﻿Egvu-Ọma.
98.
Egvu-ọma Unu gụaru Ojejoje egvu ọphungu; kẹ l'o meru iphe dụ biribiri. Ọ bụ ike iya; mẹ ẹka iya ono, dụ nsọ ono b'o gude mekputa. 
Ojejoje mewaru t'a maru l'ọodzofutaje madzụ; bya emee tẹ iphe bụ mbakeshi maru l'ọ bụ onye doberu ẹka ndoo. 
Ọ nyataru obu, o yeru, ndu ọnu-ụlo Ízurẹlu; mẹ kẹ l'oomeje iphe o kfuru l'ẹke ẹphe nọ. Mgboko gba mgburumgburu phụ-dzuwaru ẹge Nchileke ayi egudeje adzọ madzụ. 
Unu tụa ụzu ẹhu-ọtso-ẹna gude kwabẹ Ojejoje ugvu; unubẹ ndiphe l'unu ha. Unu gụa egvu-ọma; gụshia ya ike; gude jaa Ojejoje! 
Unu gude une gụa egvu-ọma; jaa Ojejoje ajaja. Unu egudekwaphu une; mẹ egvu-ekwekwe jaa ya. 
Unu gude opu; gude ụpyoku tụa ụzu ẹhu-ọtso-ẹna; gude kwabẹ Ojejoje, bụ eze ugvu. 
T'eze ẹnyimu; mẹ iphemiphe ọbule, nọ iya nụ tụkokwa zee igidi. Tẹ mgboko l'ophu; mẹ iphemiphe ọbule, bu iya nụ tụa ụzu. 
Tẹ iphe bụ ẹnyimu, nọnu kụa ẹka. Iphe bụ ugvu, nọnu agụa egvu ekoshi l'ẹhu atsọ ẹphe ẹna. 
T'ẹphe tụko nọdu l'ifu Ojejoje gụa egvu; kẹ l'ọobyawa okpe mgboko ikpe. Ndu mgboko l'ẹphe ha; bẹ oo-kpe ikpe, dụ maa; hakwaarụphu ndiphe l'ẹphe ha enge, vudo nhamụnha. 
