﻿Egvu-Ọma.
104.
Tẹ mbẹdua jaa Ojejoje ajaja. Nggụbe Ojejoje, bụ Nchileke mu; ị ha nshinu. I gude ugvu yẹle ọdu-biribiri nmaa onwongu l'ọ bụ onye nmaru ẹkwa. 
Iphoro b'i yeru l'ọ bụ onye yeru uwe. Imigwe l'ọ ha bụ nggụbedua phụshiru iya l'ọ bụ ụlo-ẹ́kwà; 
bya eworu uko ụlo ngu gbaa l'eli mini. I meru urukpu; yọ bụru ụgbo-ịnya ngu; Nggu atukojeru phẹrephere l'ẹ́bà ephe. 
I meru phẹrephere; yọ bụru nwozi ngu; bya emee ọ-ta-chịchichi ọku; yọ bụru onye, iizije ozi. 
Ọ bụ nggu tọru ntọ-l'alị mgboko l'ọ ha; k'ọphu bụ l'ẹ to nwedu l'e nwungaa ya enwunga jeye lẹ tutu yoyo. 
I woru eze ẹnyimu yee mgboko l'ọ bụ uwe; k'ọphu bụ lẹ mini kpukotaru iphe bụ ugvu ekpukpu. 
Obenu l'ọo m̀bà b'ị baru mini; yọ gbaa mgbalanụ. Ọ nụleruphu ọra, ị nọ l'imigwe raa; gbalaa. 
Yo shi l'iphe bụ ugvu ono; kekashia lẹ nsụda lẹ nsụda; tsọkwaseru l'ọswa ẹke, ị tọru iya t'o shije. 
Ị kpawaru iya oke ẹke ẹ tọo tsọ-swetajedu; k'ọphu bụ l'ẹ t'o nwedu l'o rimia mgboko erimi ọdo. 
I mewaru tẹ mini shije l'ọgba gbaa gẹregere kwasẹru ọkpa-ugvu. Ootsojeru tụgbua mgbaku mgbaku ugvu. 
Yọ bụru iya echebeje ụnwu anụ, bu l'ẹgbudu mini angụngu l'ẹphe ha. Ọ kwa iya phụ bẹ nkakfụ-ịgara-ọswa egudeje gboo onwiya ẹgu mini. 
Ụnwenu, ephe l'eli anọduje l'iku mini ono kpaa ẹkfuna. Ẹphe ebepheje l'ẹkali-oshi ono l'agụ egvu. 
Ọonoduje l'ẹke, o bu l'achịru iphe bụ ugvu ono mini. Mgboko l'ọ ha bẹ iphe oome dụ mma. 
Ẹwu b'o meru; yoo fushije; k'ọphu elu a-tajẹ nri; bya emee iphe-akọko dobe tẹ madzụ kọjee; kọbe iphe l'alị; 
gude iya kụta mẹe, madzụ a-ngụje t'ẹhu tsọ iya ẹna; bya emeta manụ, emeje tẹ ifu mụ madzụ amụmu; mẹ nri, madzụ erije nọdu ndzụ. 
Oshi Ojejoje bẹ ọogbaje mini ọhuma; mbụ oshi sida ọphu nọ l'ugvu ugvu Lébanọnu, bụ oshi ọphu o yeru l'onwiya. 
Yọ bụru l'eli ẹke ono; bẹ nwẹnu akpajẹ ẹkfuna. Ọku-eswi-ụda eworu oshi payịnu mee ufu iya. 
Iphe butsua l'iphe bụ oke-ugvu ono bụ eghu-ọswa. Ndu ọphu, bụ ọgba mkpuma abụru ẹke nchi-ọ̀gbà anọduje ezeru ndzụ. 
O meru ọnwa dobe t'e gude iya gụje oge. Ọphu, bụ ẹnyanwu amaru teke ya a-rịba. 
Ọobuje; teke i meru tẹ ọchi gbaa; yọ bụru iya bụ lẹ nchi ejihu. Iphe bụ anụ, bu l'ọswa eshi l'ẹke ọ nọ wụfuta jeshia ọcho iphe oo-ri. 
Agụ anọduje ede ekiri; l'achọ nri, oo-ri; mbụ nri, shi Nchileke l'ẹka. 
Ẹnyanwu -halẹphu; ẹphe anyịgobe; lashia; je eworu onwẹphe domishia l'ọgba ẹphe. 
Madzụ egbeshi teke ono jeshia l'ẹgu. Yọ nọdu l'ẹgu jee ozi jeye l'urẹnyashi. 
Nggụbe Ojejoje; ozi, iijekota bụkwa 'agụta agụta. Iphemiphe ọbule ono bụkota mmamiphe nke ngu b'i gude mekota iya; mbụ lẹ mgboko l'ọ ha; bẹ iphe jiru iya nụ bụkota iphe nggụbedua gude ẹka ngu mee. 
Eze Ẹnyimu ha nshinu; bya aha ụsa. Yọ bụru l'ime iya; bẹ ụnwu anụ, bụ 'agụta agụta bu; mbụ iphe nọ ndzụ; ndu ọphu ha nshinu; mẹ ndu ọphu ha nwanshị. 
Ọ bụ l'eli mini ono; bẹ ụgbo-mini ono eshije. Bụkwaru iya phụ; bẹ ẹjo agiyi ono, bụ nggu gude ẹka ngu mee ya; yọ nọdu iya ebu nggada. 
Iphemiphe ọbule ono; bụ nggu bẹ ẹphe chịko ele ẹnya l'ẹka t'ị nụje ẹphe nri l'oge iya. 
Teke ị nụru iya ẹphe; ẹphe achịkobe iya l'onwẹphe. Teke ị mụsaru ẹka; iphe dụ mma enwushihu; ẹphe egude iya rijia ẹpho. 
Teke ị gharu ẹphe azụ; ẹphe atsụlahaa egvu. Ị -nata ẹphe ume, ẹphe atụ; ẹphe anwụshihu; bụru ẹja alị. 
Teke i kuru Ume ngu ye iya l'ẹhu; yọ bụru iphe e meru k'ọphungu. Iimeje mgboko l'onwiya t'ọ dụ ọphungu ọphungu. 
Tẹ ọdu-biribiri Ojejoje dụkwa ẹge ọ dụ jeye tutu yoyo. Tẹ ozi, Ojejoje gude ẹka iya jee mekwa tẹ ẹhu tsọo ya ẹna; 
mbụ onye abụje; o -lee mgboko ẹnya; yọ nmahu kpakpakpa. Teke ọ byaru ẹka l'eli ugvu; ugvu ọbu akpụhu tụtutu. 
Mu a-nọduje agụ egvu anụ Ojejoje lẹ ndzụ mu mgburumgburu. Mu a-nọduje agụ egvu aja Nchileke mu ajaja jeye teke mu a-nọ-bebe. 
Tẹ kẹ nk'iya-a, mu arị-a tsọkwaa ya ẹna; kẹ l'iphe Ojejoje eme emeje t'ẹhu tsọo mu ẹna. 
Tẹ ndu ẹjo iya chịhu lẹ mgboko gbaa mgburumgburu; ọphu ndu akirishi 'anọhekwa anọno ophu. Tẹ mbẹdua jakwaa Ojejoje ajaja. T'ajaja bụru kẹ Ojejoje. 
