l'imigwe. Yọ bụru iphe dụ iya mma; bẹ oomeje. 
Obenu l'agwa ẹphe bụ mkpọla-ọcha yẹle mkpọla-ododo; mbụ iphe, bụ madzụ gude ẹka mee ya. 
Ẹphe nweru ọnu; ẹphe te ekfu okfu; nweru ẹnya; ẹphe ta aphụ ụzo. 
Ẹphe nweru nchị; ẹphe ta anụ iya iphe; nweru imi; ẹphe te egude iya l'akpọ ẹgburu iphe. 
Ẹphe nweru ẹka; ẹphe egude iya ewota iphe; nweru ọkpa; ẹphe te eje ije; ẹphe te ekfu okfu. 
Ndu agwa iya nụ; mẹ ndu dakoberu iya nụ a-dụ ẹge agwa ono dụ. 
Unubẹ ndibe Ízurẹlu; unu dakobe Ojejoje; kẹ l'ọ bụ iya eyejeru unu ẹka bya abụru iya egbochitaje unu. 
Unubẹ ndibe Érọnu; unu dakobe Ojejoje; kẹ l'ọ bụ iya eyejeru unu ẹka bya abụru iya egbochitaje unu. 
Unubẹ ndu atsụ Ojejoje egvu; unu dakobe Ojejoje; kẹ l'ọ bụ iya eyejeru unu ẹka bya abụru iya egbochitaje unu. 
Ojejoje anyatajẹ ayi; ọo-gọru ayi ọnu-ọma. Ọo-gọru ọnu-ọma nụ ndu ọnu-ụlo Ízurẹlu; gọru ọnu-ọma nụ ndu ọnu-ụlo Érọnu. 
Ọo-gọru ọnu-ọma nụ ndu atsụ Ojejoje egvu; ndu ukfu; lẹ ndu ńtà. 
Tẹ Ojejoje mekwaa t'unu jáá ájaja ka l'igwe; unubẹdua l'onwunu; mẹ l'ụnwegirima unu. 
Tẹ Ojejoje gọkwaaru unu ọnu; mbụ onye ono, bụ iya meru igwe; mee mgboko ono. 
Imigwe l'o ha bụkota kẹ Ojejoje. Obenu lẹ mgboko b'o wowaru nụ madzụ. 
Ẹ tọ bụkwa ndu nwụhuru anwụhu ajajẹ Ojejoje ajaja; mbụ ndu lawaru alị ono, bụ e -rua ya; a daa ashị ono. 
Ọ kwa ayịbedua a-nọdu ekutse Ojejoje. Ayi a-nọdu ekutse iya nta-a; kutsewa iya rụ jeyewaru. T'ajaja bụru kẹ Ojejoje. 
