﻿Egvu-Ọma.
106.
T'ajaja bụru kẹ Ojejoje. Unu kele Ojejoje ekele; kẹ l'ọ bụ onye, dụ mma; kẹle n-yemobu nk'iya anọje jeye l'ojejoje. 
?Bụ onye a-dụ ike tụa ọnu ẹge iphe Ojejoje eme habe nshinu? Tọo; ?nanụ onye a-dụ ike tukota Ojejoje ẹpha iphe oomeebe. 
Ọnu-ọma bụ kẹ ndu eme iphe vudo nhamụnha; mbụ ndu ono, anọduje eme iphe dụ mma tekenteke ono. 
Nggụbe Ojejoje; nyatakwa mu teke ịi-wata okoshi lẹ ndibe ngu nọ ngu l'obu. Gbakwaaru mu mkpu teke ịi-bya ẹphe adzọfuta; 
k'ọphu mu a-phụ k'ọma, i doberu ndu ị fọtaru; tsokwaru phụ mba ono, bụ nke ngu ono tee ẹswa; mbụ tsoru ndu ono, bụ òkè-iphe ngu ono jaa ngu ajaja. 
Ayi meekwaru iphe dụ ẹji ẹge nna ayi oche phẹ meru. Ayi mewaru iphe dụ ẹji; mee iphe ẹ ta dụdu mma. 
Teke nna ayi oche phẹ shi nọdu lẹ Íjiputu bẹ iphe dụ biribiri, i meshiru te shidu doo ẹphe ẹnya; ọphu ọ dụdu ikpoto iphe-ọma ngu, ono nweru ọphu ẹphe nyataru. Ẹphe kwefuru ngu íkè lẹ Eze Ẹnyimu Uswe. 
Obenu l'o gude k'okfu ẹpha iya; dzọfuta ẹphe; k'ọphu aa-maru l'ọkpehu iya ha nshinu. 
Ọ baru Eze Ẹnyimu Uswe mba; mini, nọ iya nụ atashịhu. Yo dua ẹphe swee echi mini l'ọ bụ onye eswe l'echi-ẹgu. 
Ọ dzọfutaru ẹphe l'ẹka ndu ọhogu ẹphe; gbafụta ẹphe l'ẹka ndu ẹphe dụ ashị. 
Mini rigbushikotaru ndu ọhogu ẹphe; tọ dụ m'ọo bụ onye lanụ, waru nụ. 
Ọ bụ teke ono; bẹ ẹphe kwetaru l'iphe o kweru ụkwa ememe bẹ oomeje. Ẹphe abya agụa egvu gude jaa ya ajaja. 
Iphe ono b'ẹ ta nọdu ọphu baru ishi; ẹphe azahaa iphe ono, o meru ono; ọphu ẹphe ejebua ya ọkpata ishi. 
Ẹphe erua l'echi-ẹgu ono; wata ome iphe ẹgu iya agụ ẹphe. Yọ bụru l'alị ono, daburu swanmangu ono; bẹ ẹphe dataru Nchileke. 
Yọ nụnu ẹphe iphe ẹphe sụru t'a nụ ẹphe; nụtsua ya ẹphe; bya evuru ẹjo iphe-ememe byabẹ ẹphe. 
L'ọdu ndu Ízurẹlu; l'echi-ẹgu ono; b'o nweru ndu wataru ogvuru Mósisu yẹle Érọnu ẹnya-kfụrukfuru; mbụ ndu ono, Ojejoje fọtaru dobe iche ono. 
Ya ndono; alị ekejahu ẹbo lee Detanu; bya atụko Ebiramu yẹle ndu tso iya nụ lia lẹ ndzụ. 
Ọku enwulihu; dzụkota ndu etsoje ẹphe. Ọku ono atụko ndu akirishi ono dzụkota. 
Ẹphe erua l'ugvu Họ́rebu; je egude mkpọla-ododo kpụa nweswi dobe; balahaaru iya ẹja l'ọ bụ nte. 
Ẹphe egude ọdu-biribiri kẹ Nchileke gbanweta iphe a kpụru; yọ dụ l'ọ bụ eswi, atajẹ ẹwu. 
Ẹphe azahaa Nchileke ono, dzọfutaru ẹphe ono; mbụ onye ono, meru iphe ha nshinu l'alị Íjiputu; 
bya emee iphe dụ biribiri l'alị Hamu; bya emekwaaphu iphe dụ egvu lẹ Eze Ẹnyimu Uswe ono. 
Tọ dụ iya bụ; Nchileke asụ lẹ ya e-mebyishi ẹphe. Obenu lẹ Mósisu, bụ onye ọ fọtaru; jeru je akfụ-chia ụwara, o shi abya; t'ẹ b'o gude oke ẹhu-eghughu iya mebyishikota ẹphe l'ẹphe ha. 
E metsua; to nwehe iphe ẹphe gụberu ẹgiri alị ono. Ẹphe te kwe lẹ Nchileke e-mekwadu iphe o kweru ụkwa iya. 
Ẹphe anọshia l'ụlo-ẹ́kwà ẹphe; wata ọgu aphụ; jịka ome iphe Ojejoje sụru t'ẹphe mee. 
Tọ dụ iya bụ; yo ribua lẹ ya e-me t'ẹphe nwụshihu l'echi-ẹgu ono; 
tẹmanu ya abya eruta ụnwu ẹphe je eye ndu ọhogu ẹphe l'ẹka. Ẹphe achịkashia ẹphe; ẹphe agbaa nanụ nanụ; dzuru ẹkemeke ọbule. 
Ẹphe egbeshi je eworu onwẹphe gọo lẹ Bálụ-Peyọ; bya awata ori iphe e gude gwaaru agwa, ẹ ta nọdu ndzụ. 
Ẹphe emee; Ojejoje avụlahaa ọvuma k'ẹjo iphe, ẹphe eme. Mgbọnwu adakfutanu ẹphe. 
Ọle Finehasu gbeshiru bya egboo ọgu ono; shi ẹge ono mee tẹ mgbọnwu ono kfụshi. 
A gụaru iya ẹya l'odobe-ẹka-ndoo, e-shi l'ẹhu iya sweru eri iya tsube l'ọgbo sweru ọgbo. 
L'ẹphe ruru lẹ mini Meriba; bẹ ẹphe kpatsuru Ojejoje iwe. Mósisu eshi ẹphe l'ẹka kpata kpube onwiya. 
Ọ bụ okfu l'ẹphe kwefuru Ume Nchileke íkè meru iphe Mósisu kfuru iphe ẹ tọ ga ekfudu. 
Ẹphe ajịka l'ẹphe ta alụ-gbudu ndu ono, ẹphe jekfuru l'alị ono; ẹge Ojejoje tụru ẹphe ekemu; sụ t'ẹphe lụa ẹphe. 
Iphe ẹphe mechiaru bụ l'ẹphe lẹ ndu ono bya alụ-gbalahaa nwanyi. Ẹphe l'ẹphe abya agbaa ẹghirigha; ẹphe awata ome ome-l'alị ndu ono. 
Ẹphe awata ọbaru agwa ndu ono ẹja. Iphe ono emekochaa bụru ọnya; nma ẹphe. 
Ẹphe egude ụnwu ẹphe ndu k'unwoke lẹ ndu kẹ ụnwanyi; wata ọgwa ẹjo maa. 
Ẹphe awata ogbushi ụnwu ẹphe, ẹ ta dụdu iphe ẹphe meru; gude l'agwa nte ndu Kénanu. Ẹphe egude mee ụnwu ẹphe ono merushia alị ono; 
bya eshikwaphu ẹge ono merushia onwẹphe; shi ẹge ono dụ l'ọ bụ nwanyi ẹ te gudedu ire iya ẹka l'ẹke Nchileke nọ. 
Ọo ya meru iphe ẹhu ghulaharu Ojejoje eghughu l'ẹke ndibe iya nọ; yọ kpọ-yilahaaru ndu ono, bụ òkè-iphe iya ono ukuvu. 
Yọ chịru ẹphe ye l'ẹka ndu ọhodo. Ndu ẹphe dụ ashị abụru eze; chịlahaa ẹphe. 
Ndu ọhogu ẹphe akpalahaa ẹphe ẹhu. Ndibe Nchileke abya anọdu ẹphe l'ẹka. 
Ugbo olemole; b'ọ dzọfutaru ẹphe. Ọ bụ l'ẹke uche adụjee ẹphe bụ ẹge ẹphe e-shi kwefuru Ojejoje íkè. Ẹphe eshi ẹge ono kwaa l'ẹjo iphe ẹphe; nọdu iya yifu. 
Ọle ọobuje; iphe-ẹhuka -byakfuta ẹphe; ẹphe -raku Nchileke; yo rua ya l'ẹhu ẹgwegwa; yọ nụa olu ẹphe. 
Yo gude okfu ẹhu ẹphe nyata ọgba-ndzụ iya; gude kẹ l'o yeru ẹphe obu selaa ẹka azụ; 
mee t'iphe bụ ndu kpụru ẹphe lẹ ndzụ phụaru ẹphe imiko. 
Nggụbe Ojejoje, bụ Nchileke ayi; dzọfutanu ayi. Shinu l'iphe bụ mbakeshi ono chịlata ayi ọdo; k'ọphu ayi e-tu ngu ẹpha; nggụbe onye ono, dụ nsọ ono. 
T'ajaja bụru kẹ Ojejoje; bụ Nchileke kẹ ndu Ízurẹlu gbururu jeye lẹ gbururu. T'onyemonye ọbule sụkwa: “Ono ẹge ọ dụ!” T'ajaja bụru kẹ Ojejoje! 
